TOPના ભ્રષ્ટાચાર બહાર આવ્યા બાદ હવે રાજ્ય સરકાર મૂળથી સુધારા કરશે

શહેરી વિકાસ વિભાગ દ્વારા પ્રાથમિક ટી.પી. તૈયાર કરવાની મુદ્દત 12 માસમાંથી ઘટાડી 7 માસ કરાઇ

TP તૈયાર કરવા માટેની સમય મર્યાદા ઘટાડાઇ, દરેક તબકકે દરખાસ્ત ઑનલાઇન જોવા મળશે

અન્ય તબકકા માટે પણ સમયમર્યાદા નિશ્ર્ચિત : હાલ સમગ્ર ટી.પી. પ્રક્રિયા અંગે સૂચનો આપવા તા.15 સુધી શહેરી વિકાસ વિભાગની વેબસાઇટ પર સુવિધા ઉપલબ્ધ

ખાસ-ખબર ન્યૂઝ રાજકોટ

2024નું વર્ષ ગુજરાત સરકાર માટે વિવાદોનું વર્ષ બની રહ્યું છે જેમાં રાજકોટના ટીઆરપી કાંડ બાદ મહાનગરોના ટીપીઓ કઇ રીતે બાંધકામ નિયમો, ટીપીના નિયમો ખિસ્સામાં રાખીને જંગી નાણા કમાઇ છે. જે બહાર આવતા જ ભાજપ સરકારના વહીવટનો ધજાગરો થયો છે અને તેમાં મહેસુલી ભ્રષ્ટાચારમાં શહેરોમાં મહાનગરોની ટીપી એટલે ટાઉન પ્લાનીંગ એ સ્ત્રોત બની ગયો છે એ નિશ્ચિત થયા બાદ સરકારે હવે સ્ટ્રીમલાઇન્ડ ટાઉન પ્લાનીંગ પ્રક્રિયાને અમલમાં મુકવા નિર્ણય લીધો છે.
ટીપીની પ્રક્રિયા જે વર્ષો સુધી ચાલતી હોય છે અને ત્યાં સુધી પ્રસ્તાવિત ક્ષેત્રોમાં કાનુની અને ગેરકાનુની બાંધકામો થઇ ગયા હોય છે જેના કારણે ટીપીના અમલમાં મુશ્કેલી પડે છે તે ટાળવા ટીપી પ્રક્રિયાની સમયમર્યાદા પણ ઘટાડવા નિર્ણય લીધો છે જે મુજબ ટાઉન પ્લાનીંગ સ્કીમ પ્રાથમિક રીતે તૈયાર કરવા માટે હાલ જે 12 માસનો સમય છે તે ઘટાડીને 7 માસનો કરવામાં આવ્યો છે.

જે તે વિભાગે ફકત 7 માસમાં ટીપીની બ્લુ પ્રિન્ટ તૈયાર કરીને રાજય સરકારને સુપ્રત કરી દેવાની રહેશે.એટલું જ નહીં આખરી ટીપી તૈયાર કરવાની સમયમર્યાદા ઘટાડવામાં આવી છે. સરકાર આ માટે ઓરજીનલ એપ્રુવલ કમીટી પણ બનાવશે. શહેરી વિકાસ વિભાગ દ્વારા આ માટે સમગ્ર પ્રક્રિયાને એક વખત નિરીક્ષણ કર્યા બાદ પ્રથમ તબકકાથી સુધારા કરવાનું હાથ ધરવામાં આવ્યું છે.

જે ટીપીના અમલ સુધી ચલાશે. ઓરીજીનલ એપ્રુવલ કમીટી કે જે ફાઇનલ થયેલી યોજના સુધી જે તે પ્લોટના બાઉન્ડ્રી અને વિસ્તાર જળવાઇ રહે તે પણ જોશે અનેક વખત ટાઉન પ્લાનીંગમાં સ્થાનિક સ્તરે રાજય સરકારને ગેરમાર્ગે દોરીને સુધારા કરવામાં આવે છે તે પણ હવે મુશ્કેલ બનશે. ટાઉન પ્લાનીંગ ઓફિસર, ટીપીઓ કોઇ પણ ટીપી તૈયાર કરવાનો નિર્ણય લીધા બાદ તુર્ત જ ટીપીઓની નિયુકિત કરી દેવાશે અને સાત માસમાં તેને પ્રાથમિક ટીપી તૈયાર કરી દેવાની રહેશે.
સમગ્ર પ્રક્રિયાને પારદર્શક રાખવા માટે દરેક તબકકે તે પ્લાનીંગ ઓથોરીટીની વેબસાઇટ ઉપર પણ જોઇ શકાશે. અને એક વખત ટીપી માન્ય થયા બાદ તુર્ત જ તેનો અમલ કરી દેવાશે. ટીપીમાં ટાઇમફ્રેમ ખુબ જ મહત્વની છે. રાજય સરકારના સ્તરે પણ ટીપી લાંબા સમય સુધી પેન્ડીંગ રહે છે તે પણ લઇ શકશે નહીં. આ ઉપરાંત જિલ્લા સ્તરના અધિકારીને ટીપીઓ સાથે લાઇઝનીંગ કરવા પણ નિયુકત કરાશે.

શહેરી વિકાસ વિભાગના ઓફિસરોની સ્પેશ્યલ ડયુટી પ્રકાશ દુત્તાએ દ્વારા મહત્વના ફેરફારો કરવા માટે જે આયોજન કરાયું છે તેના આધારે આ સમગ્ર પ્રક્રિયા નિશ્ચિત થશે જોકે તેમાં કાનુની સુધારાની જરૂર રહેતી નથી. ગુજરાતની ટીપી સ્કીમ મોડેલ એ કેન્દ્રીય બજેટમાં પણ વખણાયું છે અને અન્ય રાજયોને પણ અનુકરણ કરવાની સલાહ આપી છે અને તેથી જ આ નવા સુધારેલા મુસદ્દાને પણ ઓનલાઇન કરાશે. જોકે આ માટે લોકોનો તા.પ થી 1પ સપ્ટેમ્બર દરમ્યાન અભિપ્રાય આપવા શહેરી વિકાસ વિભાગની વેબસાઇટ પર વિકલ્પ અપાયો છે. ગત તા. 4ના રોજ આ અંગે એક બેઠક મળી હતી અને તેમાં મ્યુનિ. કોર્પોરેશનના અધિકારીઓને સામેલ કરવામાં આવ્યા હતા.