ખાસ-ખબર સંવાદદાતા
દુનિયા ભરમાં કોરોના સંક્રમણના લાખો કેસો ફરીથી સામે આવી રહ્યાં હોવાથી રસીકરણ અભિયાનને વેગ આપવામાં આવ્યો છે. બ્રાઝીલના રાષ્ટ્રપતિ જાયર વોલ્સોનારોએ વિરોધની વચ્ચે બાળકોનાં રસીકરણને મંજૂરી આપી દીધી છે. શુક્રવારે બ્રાઝીલમાં 5 થી 11 વર્ષના બાળકોનું રસીકરણની શરૂઆત કરી દેવામાં આવ્યું છે. હોસ્પિટલમાં રાજ્યના ગવર્નર જોઆઓ ડોરિયાની ઉપસ્થિતિમાં બાળકોનું રસીકરણ કરવામાં આવ્યું હતું. પહેલી રસી 8 વર્ષના બાળકને આપવામાં આવી હતી.ઉલ્લેખનીય છે કે,બ્રાઝીલમાં અન્ય લોકોનાં રસીકરણની શરૂઆત જાન્યુઆરી 2021માં શરૂ કરવામાં આવી હતી.વિશ્વભરમાં કોરોનાએ કોહરામ મચાવ્યો છે. દિવસેને દિવસે કોરોના દુનિયાના મોટાભાગના દેશોને પોતાના ભરડામાં લઇ રહ્યો છે. સતત કોરોનાનો ફૂંફાડો વધી રહ્યો છે. છેલ્લા 24 કલાકમાં વિશ્વમાં કોરોનાની ઘાતક લહેર ફરી વળી છે. છેલ્લા 24 કલાકમાં વિશ્વમાં ફરી 32 લાખ કેસ નોંધાયા છે.
છેલ્લા 72 કલાકની વાત કરીએ તો આ આંકડો 1 કરોડને પાર પહોંચી ગયો છે. તેવામાં વિશ્વની મહાસત્તા અમેરિકા કોરોનાનો માર સહન કરી રહ્યું છે. દુનિયાના સૌથી વધુ કેસ અમેરિકામાં જ નોંધાયા છે. છેલ્લા 24 કલાકની વાત કરીએ તો અમેરિકામાં 8 લાખથી વધુ લોકો આ ઘાતક વાયરસની ઝપેટમાં આવ્યાં છે. અમેરિકામાં એક્ટિવ કેસનો આંકડો પર 2.22 કરોડ સુધી પહોંચી ગયો છે.
- Advertisement -
યુરોપની વાત કરીએ તો ફ્રાન્સમાં 24 કલાકમાં જ 3.29 લાખ નવા કેસ સામે આવ્યાં છે. અહીં એક્ટિવ કેસનો આંક હવે 45 લાખ થઇ ગયો છે. ઇટાલીમાં 24 કલાકમાં 1.86 લાખ નવા કેસ નોંધાયા છે.