ટ્રમ્પ વહીવટીતંત્રે કહ્યું છે કે તે અમેરિકામાં ગેરકાયદેસર રીતે રહેતા ઇમિગ્રન્ટ્સને દેશ છોડવા માટે 1,000 ડોલર ચૂકવશે
ડોનાલ્ડ ટ્રમ્પે ઇમિગ્રેશન અમલીકરણ અને યુ.એસ.માં ગેરકાયદેસર રીતે ઇમિગ્રન્ટ્સના સામૂહિક દેશનિકાલને તેમના અભિયાનનું કેન્દ્રબિંદુ બનાવ્યું છે, પરંતુ તે એક ખર્ચાળ, સંસાધન-સઘન પ્રયાસ છે.
- Advertisement -
રાષ્ટ્રપતિ ડોનાલ્ડ ટ્રમ્પના વહીવટીતંત્રે સોમવારે (5 મે, 2025) જણાવ્યું હતું કે તે ગેરકાયદેસર રીતે યુનાઇટેડ સ્ટેટ્સમાં રહેતા અને સ્વેચ્છાએ તેમના વતન પરત ફરતા ઇમિગ્રન્ટ્સને $1,000 ચૂકવશે.
અમેરિકાના રાષ્ટ્રપતિ ડોનાલ્ડ ટ્રમ્પે સત્તામાં આવતાની સાથે જ ગેરકાયદેસર ઇમિગ્રન્ટ્સ પર કડક કાર્યવાહી શરૂ કરી દીધી હતી. હવે ડોનાલ્ડ ટ્રમ્પ ગેરકાયદેસર ઇમિગ્રન્ટ્સ માટે એક ખાસ ઓફર લઈને આવ્યા છે. ટ્રમ્પ વહીવટીતંત્રનું કહેવું છે કે વહીવટીતંત્ર એવા તમામ ગેરકાયદેસર ઇમિગ્રન્ટ્સને એક હજાર યુએસ ડોલર ચૂકવશે જેઓ સ્વેચ્છાએ અમેરિકા છોડવા તૈયાર છે.
હોમલેન્ડ સિક્યુરિટી વિભાગે સોમવારે એક પ્રેસ રીલીઝ જારી કરીને આ યોજના વિશે જણાવ્યું છે. આ પ્રેસ રીલીઝમાં જણાવવામાં આવ્યું, “કોઈપણ ગેરકાયદેસર ઇમિગ્રન્ટ્સ જે CBP હોમ નામની એપ દ્વારા સરકારને જાણ કરશે કે તેઓ તેમના દેશમાં પાછા ફરવાની યોજના બનાવી રહ્યા છે, તેમને સુરક્ષા એજન્સીઓ દ્વારા દેશનિકાલની લિસ્ટમાંથી હટાવી દેવામાં આવશે. ટ્રમ્પ વહીવટીતંત્ર આવા લોકોની ધરપકડ કરવાનો અને દેશનિકાલનો આગ્રહ રાખશે નહીં. આ ઉપરાંત, વિભાગ તમારા દેશ સુરક્ષિત પહોંચવા માટે પણ ચૂકવણી કરશે.”
- Advertisement -
ગેરકાયદેસર ઇમિગ્રન્ટ્સ પર સતત કાર્યવાહી
ડિપાર્ટમેન્ટ ઓફ હોમલેન્ડ સિક્યુરિટી સેક્રેટરી ક્રિસ્ટી નોએમે આ વાતની પુષ્ટિ કરી છે. તેમણે કહ્યું કે જો તમે અમેરિકામાં ગેરકાયદેસર રીતે છો, તો ધરપકડથી બચીને જાતે પાછા જવું એ અમેરિકા છોડવાનો શ્રેષ્ઠ, સલામત અને વ્યાજબી રસ્તો છે. ડિપાર્ટમેન્ટ ઓફ હોમલેન્ડ સિક્યુરિટી આવા ગેરકાયદેસર ઇમિગ્રન્ટ્સને CBP હોમ એપ દ્વારા ફંડિંગ આપવાની યોજના ધરાવે છે જેથી મુસાફરી ખર્ચમાં મદદ મળી શકે અને તેમને દેશમાં પાછા ફરવા માટે પૈસા મળી શકે. ટ્રમ્પના મુખ્ય નીતિ અને ગૃહ સુરક્ષા સલાહકાર સ્ટીફન મિલરે X પર આ વાતની પુષ્ટિ કરી છે.
152000 લોકોને કર્યા ડિપોર્ટ
મિલરે કહ્યું કે ટ્રમ્પ વહીવટીતંત્ર ગેરકાયદેસર ઇમિગ્રન્ટ્સ સામે સતત કાર્યવાહી કરી રહ્યું છે. અમેરિકા વિદેશીઓ વિરુદ્ધ જે અભિયાન ચલાવી રહ્યું છે તેના પર મોટા પ્રમાણમાં પૈસા ખર્ચવામાં આવી રહ્યા છે. ટ્રમ્પ અમેરિકાના રાષ્ટ્રપતિ તરીકે 100 દિવસ પૂર્ણ કરી ચુક્યા છે. અત્યાર સુધીમાં, આશરે 152,000 દસ્તાવેજ વગરના ઇમિગ્રન્ટ્સને યુએસમાંથી હાંકી કાઢવામાં આવ્યા છે. ઉલ્લેખનીય છે કે ગયા વર્ષે ફેબ્રુઆરીથી એપ્રિલ દરમિયાન, તત્કાલીન રાષ્ટ્રપતિ બાઇડનના કાર્યકાળ દરમિયાન, 195000 લોકોને ડિપોર્ટ કરવામાં આવ્યા હતા. ટ્રમ્પે લાખો લોકોને ડિપોર્ટ કરવાનું વચન આપ્યું હતું, પરંતુ અત્યાર સુધી આ સંખ્યા બાઇડન વહીવટીતંત્રની સરખામણીમાં ઓછી છે.
રાષ્ટ્રપતિ ડોનાલ્ડ ટ્રમ્પે તેમના ચૂંટણી પ્રચારમાં અમેરિકામાં રહેતા ગેરકાયદેસર ઇમિગ્રન્ટ્સને મુખ્ય મુદ્દો બનાવ્યો હતો. શપથ લીધા પછી તરત જ, તેમણે ગેરકાયદેસર ઇમિગ્રન્ટ્સની ધરપકડ શરૂ કરાવી દીધી હતી. યુએસ વહીવટીતંત્રે ઘણા દેશોના લોકોને વિમાનમાં ભરીને તેમના દેશોમાં છોડી દીધા. પરંતુ ટ્રમ્પ વહીવટીતંત્રનો આ નિર્ણય ખૂબ જ ખર્ચાળ અને સંસાધનોનો બગાડ સાબિત થયો. આના કારણે સરકાર પર દબાણ પણ વધી રહ્યું છે, તેથી ટ્રમ્પ વહીવટીતંત્ર હવે પોતાના ટાર્ગેટને પૂરાં કરવા માટે નવા રસ્તાઓ શોધી રહ્યું છે.
