અમદાવાદ : પોલીસના બે નકલી કાર્ડ અને ડે. મામલતદારના કાર્ડ સાથે શખ્સ પકડાયો

2012માં પોલીસ ભરતીમાં કોન્સ્ટેબલ તરીકે પસંદગી થઈ છતાં હાજર થયો નહોતો
ખાસ-ખબર ન્યૂઝ અમદાવાદ

તા. 3-1-2025ના રોજ અમદાવાદના મણિનગર પોલીસ સ્ટેશનના પોલીસ સ્ટાફની ટીમ દ્વારા બાતમી હકીકત આધારે તેમજ વાહન ચેકીંગ દરમિયાન એક ઇસમ એક્ટિવા મીટર સાયકલ સાથે શંકાસ્પદ હાલતમાં મળતા તેના વાહન અને નામ આધારે પોકેટકોપ એપ્લિકેશનમાં સર્ચ કરવામાં આવતા વાહન કોઈ બીજાના નામે હોય તેમજ મળી આવેલ ઇસમનો ગુન્હાહીત ઇતિહાસ ભૂતકાળમાં ગુન્હાઓ આચરેલું હોવાનું જણાઈ આવતા, આરોપી કિરીટકુમાર સ/ઓ બાબુભાઇ જેઠાભાઇ અમીન ઉ.વ. 36 રહે. એ/601, એમ્પાયર હાઈટ્સ ફ્લેટ, કોન્ફી હોટલની બાજુમાં, ઘોડાસર ચાર રસ્તા પાસે, ઇસનપુર, અમદાવાદ શહેર મુળ રહે. બી-8, વાત્રક સિંચાઇ કોલોની, એસ.ટી.બસ સ્ટેન્ડની પાછળ, મોડાસા તા.મોડાસા જી.અરવલ્લી મુળ વતન ગામ હેલોદર તા.માલપુર જી.અરવલ્લીને પકડી તેની પાસેથી પોલીસ તરીકેના બે નકલી આઇ કાર્ડ તથા ડે.મામલતદાર તરીકેના એક નકલી આઇ કાર્ડ તથા હોન્ડા એક્ટીવા નંબર જીજે-01-કઉ-087 કિંમત રૂા. 15,000/- તથા મોબાઇલ ફોન કિંમત રૂા. 10,000/- મળી રૂા. 25,000/-ના મુદ્દામાલ સાથે પકડી પાડી ધરપકડ કરવામાં આવી છે. પકડાયેલ આરોપી પાસેથી બે પોલીસ અને એક રેવન્યુના પોલીસ અધિકારી તથા કર્મચારીના ડુપ્લીકેટ કાર્ડ મળી આવતા મણિનગરના એ.એસ.આઈ. મહેન્દ્રસિંહ દ્વારા સરકાર તરફે ફરિયાદી બની ખોટા દસ્તાવેજો બનાવવા, તેનો ખરા તરીકે ઉપયોગ કરવા તથા રાજ્ય સેવકનો હોદ્દો ધારણ કરવા બાબતે મણિનગર પોલીસ સ્ટેશન ખાતે ફરિયાદ દાખલ કરાવવામાં આવેલ છે.

આરોપી સને 2016થી આજદિન સુધી મોડાસા જિલ્લાના મોડાસા ટાઉનમાં 1, ખેડા જિલ્લાના ઠાસરાના 1, અમદાવાદ શહેર રામોલ પોલીસ સ્ટેશન ખાતે 2, સાબરકાંઠા જિલ્લાના હિંમતનગર ખાતે 1, અમદાવાદ જિલ્લાના કેરાલા જીઆઇડીસી ખાતે 1, વલસાડ જિલ્લાના ધરમપુર પોલીસ સ્ટેશન ખાતે 1 મળી કુલ 8 જેટલા ડુપ્લીકેટ પોલીસના ગુન્હાઓમાં પકડાયેલ હોવાની વિગતો પોકેટકોપ એપ્લિકેશન દ્વારા જાણવા મળ્યું હતું. પોકેટ કોપ એપ્લિકેશન આધારે આ પકડાયેલ આરોપી રીઢો અને આંતર જિલ્લા આરોપી નીકળેલ હતો અને પોકેટ કોપ એપ્લિકેશન દ્વારા આરોપી આશરે 6 (અડધો ડઝન) વખત વડોદરા શહેર, આણંદ જિલ્લા અને અમદાવાદ શહેરના જુદા જુદા પોલીસ સ્ટેશન ખાતે પકડાઈ ચૂક્યો હોવાની પોલ ખુલી છે.પૂછપરછ કરવામાં આવતા પોતે એમ.એ., બી.એડ. તથા પીટીસી સુધી અભ્યાસ કર્યો છે. આરોપીના કહેવા પ્રમાણે પોતાને પોલીસ બનવાનો શોખ હોય પોતે સને 2012ની સાલમાં પોલીસ ભરતીમાં કોન્સ. તરીકે પસંદગી પામેલ હતો પરંતુ પોતાની સ્ત્રીમિત્રને પોલીસ ખાતું પસંદ ના હોય, પોતે હાજર થયો ના હતો.

ત્યારબાદ 2014ની સાલમાં તાલુકા કિયોન્સ એક્ઝિક્યુટિવ તરીકે છ તાલુકાના ઇન્ચાર્જ તરીકે કોન્ટ્રાક્ટ બેઇઝ ઉપર નોકરી મળેલ હતી અને આ નોકરી દરમિયાન આશરે 3000 જેટલા પીએમ યોજનાના ડુપ્લીકેટ કાર્ડ બાબતે કૌભાંડ થતાં પોતાના ઉપર તથા પોતાની સાથે નોકરી કરતા વિનોદ વણઝારા, ભાનુબેન પંડ્યા સહિતના કર્મચારીઓ ઉપર ગુન્હો નોંધાયો, જેમાં પોતાની તથા બીજા આરોપીઓની ધરપકડ કરવામાં આવેલ હતી. આ સિવાય પોતાના ઉપર ઠાસરા, રામોલ, કેરાલા જીઆઇડીસી, હિંમતનગર, ધરમપુર સહિતના પોલીસ સ્ટેશનો ખાતે ડુપ્લીકેટ પોલીસ તરીકેના ગુન્હાઓમાં પણ ધરપકડ કરવામાં આવી છે. રામોલ પોલીસ સ્ટેશન ખાતેના ગુન્હામાં પોતાની પત્ની ભાવનાબેન કિરીટકુમાર અમીનની પણ ધરપકડ પણ કરવામાં આવેલ હતી. વલસાડ જિલ્લાના ધરમપુર ખાતે એકના ડબલ કેસના મુખ્ય સૂત્રધાર યુનુસ મેમણ (તળાજા, ભાવનગર), અમદાવાદ શહેરના પોલીસ કોન્સ. જિતેન્દ્ર રમણભાઈ પંડ્યા (ઓરિજનલ પોલીસ) તથા સહઆરોપીઓ મહેશ વાઘેલા તેમજ શરીફસિંહ ચૌહાણ (કરજણ) સાથે મળી રૂા. 40 લાખની છેતરપિંડી આચરવામાં આવી હતી. પકડાયેલ આરોપી કિરીટ બાબુભાઇ અમીન પોતાના સહઆરોપીઓ સાથે રૂપિયા ડબલ કરવાની લાલચ આપી, ફરિયાદીને રૂપિયા સાથે બોલાવી સહ આરોપીઓ પોલીસના સ્વાંગમાં રેઇડ કરી પોલીસની રેઇડ થઈ હોવાનું જણાવી ફરિયાદીને ભગાડી ડબલ કરવા લાવેલ રૂપિયા લઈને રફુચક્કર થવાની મોડસ ઓપરેન્ડીથી ગુન્હાઓ આચરતા હોવાની કબૂલાત પણ કરવામાં આવી છે.

પકડાયેલ આરોપી કિરીટ બાબુભાઈ અમીન હાલમાં ઘોડાસર વિસ્તારમાં ફ્લેટ ખાતે રહેતો હોઈ પરંતુ ફ્લેટમાલિક સાથે ભાડા બાબતે તકરાર થતા ફ્લેટ માલિક દ્વારા ચેક રિટર્નની ફરિયાદ કરતા નામદાર કોર્ટમાંથી વોરંટ પણ નીકળેલ હોય પોતે ભવ્ય હોટલમાં રહેતો હોવાનો બચાવ કરેલ હતો. આરોપીની પ્રાથમિક તપાસ દરમિયાન પકડાયેલ આરોપી મણિનગર ખાતે આવેલ ભવ્ય હોટલ ખાતે છેલ્લા બે માસથી રહેતો હોવાની વિગતો મળેલ અને ત્યાં ત્રણ ચાર ટૂંકા વાળવાળા ઈસમો અવારનવાર મળવા આવતા હોવાનું અને બહાર જતા હોવાની વિગતો મળતા આ આરોપી સાથે અન્ય કોઈ આરોપીઓ સંડોવાયેલ હોવાની શક્યતા આધારે મણિનગર પોલીસ દ્વારા વધુ તપાસ હાથ ધરવામાં આવેલ છે. જે ડિવિઝનના એસીપી પ્રદીપસિંહ જાડેજાના માર્ગદર્શન હેઠળ મણિનગર પીઆઈ ડી. પી. ઉનડકટ, પીએસઆઈ એસ. આઈ. પટેલ તથા મણિનગર પોલીસ ટીમને આરોપી કિરીટ બાબુભાઈ અમીનની હાલમાં કોઈ બિલ્ડર સાથે કામ કરતો હોવાની તથા ડુપ્લીકેટ પોલીસ બની ગેર કાયદેસર જમીનના કબજા અપાવતો હોવાની તથા આ બિલ્ડર કામ કરવાના પેટે રૂપિયા આપતો હોવાની પણ વિગતો મળતા આ બાબતે વધુ તપાસ હાથ ધરવામાં આવેલ છે.