વેરાવળ ખાતે ‘વિશ્ર્વ સિંહ દિવસ’ નિમિત્તે મહારેલી યોજાઈ

800 કરતા વધુ નાગરિકોએ શપથ થકી સિંહોનું સંરક્ષણ કરવાની પ્રતિબદ્ધતા વ્યક્ત કરી

ખાસ-ખબર ન્યૂઝ ગિર-સોમનાથ, તા.11
ગીર સોમનાથ જિલ્લા શિક્ષણઅધિકારી કચેરી અને વનવિભાગના સંયુક્ત ઉપક્રમે ‘વિશ્વ સિંહ દિવસ’ નિમિત્તે વેરાવળ શહેરની શાળાના કુલ 800 વિદ્યાર્થીઓને સાથે લઈ અને મહારેલી યોજાઈ હતી. આ રેલી સરકારી બોય્ઝ હાઈસ્કૂલ વેરાવળથી નગરપાલિકા, ટાવર ચોક, પ્રાંત ઓફિસથી થઈ શહેરના મુખ્ય માર્ગો પર ફરી હતી અને સરકારી બોય્ઝ હાઇસ્કુલ ખાતે સમાપન થયું હતું.

જિલ્લા શિક્ષણ અધિકારીની કચેરી ખાતે યોજાયેલા કાર્યક્રમમાં જિલ્લા યુવા વિકાસ અધિકારી એચ.ડી.મકવાણાએ શાબ્દિક સ્વાગત કર્યું હતું. તેમણે જણાવ્યું હતું કે, સિંહ એ ગીરની અમૂલ્ય ધરોહર છે. માનવ સાથે સિંહનું ઐક્ય જળવાઈ રહે તેવા સહિયારા પ્રયત્ન થકી પ્રાકૃતિક સહજીવનનું સંવર્ધન કરવાનો સહિયારો પ્રયત્ન છે. ગીરના સિંહ એ સમગ્ર ગુજરાતનું ગૌરવ છે. ગુજરાત એ એશિયાટિક સિંહોના રહેઠાણ માટે સુરક્ષિત બન્યું છે.