સંસદના શિયાળુ સત્ર માં સોમવારે કાયદા મંત્રી અર્જુન રામ મેઘવાલ લોકસભામાં વન નેશન વન ઇલેક્શન બિલ રજૂ કરશે. આ બિલ જેપીસી (JPC) પાસે ચર્ચા માટે મોકલવામાં આવશે.
કાયદા મંત્રી અર્જુન રામ મેઘવાલ સોમવારે સંસદના શિયાળુ સત્રમાં લોકસભામાં વન નેશન વન ઇલેક્શન બિલ રજૂ કરશે. સરકારી સૂત્રો પાસેથી મળેલી માહિતી અનુસાર, આ બિલને જેપીસી (JPC) પાસે ચર્ચા માટે મોકલવામાં આવશે. માહિતી અનુસાર, સરકાર આ બિલને લાંબી ચર્ચા અને સર્વસંમતિ બનાવવા માટે સંયુક્ત સંસદીય સમિતિ (JPC) પાસે મોકલશે. જેપીસી તમામ રાજકીય પક્ષોના પ્રતિનિધિઓ સાથે વિગતવાર ચર્ચા કરશે અને આ પ્રસ્તાવ પર સામૂહિક સર્વસંમતિની જરૂરિયાત પર ભાર મૂકશે.
- Advertisement -
વિરોધમાં વિપક્ષ
હાલમાં દેશના અલગ-અલગ રાજ્યોમાં અલગ-અલગ સમયે ચૂંટણી યોજાય છે. કાયદો બન્યા બાદ દેશમાં એક સાથે ચૂંટણી કરાવવાની તૈયારીઓ ચાલી રહી છે. જો કે, સરકારના આ પગલાનો કોંગ્રેસ અને AAP જેવી ઘણી ઇન્ડિયા બ્લોકની પાર્ટીઓએ વિરોધ કર્યો છે. વિપક્ષનો આરોપ છે કે આનાથી કેન્દ્રમાં સત્તાધારી પક્ષને ફાયદો થશે. નીતિશ કુમારના JD(U) અને ચિરાગ પાસવાન જેવા NDAના મુખ્ય સાથીઓએ એક સાથે ચૂંટણી યોજવાનું સમર્થન કર્યું છે. ‘One Nation One Election’ને વારંવાર ચૂંટણીઓથી થતા ખર્ચ અને વિક્ષેપોને ઘટાડવા માટે એક મહત્ત્વપૂર્ણ સુધારા તરીકે જોવામાં આવે છે.પૂર્વ રાષ્ટ્રપતિ રામનાથ કોવિંદે કરી હતી અધ્યક્ષતા
‘વન નેશન, વન ઇલેક્શન’ પર વિચારણા કરવા માટે રચાયેલી ઉચ્ચ સ્તરીય સમિતિએ કહ્યું કે 32 રાજકીય પક્ષોએ આ પ્રસ્તાવને સમર્થન આપ્યું, જ્યારે 15 પક્ષોએ તેનો વિરોધ કર્યો. આ ઉચ્ચ સ્તરીય સમિતિની અધ્યક્ષતા પૂર્વ રાષ્ટ્રપતિ રામનાથ કોવિંદે કરી હતી. રામનાથ કોવિંદે ઓક્ટોબરમાં 7મા લાલ બહાદુર શાસ્ત્રી મેમોરિયલ લેક્ચર દરમિયાન કહ્યું હતું કે 15 વિરોધી પક્ષોમાંથી ઘણાએ અગાઉ કયારેકને ક્યારેક ‘વન નેશન, વન ઇલેક્શન’ના વિચારને સમર્થન આપ્યું હતું.
- Advertisement -
કેવી રીતે તૈયાર થયો ‘વન નેશન, વન ઇલેક્શન’ રિપોર્ટ
પૂર્વ રાષ્ટ્રપતિ રામનાથ કોવિંદે ‘વન નેશન, વન ઇલેક્શન’ સાથે જોડાયેલી ઘણી મહત્ત્વપૂર્ણ બાબતો શેર કરતા કહ્યું કે આ રિપોર્ટ તૈયાર કરવામાં લગભગ 6 મહિનાનો સમય લાગ્યો છે. 3 મહિના તો ઇન્વિટેશનમાં લાગી ગયા. પછી અમે વાતચીત શરૂ કરી. 2 મહિના ડે ટુ ડે બેસિસ પર વાતચીત કરી. આ રિપોર્ટમાં 18 હજારથી વધુ પેજ છે. મને જાણ કરવામાં આવી હતી કે આજ સુધી ભારત સરકારની કોઈ કમિટીએ આટલો મોટો રિપોર્ટ આપ્યો નથી. આ રિપોર્ટ 21 વોલ્યુમ્સમાં બનાવવામાં આવ્યો છે. આ માટે અમે લોકો પાસેથી સૂચનો માંગ્યા. આ માટે 16 ભાષાઓમાં 100થી વધુ જાહેરાતો આપવામાં આવી. 21000 લોકોએ આનો જવાબ આપ્યો. 80 ટકા લોકો તેની તરફેણમાં હતા. આ સિવાય અમે પૂર્વ મુખ્ય ચૂંટણી કમિશનરને પણ બોલાવ્યા. FICCI, ICC, બાર કાઉન્સિલના પ્રતિનિધિઓને પણ બોલાવવામાં આવ્યા.
દેશ માટે ગેમ ચેન્જર સાબિત થઈ શકે છે આ બિલ
પૂર્વ રાષ્ટ્રપતિ રામનાથ કોવિંદે જણાવ્યું કે ભારતમાં ચૂંટણી કરાવવા માટે 5 થી 5.5 લાખ કરોડ રૂપિયા ખર્ચ થઈ જાય છે. જો આ બિલ લાગુ થઈ જશે તો એકસાથે ચૂંટણી કરાવવા માટે માત્ર 50 હજાર કરોડ રૂપિયાનો જ ખર્ચ થશે. આનાથી ઘણી બચત થશે. બાકીના નાણાંનો ઉપયોગ ઔદ્યોગિક વિકાસ માટે કરવામાં આવશે. એકંદરે આ બિલ અમલમાં આવ્યા બાદ દેશની જીડીપીમાં અંદાજે એકથી દોઢ ટકાનો વધારો થવાની સંભાવના છે. એવામાં આ વન નેશન, વન ઇલેક્શન ભારત માટે ગેમ ચેન્જર સાબિત થઈ શકે છે.
