11 રાજ્યો અને કેન્દ્રશાસિત પ્રદેશોના 93 મતવિસ્તારોમાં લગભગ 65 ટકા મતદાન, જાણો કયા રાજ્યમાં કેટલું મતદાન

11 રાજ્યો અને કેન્દ્રશાસિત પ્રદેશોના 93 મતવિસ્તારોમાં લગભગ 65 ટકા મતદાન નોંધાયું હતું. આસામમાં સૌથી વધુ 81.71 ટકા મતદાન થયું તો ઉત્તર પ્રદેશમાં સૌથી ઓછું 57.34 ટકા મતદાન થયું.

લોકસભા ચૂંટણી માટે 93 બેઠકો પર ત્રીજા તબક્કાનું મતદાન મંગળવારે શાંતિપૂર્ણ રીતે પૂર્ણ થયું હતું. 11 રાજ્યો અને કેન્દ્રશાસિત પ્રદેશોના 93 મતવિસ્તારોમાં લગભગ 65 ટકા મતદાન નોંધાયું હતું. તો અગાઉ વર્ષ 2019ની લોકસભા ચૂંટણીમાં 66% મતદાન નોંધાયું હતું. પ્રથમ બે તબક્કાની જેમ, ત્રીજા તબક્કામાં પણ 2019 કરતાં ઓછી મતદાન ટકાવારી નોંધવામાં આવી હતી.

Peaceful polling across 11 States/UTs in Phase-III of #GeneralElections2024 ;
Voter Turnout – 61.45% as of 8PM
Details here : https://t.co/nGricGCXXw pic.twitter.com/sGF1IG4TKC

— Spokesperson ECI (@SpokespersonECI) May 7, 2024

કયા રાજ્યમાં કેટલું મતદાન?
આસામમાં સૌથી વધુ 81.71 ટકા મતદાન થયું, ત્યારબાદ પશ્ચિમ બંગાળમાં 76.52 ટકા, જ્યારે ઉત્તર પ્રદેશમાં સૌથી ઓછું 57.34 ટકા મતદાન થયું, જ્યારે બિહારમાં થોડું વધારે 58.18 ટકા મતદાન થયું હતું. જ્યારે ગુજરાતની 25 લોકસભા સીટો પર 59.51 ટકા મતદાન નોંધાયું છે.

ચાલો જોઈએ ક્યાં અને કેટલા મત પડ્યા?
કુલ મતદાન – 64.58 ટકા
ઉત્તર પ્રદેશ- 57.34 ટકા
બિહાર- 58.18 ટકા
ગુજરાત- 59.51 ટકા
મહારાષ્ટ્ર- 61.44 ટકા
મધ્ય પ્રદેશ- 66.05 ટકા

દાદરા નગર હવેલી અને દમણ -દીવ – 69.87 ટકા
કર્ણાટક- 70.41 ટકા
છત્તીસગઢ- 71.06 ટકા
ગોવા- 75.20 ટકા
પશ્ચિમ બંગાળ- 76.52 ટકા
આસામ- 81.71 ટકા

પ્રથમ અને બીજા તબક્કામાં કુલ મતદાનની ટકાવારી
ચૂંટણી પંચના મતે આ અંદાજિત આંકડા છે અને તેમાં વધારો થવાની સંભાવના છે. લોકસભા ચૂંટણીના પ્રથમ અને બીજા તબક્કામાં કુલ મતદાનની ટકાવારી અનુક્રમે 66.14 ટકા અને 66.71 ટકા હતી.

543 માંથી 282 લોકસભા બેઠકો પર મતદાન પૂર્ણ
લોકસભા ચૂંટણીના ત્રીજા તબક્કામાં 8.39 કરોડ મહિલાઓ સહિત ઓછામાં ઓછા 17.24 કરોડ લોકો મતદાન કરવા પાત્ર છે અને 18.5 લાખ અધિકારીઓ દ્વારા સંચાલિત 1.85 લાખ મતદાન મથકો સ્થાપિત કરવામાં આવ્યા હતા. ત્રીજા તબક્કાની સાથે 20 રાજ્યો/કેન્દ્રશાસિત પ્રદેશો અને 543 માંથી 282 લોકસભા બેઠકો પર મતદાન પૂર્ણ થયું છે.

આગામી તબક્કાનું મતદાન 13મી મેના રોજ
ત્રીજા તબક્કામાં લગભગ 120 મહિલાઓ સહિત 1,300થી વધુ ઉમેદવારો મેદાનમાં હતા, હવે આગામી ચાર તબક્કા 13 મે, 20 મે, 25 મે અને 1 જૂનના રોજ મતદાન થશે. 4 જૂને મતગણતરી થશે.