કરોડોના ખર્ચે નિર્મિત PMના લાઇટ હાઉસ પ્રોજેક્ટમાં જરૂરી સુવિધાના અભાવે લાભાર્થીઓ ત્રાહિમામ

ભૂગર્ભ ગટરની વ્યવસ્થાના અભાવે 600થી વધુ પરિવારોના સ્વાસ્થ્ય પર તોળાતો ખતરો

રહેવાસીઓ જાહેર કરાયેલી સુવિધાઓથી વંચિત, કોન્ટ્રાક્ટરો લાખો રૂપિયા ચાંઉ કરી ગયાની શંકા

ખાસ-ખબર સંવાદદાતા
રાજકોટમાં રૈયા વિસ્તારમાં વડાપ્રધાન નરેન્દ્ર મોદીના ડ્રીમ પ્રોજેક્ટ લાઇટ હાઉસના ફર્નિચર, લાઇટ-પંખા સાથેના અતિ આધુનિક સુવિધાસભર 1144 આવાસનું લાભાર્થીઓને લોકાર્પણ કરી દેવામાં આવ્યું છે. અડધાથી વધુ એટલે કે અંદાજીત 600થી વધુ પરિવાર સ્વપ્નના મહેલ સમાન આવાસમાં રહેવા પણ આવી ગયા છે. વડાપ્રધાને લાઇટ હાઉસ માટે પસંદ કરેલા દેશના છ શહેર પૈકી ગુજરાતમાં એક માત્ર રાજકોટ શહેરમાં 1180 લાખના ખર્ચે ગ્લોબલ હાઉસીંગ ટેક્નોલોજીથી તૈયાર કરાયેલા લાઇટ હાઉસના લોકાર્પણના એક વર્ષમાં લાઇટ હાઉસમાં દિવા પાછળ અંધારા જેવો ઘાટ ઘડાયો છે. દરેક લાભાર્થીઓને આવાસમાં લાઇટ, પંખા અને સેફ્ટી ડોર આપવાની લેખિત બાહેંધરી છે પરંતુ એક પણ આવાસમાં લાઇટ, પંખા કે સેફ્ટી ડોર અપાયા નથી. આમ એક આવાસમાં ત્રણ એલઇડી લાઇટ, બે પંખા, એક સેફ્ટી ડોરની ગણતરી કરવામાં આવે તો કોન્ટ્રાક્ટરે શરતો મુજબની સુવિધા ઉપલબ્ધ ન કરીને લાખો રૂપિયા ઘર ભેગા કરી દીધાની શંકા વ્યક્ત કરાઇ રહી છે. એ જ રીતે 1144 આવાસ માટે ભૂગર્ભ ગટરનું કામ થઇ ગયું છે, પરંતુ હજી સુધી જોડાણ અપાયા ન હોવાથી ડ્રીમ પ્રોજેક્ટ લાઇટ હાઉસનું પટાંગણ ડ્રેનેજમાંથી ઉભરાતા ગંદા પાણીથી ગંધાઇ રહ્યુ છે. હાલમાં રોગચાળો બેકાબૂ છે. એવા સમયે લાઇટ હાઉસમાં વસવાટ કરતા 600થી વધુ પરિવાર પૈકી અનેક પરિવારના સભ્યો માંદગીના બિછાને પહોંચી ગયા છે. એક ચોંકાવનારી વિગત મુજબ 1144 લાભાર્થીઓ પાસેથી લાઇફ ટાઇમ મેઇન્ટેનન્સ પેટે રૂપિયા 60-60 હજાર(6 કરોડ, 86 લાખ, 40 હજાર) સોસાયટીના નામે બેંક એકાઉન્ટમાં ડિપોઝિટ કરી તેના વ્યાજમાંથી મેઇન્ટેનન્સ ખર્ચ કાઢવાના બદલે આટલી માતબર રકમ બેંકમાં જમા નહીં કરાવતા લાઇટ હાઉસ પ્રોજેક્ટના કોમન લાઇટ બીલ ખર્ચના માસિક સરેરાશ રૂપિયા 4 લાખ મેઇન્ટેનન્સના ભંડોળમાંથી ઓછા થઇ રહ્યા છે. અધૂરામાં સોલાર પેનલ દરેક વિંગના બદલે કોમ્યુનીટી હોલ પર ઇન્સ્ટોલ કરીને હજી તેનો ઉપયોગ શરૂ નહીં કરતા મહિને 2-4 લાખની વીજળીના બીલની બચત પણ ગુમાવી રહ્યા છે. કોન્ટ્રાક્ટરની કમાઇ લેવાની લાલચ કહો કે બાંધકામમાં બેદરકારી, 11 પૈકી 5 અને 6 નંબરની વીંગનું બાંધકામ સાવ નબળું હોવાથી બૂમરાળ મચી ગઇ છે. અનેક આવાસમાં દિવાલોમાં ભેજ ઘુસી ગયો છે અને છતમાંથી પાણી ટપકે છે. આ અંગે કોન્ટ્રાક્ટરને અનેક વખત ફરીયાદ કરવા છતાં કોઇ પરિણામ નહીં મળતા અનેક આવાસધારકો સ્વપ્નના મહેલનું પઝેશન મળી જવા છતાં રહેવા આવી શક્યા નથી.

લાખો રૂપિયાનો ભ્રષ્ટાચાર થયાની સેવાતી આશંકા
વડાપ્રધાનના ડ્રીમ પ્રોજેક્ટ લાઇટ હાઉસમાં દરેક આવાસધારકને મુખ્ય ડોર આગળ સેફ્ટી ડોર તેમજ એલઇડી લાઇટ અને પંખા આપવાનું વચન હતું. પરંતુ એક પણ લાભાર્થીને ઉપરોક્ત સુવિધા આપવામાં આવી નથી. આમ હિસાબ કરીએ તો ટુ બીએચકેના એક આવાસમાં એક ફ્લસ ડોર એટલે કે 1144 ફ્લસ ડોર, બે રૂમ, રસોડાની 3 એલઇડી લેખે 1144 આવાસમાં 3432 એલઇડી અને બે રૂમના પંખા લેખે 1144 આવાસના 2288 પંખાની સુવિધા આપવામાં આવી નથી. ફ્લસડોર, લાઇટ અને પંખાનો હિસાબ કરવામાં આવે તો કોન્ટ્રાક્ટરે શરતો મુજબ સુવિધા ન આપીને લાખો રૂપિયાની હેરાફેરી કર્યાના આક્ષેપો શરૂ થઇ ગયા છે.