ખાસ-ખબર ન્યૂઝ રાજકોટ, તા.18
વાંકાનેરના ઢુવા નજીક રોંગ સાઈડમાં એક ડમ્પર ચાલકે માટેલ મંદિરે દર્શન કરી પરત ફરતાં ડબલ સવારી બાઇકને હડફેટે લેતાં ગંભીર અકસ્માત સર્જાયો હતો, જેમાં એક યુવાનનું ઘટનાસ્થળે મોત થયું હતું, જ્યારે અન્ય એક યુવાનને ઇજાઓ પહોંચી હતી, રાજેશભાઈ પરમાર (ઉ.વ.18, રહે. મોરબી) એ વાંકાનેર તાલુકા પોલીસમાં આરોપી ડમ્પર નં. GJ 12 BX 5944 ના ચાલક સામે ફરિયાદ નોંધાવી છે કે, ગતરાત્રીના ફરિયાદી તથા તેના ત્રણ મિત્રો બે બાઇક પર માટેલ ખોડીયાર માતાજીના મંદિરે દર્શન કરી પરત ફરતાં હોય
- Advertisement -
ત્યારે તેમના એક સ્પ્લેન્ડર બાઇકને વાંકાનેર-મોરબી નેશનલ હાઇવે પર ઢુવા ઓવરબ્રીજથી આગળ મોરબી તરફ સનકોર ટાઇલ્સના નવા બનતા શોરૂમ સામે રોંગ સાઈડમાં આવતા ડમ્પર નં. GJ 12 BX 5944 ના ચાલકે હડફેટે લેતા ગંભીર અકસ્માત સર્જાયો હતો, જેમાં બાઇક ચાલક ફરીયાદીને ડાબા ખભામાં તથા શરીરે ગંભીર ઇજાઓ પહોંચી હતી, જ્યારે તેમની પાછળ બેઠેલા મિત્ર રોહીત વિપુલભાઇ ઝાલા(ઉ.વ. 17)ના શરીર પર ડમ્પરના વ્હીલ ફરી વળતાં તેનું ઘટનાસ્થળે જ કમકમાટીભર્યું મોત થયું હતું. આકસ્માત સર્જ્યા બાદ ડમ્પર ચાલક પોતાનું વાહન સ્થળ પર મુકી નાસી ગયો હતો, પોલીસે ડમ્પર ચાલક વિરુદ્ધ ગુનો નોંધી કાર્યવાહી હાથ ધરી છે.
