આવતીકાલથી યુપી સહિત 17 રાજ્યોમાં ઠંડી વધશે, 77 ટ્રેન રદ્દ
ખાસ-ખબર ન્યૂઝ નવી દિલ્હી
જમ્મુ-કાશ્મીરમાં વધતી ઠંડીને કારણે પારો માઈનસમાં ગગડ્યો છે. જમ્મુના 2 જિલ્લા અને કાશ્મીરના 9 જિલ્લામાં પારો માઈનસમાં નોંધાયો હતો. ઝોજિલા સૌથી ઠંડુ છે, જ્યાં તાપમાન -19 ડિગ્રીએ પહોંચ્યું છે. શોપિયાંમાં -4.5 ડિગ્રી, પહેલગામ અને બાંદીપોરામાં -4.3 ડિગ્રી તાપમાન છે. શ્રીનગરમાં પણ પારો -2.0 ડિગ્રી સેલ્સિયસ પર પહોંચી ગયો છે. પંજાબનું આદમપુર મેદાનીય વિસ્તારોમાં 3.8 ડિગ્રી સાથે સૌથી ઠંડુ શહેર હતું.
- Advertisement -
દિલ્હીમાં આજે સવારે 7.1 ડિગ્રી તાપમાન સાથે સિઝનની સૌથી ઠંડી સવાર હતી. મુંબઈ, દિલ્હી અને ઉત્તર પ્રદેશના અનેક વિસ્તારોમાં સવારે ધુમ્મસ છવાયું હતું. વધતા ધુમ્મસને કારણે ઉત્તર રેલવેએ 28મી ફેબ્રુઆરી સુધી 77 ટ્રેનો રદ કરી છે. તેમાંથી 36 ટ્રેનો દિલ્હી ડિવિઝનની છે. હવામાન વિભાગના જણાવ્યા અનુસાર, વેસ્ટર્ન ડિસ્ટર્બન્સના કારણે 8-9 ડિસેમ્બરે દિલ્હી, પંજાબ, હરિયાણા, ચંદીગઢ, આસામ, સિક્કિમ, મેઘાલય, ત્રિપુરા સહિત 17 રાજ્યોમાં ધુમ્મસ રહેશે. જેના કારણે મેદાનીય રાજ્યોમાં ઠંડી વધશે.
અહીં શુક્રવારે કર્ણાટકના કેટલાક વિસ્તારોમાં વરસાદ પડ્યો હતો. રવિવારે પંજાબ, હરિયાણા અને પશ્ર્ચિમ યુપીમાં પણ વરસાદ પડી શકે છે. આ સિવાય હિમાચલ પ્રદેશમાં હિમવર્ષા થવાની આગાહી કરવામાં આવી છે. પહાડો પર બરફ વધવાથી મધ્યપ્રદેશમાં તીવ્ર શિયાળાનો બીજો રાઉન્ડ આવશે. આગામી 48 કલાકમાં રાજ્યના પૂર્વ ભાગમાં એટલે કે જબલપુર, રીવા, શહડોલ અને રીવા ડિવિઝનમાં વરસાદ થઈ શકે છે, જ્યારે ભોપાલ અને ઈન્દોરમાં ઠંડી રહેશે. અત્યારે ગ્વાલિયર-ચંબલ ડિવિઝન સૌથી ઠંડું છે. ગ્વાલિયરમાં પારો 8.5 ડિગ્રીએ પહોંચી ગયો છે. હવામાન વિભાગના જણાવ્યા અનુસાર ડિસેમ્બરના બીજા પખવાડિયાથી સમગ્ર રાજ્યમાં કડકડતી ઠંડી પડશે.
