સાગર એજ્યુકેશન ટ્રસ્ટ અને મનપાના સહયોગથી ‘બચપન રીટર્ન્સ’નો કાર્યક્રમ

ઈવેન્ટમાં ડાન્સ, ડ્રામા, ડ્રોઈંગ, વન-મિનિટ ગેમ્સ, ફ્લેશ મોલ્સ સહિતની વિવિધ પ્રવૃત્તિઓ થશે

ખાસ-ખબર સંવાદદાતા
રાજકોટ મ્યુનિસિપલ કોર્પોરેશનના સહયોગ અને સાગર એજ્યુકેશન ટ્રસ્ટ દ્વારા બચપન રિટર્ન્સના કાર્યક્રમનું આયોજન તા. 31ના રોજ રવિવારે સવારે 9થી સાંજના 6 કલાક સુધી રેસકોર્ષ, કલ્પના સ્ટ્રીટ, ફૂટબોલ મેદાનની બાજુમાં, રાજકોટ ખાતે કરવામાં આવ્યું છે. વર્ષ 2014થી 2022 દરમિયાન ભક્તિનગર સર્કલ ખાતે સાગર એજ્યુકેશન ટ્રસ્ટ (સરસ્વતી સ્કૂલીંગ સીસ્ટમ) દ્વારા બચપન રીટર્ન્સ નામનો કાર્યક્રમ અત્યાર સુધીમાં કુલ ત્રણ વાર યોજાઈ ગયો છે જેમાં રાજકોટમાં રહેતાં પરિવારો અને બાળકો વિશેષ આમંત્રિત હતા. દરેક કાર્યક્રમમાં આશરે 5000થી 10,000 લોકોએ મુલાકાત લઈ વિવિધ કાર્યક્રમો માણ્યા હતા. બચવન રીટર્ન્સ ઈવેન્ટનો હેતુ વિદ્યાર્થીઓને તેમની પ્રતિભા પ્રદર્શિત કરવા, મનોરંજક અને દબાણમુક્ત વાતાવરણમાં તેમની કુશળતા વિકસાવવા માટે એક પ્લેટફોર્મ પૂરું પાડવાનો છે. આ ઈવેન્ટમાં ડાન્સ, ડ્રામા, ડ્રોઈંગ, વન-મિનિટ ગેમ્સ, ફ્લેશ મોબ્સ અને પર્વતારોહણ માટે વિવિધ પ્રકારની ગાંઠો શીખવા જેવી વિવિધ પ્રવૃત્તિઓનો સમાવેશ થાય છે. વધુમાં પ્રતિભાગીઓના કૌશલ્યોને વધુ વધારવા માટે પરંપરાગત રમતો, વિઘ્ન રમતો અને અન્ય પ્રવૃત્તિઓનું આયોજન કરવામાં આવે છે. આ ઈવેન્ટની થીમ, માર્કસ કો છોડો ઔર સીખો, જે ફકત શૈક્ષણિક સિદ્ધિઓ પર ધ્યાન કેન્દ્રિત કરવાને બદલે શીખવા અને વ્યક્તિગત વિકાસ પર ધ્યાન કેન્દ્રિત કરવાના મહત્ત્વ પર ભાર મૂકે છે.