લસણના ભાવમાં કોઈ સટ્ટાકીય તેજી નથી : યાર્ડના વેપારી
ખાસ-ખબર સંવાદદાતા
રાજકોટ માર્કેટિંગ યાર્ડમાં ડુંગળીની નિકાસ પર પ્રતિબંધ મૂકવામાં આવ્યા બાદ ભાવમાં મોટો ઘટાડો થતા ખેડૂતોને માથે ઓઢીને રોવાનો વારો આવ્યો છે. બીજી તરફ હાલ લસણનાં ભાવમાં નોંધપાત્ર વધારો જોવા મળી રહ્યો છે. માર્કેટિંગ યાર્ડમાં નવા લસણની આવક ન થતા જૂનાનાં એક કિલોનો 400-500 ભાવ બોલાયો હતો. જેમાં સારી ક્વોલિટીવાળા એક કિલો લસણનાં 500 ઉપજી રહ્યા છે. ભાવમાં થયેલો આ વધારો યથાવત રહેવાની સંભાવના વ્યક્ત કરવામાં આવી રહી છે. એક ખેડૂતે જણાવ્યું કે, જિંદગીમાં પહેલીવાર લસણનો આટલો ભાવ જોયો. પ્રાપ્ત વિગત અનુસાર ચાલુ વર્ષે વાતાવરણમાં આવેલા ફેરફારો તેમજ કમોસમી વરસાદનાં કારણે હાલ માર્કેટિંગ યાર્ડમાં નવા લસણની આવક થતી નથી. જોકે લસણ જીવન જરૂરી વસ્તુ હોવાથી તેની માગ યથાવત રહી છે. જેના કારણે ખેડૂતોને જૂના લસણનાં સારા ભાવ મળી રહ્યો છે. રાજકોટ સહિતના યાર્ડમાં એક કિલો લસણના ભાવ 400થી 500 રૂપિયા સુધીના જોવા મળી રહ્યો છે. જ્યારે સારી ક્વોલિટીનું એક કિલો લસણ 500 કરતા વધુ કિંમતે વેંચાય રહ્યું છે. એવામાં છૂટક બજારમાં પણ લસણના ભાવ આસમાને પહોંચ્યા છે.
રાજકોટ યાર્ડના વેપારી કિશોર વઘાસિયાએ જણાવ્યું હતું કે, સામાન્ય રીતે ફેબ્રુઆરી મહિનામાં જૂનું લસણ ખૂટે નહીં તેવો ઇતિહાસ છે. જેને બદલે હાલ દેશભરના તમામ યાર્ડમાં હાલ જૂનું લસણ પૂર્ણતાના આરે છે. ગયા વર્ષે લસણનો પાક ખૂબ ઓછો હતો અને સારું લસણ બજારમાં ઓછું આવ્યું હતું. જેના કારણે આ લસણનો ખેડૂતોને સારો એવો ભાવ મળ્યો હતો અને ખેડૂતોએ સારો ભાવ મળતા મોટાભાગના ખેડૂતોએ લસણ વેંચી નાખ્યું હોવાથી ફેબ્રુઆરી મહિનામાં જ લસણનો સ્ટોક ઓછો છે. તેમજ નવા લસણની આવક મોડી હોવાને કારણે હવે જે લસણ બચ્યું તેના ભાવમાં વધારો જોવા મળ્યો છે.
ત્યારે લસણના ભાવમાં કોઈ સટ્ટાકીય તેજી હોવાની વાત નથી.
- Advertisement -
20 કિલો લસણના રૂા.7000 ભાવ !
વધુમાં તેમણે જણાવ્યું હતું કે, જૂના લસણમાં હાલ ઝીણા અને મધ્યમ કદના લસણના ભાવ 20 કિલો 3થી લઈને 4 હજાર સુધીમાં વેચાય છે. આ સાથે જ સારી ક્વોલિટીનું લસણ 4 હજારથી શરૂ થઈને 7,000 સુધીના વેચાય રહ્યું છે. રાજકોટ યાર્ડમાં સૌરાષ્ટ્રના બધા જિલ્લાઓનું લસણ આવે છે. આ સિવાય મધ્યપ્રદેશ રાજ્યના અલગ અલગ જિલ્લાઓમાંથી મોટા પ્રમાણમાં લસણ વેચાવા માટે આવી રહ્યું છે. જેના પણ 2500થી લઈને 5,000 સુધીના ભાવ બોલાય રહ્યા છે. હાલમાં મારી ઉંમર 50 વર્ષની થઈ પરંતુ અત્યારસુધીમાં મેં કોઈ દિવસ ધાર્યું નથી કે લસણના 20 કિલોના રૂપિયા 7,000 ભાવ મળશે આવું પ્રથમ વખત થયું છે કે લસણ પૂર્ણ થઈ ગયું છે અને તેના ભાવ રૂપિયા 7,000 મળી રહ્યા છે.
