સુરતમાં ઈંઝના દરોડાનો સાતમો દિવસ
30 બૅન્ક લૉકર ટાંચમાં લેવાયા, ફાઈવ સ્ટાર હોટલ બને તે પહેલાં મુન્ના ઓલપાડીનો જમીન સોદા ઈંઝની રડારમાં
- Advertisement -
ખાસ-ખબર ન્યૂઝ સુરત
લક્ષ્મી ગ્રુપ સહિત અન્ય લોકો સામે આવકવેરા વિભાગની ઇન્વેસ્ટિગેશન વિંગ દ્વારા હાથ ધરવામાં આવેલી આ મેરેથોન કાર્યવાહી સતત 7 દિવસ સુધી ચાલી હતી. જેમાં કુલ 1900 કરોડ રૂપિયાના બેનામી ટ્રાન્ઝેકશન શોધી કાઢવામાં આવ્યા છે. 30થી વધુ બેંક લોકરોને હાલ ફ્રીઝ કરી દેવામાં આવ્યા છે. તપાસના અંતે 30 કરોડ રૂપિયાની રોકડ અને સોના-ચાંદીના દાગીના જપ્ત કરવામાં આવ્યા છે. સાથે ડુમ્મસ રોડ પર સૂચિત ફાઇવ સ્ટાર હોટલ પ્રોજેક્ટ શરૂ થાય તે પહેલા જ મોટા વિવાદમાં સપડાયો છે.
આવકવેરા વિભાગની તપાસમાં બહાર આવ્યું છે કે, આ હાઈ-પ્રોફાઈલ જમીન સોદામાં મોટા પાયે નાણાકીય ગેરરીતિઓ આચરવામાં આવી છે. ખાસ કરીને બ્રિજેશ ઠક્કર ઉર્ફે મુન્ના ઓલપાડી દ્વારા કરવામાં આવેલા આ સોદાએ હવે સરકારી એજન્સીઓમાં દોડધામ મચાવી દીધી છે.
સુરતના પોશ ગણાતા ડુમ્મસ રોડ પર ફાઇવ સ્ટાર હોટલનું નિર્માણ થાય તે પૂર્વે જ આ જમીન સોદો મોટા વિવાદમાં સપડાયો છે. આ હાઈ-પ્રોફાઈલ જમીન સોદા પર હાલ આવકવેરા વિભાગની કડક નજર છે. તપાસમાં બહાર આવ્યું છે કે હોટલ માટે જે જમીનનો સોદો કરવામાં આવ્યો છે તેમાં મોટા પાયે નાણાકીય ગેરરીતિઓ આચરવામાં આવી હોવાની પૂરેપૂરી શક્યતા છે. આ પ્રોજેક્ટ અત્યારે ડેવલપર્સ અને રોકાણકારો માટે ચર્ચાનો વિષય બન્યો છે.
આવકવેરા વિભાગની પ્રાથમિક તપાસમાં ચોંકાવનારી વિગતો બહાર આવી છે કે, આ કરોડોની જમીનનો સોદો બ્રિજેશ ઠક્કર ઉર્ફે મુન્ના ઓલપાડી દ્વારા પાર પાડવામાં આવ્યો હતો. આ સોદો અંદાજે 4 મહિના પહેલા કરવામાં આવ્યો હોવાનું અધિકારીઓના ધ્યાન પર આવ્યું છે. મુન્ના ઓલપાડીની જમીન લે-વેચની પદ્ધતિ અને તેના નેટવર્ક અંગે અત્યારે ઝીણવટભરી તપાસ હાથ ધરવામાં આવી રહી છે, જેના કારણે સુરતના જમીન બજારના મોટા ખેલાડીઓમાં ભારે ફફડાટ જોવા મળી રહ્યો છે.
17,000 વારના વિશાળ ક્ષેત્રફળ ધરાવતી આ કિંમતી જમીનના સોદામાં નાણાકીય વ્યવહારોની પદ્ધતિએ શંકા જન્માવી છે. તપાસમાં જાણવા મળ્યું છે કે, સોદાની કુલ રકમમાંથી માત્ર 25 ટકા રકમ જ સત્તાવાર રીતે ચેકથી અથવા ’વ્હાઈટ’માં દર્શાવવામાં આવી છે. બાકીની 75 ટકા રકમ કઈ રીતે અને કયા માધ્યમથી ચૂકવવામાં આવી છે તે શોધવા માટે અધિકારીઓ મથી રહ્યા છે. આટલા મોટા પાયે રોકડ વ્યવહાર થવો તે ગંભીર કરચોરી તરફ સ્પષ્ટ સંકેત આપે છે.
આવકવેરા વિભાગે ઓપરેશન દરમિયાન વ્યૂહાત્મક રીતે કાર્યવાહી કરી હતી. સૌપ્રથમ બિલ્ડર ગ્રુપ સાથે સંકળાયેલા અનિલ બગદાણાના સ્થાનો પર દરોડા પાડવામાં આવ્યા હતા. આ કાર્યવાહીના ગણતરીના મિનિટોમાં જ અધિકારીઓની બીજી ટીમ પાલ રોડ પર સ્થિત બ્રિજેશ ઠક્કર ઉર્ફે મુન્ના ઓલપાડીના નિવાસસ્થાને અને ઓફિસે ત્રાટકી હતી. આ બંને વચ્ચેના આર્થિક તાર જોડાયેલા હોવાનું માનવામાં આવે છે. આ દરોડા દરમિયાન અધિકારીઓને અનેક વાંધાજનક દસ્તાવેજો અને ડિજિટલ પુરાવાઓ હાથ લાગ્યા હોવાનું પણ જાણવા મળ્યું છે.
આવકવેરાની ઇન્વેસ્ટિગેશન વિંગ દ્વારા સાત દિવસ સુધી ચાલેલી આ લાંબી કાર્યવાહીના અંતે કુલ 1900 કરોડ રૂપિયાના બેનામી ટ્રાન્ઝેકશન શોધી કાઢવામાં આવ્યા છે. આ દરોડા લક્ષ્મી ડાયમંડ ગ્રુપ, અનિલ બગદાણા અને મુન્ના ઓલપાડીને ત્યાં પાડવામાં આવ્યા હતા. તપાસના અંતે 30 કરોડ રૂપિયાની રોકડ અને સોના-ચાંદીના દાગીના જપ્ત કરવામાં આવ્યા છે. આટલી મોટી રકમના બિનહિસાબી વ્યવહારો મળતા આગામી દિવસોમાં આ કેસ વધુ ગંભીર વળાંક લેશે અને અન્ય લોકો પણ સકંજામાં આવશે.
