સિલ્વર મેડલ માટે સ્પોર્ટ્સ કોર્ટમાં અપીલ, આજે નિર્ણય
ખાસ-ખબર ન્યૂઝ નવી દિલ્હી, તા.8
ભારતીય કુસ્તીબાજ વિનેશ ફોગાટે પેરિસ ઓલિમ્પિકમાં ગેરલાયક ઠર્યા બાદ કુસ્તીમાંથી નિવૃત્તિ લેવાની જાહેરાત કરી છે. તેણે એક પોસ્ટમાં લખ્યું છે કે, ‘મા કુસ્તી જીતી ગઈ, હું હારી ગઈ. માફ કરજે તારા સપનાં અને મારી હિમ્મત બધું તૂટી ગયું છે. આનાથી વધુ હવે તાકાત રહી નથી. અલવિદા કુસ્તી 2001-2024, હું હંમેશા તમારી ઋણી રહીશ, માફ કરશો.’ જો કે, નિવૃત્તિની જાહેરાત કરતા પહેલા, તેણે બુધવારે રાત્રે પોતાની ગેરલાયકાત સામે અપીલ દાખલ કરી હતી. તેઓએ કોર્ટ ઓફ આર્બિટ્રેશન ફોર સ્પોર્ટ્સ પાસે માંગ કરી હતી કે તેમને સંયુક્ત રીતે સિલ્વર મેડલ આપવામાં આવે. વિનેશે પહેલા ફાઈનલ રમવાની માંગ પણ કરી હતી. પરંતુ તેઓએ તેમની અપીલ બદલી અને હવે સંયુક્ત રીતે સિલ્વર આપવાની માંગ કરી. 7 ઓગસ્ટના રોજ, વિનેશનું વજન તેની નિર્ધારિત 50 કિલોગ્રામની શ્રેણી કરતાં 100 ગ્રામ વધુ હોવાનું બહાર આવ્યું. આ પછી ઓલિમ્પિક એસોસિએશને તેણીને ફ્રી સ્ટાઇલ મહિલા કુસ્તી માટે અયોગ્ય જાહેર કરી. ઓલિમ્પિકમાંથી બહાર થયા બાદ વિનેશની તબિયત બગડી હતી. તેને હોસ્પિટલમાં દાખલ કરવામાં આવ્યો હતો. જ્યારે કોચ વિજય દહિયા તેને મળવા આવ્યા ત્યારે વિનેશે તેને કહ્યું – ’તે ખરાબ નસીબ હતું કે અમે મેડલ ગુમાવી દીધા, પરંતુ આ રમતનો એક ભાગ છે.’ વડાપ્રધાન નરેન્દ્ર મોદીએ ભારતીય ઓલિમ્પિક એસોસિએશનના પ્રમુખ પીટી ઉષાને પણ કુસ્તીબાજને મદદ કરવાના રસ્તા શોધવા કહ્યું હતું. પીએમે ઉષાને આ મામલે વિરોધ નોંધાવવા પણ કહ્યું હતું.
- Advertisement -
ભારતીય ઓલિમ્પિક ટીમના ડોક્ટર દિનશા પૌડીવાલાએ એક નિવેદન જારી કરીને કહ્યું કે વિનેશ અને તેના કોચને 6 ઓગસ્ટની રાત્રે જ તેના વધારાના વજન વિશે જાણ થઈ. આ પછી, વિનેશ આખી રાત ઊંઘી ન હતી અને તેનું વજન નિર્ધારિત શ્રેણીમાં લાવવા માટે જોગિંગ, સ્કિપિંગ અને સાયકલ ચલાવવા જેવી કસરતો કરતી રહી. ડોક્ટર પૌડીવાલાએ જણાવ્યું કે વિનેશે તેના વાળ અને નખ પણ કાપી નાખ્યા હતા. તેના કપડા પણ નાના કરવામાં આવ્યા હતા. આમ છતાં તેનું વજન ઘટ્યું ન હતું. કેટલાક મીડિયા રિપોર્ટ્સમાં કહેવામાં આવ્યું છે કે ભારતીય ટીમે વિનેશને થોડો વધુ સમય આપવાની માંગ કરી હતી, પરંતુ તેમની કોઈપણ માંગ સ્વીકારવામાં આવી ન હતી.
ઑલિમ્પિક ફાઇનલમાં પહોંચનારી પ્રથમ ભારતીય મહિલા કુસ્તીબાજ વિનેશ 3 મેચ જીતીને 50 કિગ્રા કુસ્તી ઓલિમ્પિકની ફાઇનલમાં પહોંચનારી પ્રથમ ભારતીય મહિલા કુસ્તીબાજ બની હતી. તેણીએ સેમિફાઇનલમાં ક્યુબાના કુસ્તીબાજ ગુઝમેન લોપેઝને, ક્વાર્ટર ફાઇનલમાં યુક્રેનની ઓક્સાના લિવાચ અને પ્રી-ક્વાર્ટર ફાઇનલમાં વિશ્ર્વ ચેમ્પિયન જાપાનની યુઇ સુસાકીને 3-2થી હરાવ્યા હતા.
IOAએ કહ્યું- આખી રાત પ્રયાસો છતાં વજન થોડાં ગ્રામ વધુ રહ્યું
ઇન્ડિયન ઓલિમ્પિક એસોસિએશન (IOA) એ કહ્યું- તે ખૂબ જ અફસોસજનક છે કે વિનેશ ફોગાટ વધુ વજન હોવાના કારણે મહિલા કુશ્ર્તીની 50 કિગ્રા કેટેગરીમાં અયોગ્ય છે. આખી રાત પ્રયત્નો કરવા છતાં, સવારે તેનું વજન 50 કિલો કરતાં થોડા ગ્રામ વધુ હોવાનું જણાયું હતું. અમે તમને વિનેશની ગોપનીયતાનો આદર કરવા વિનંતી કરીએ છીએ. ભારતીય ટીમ આ અંગે વધુ ટિપ્પણી કરશે નહીં. અમે આગામી સ્પર્ધાઓ પર ધ્યાન કેન્દ્રિત કરવા માંગીએ છીએ.
