કોઈપણ પ્રકારના રસાયણ વગર ‘સપ્તધાન્ય’ના પ્રયોગથી ફળ-શાકભાજી અને દાણામાં ચમક લાવી શકાય

ફળ અને શાકભાજીમાં ચમક લાવવાનો દેશી ઈલાજ એટલે ‘સપ્તધાન્ય’

ખાસ-ખબર ન્યૂઝ જૂનાગઢ, તા.27

રાજ્યને આગામી પાંચ વર્ષમાં પ્રાકૃતિક કૃષિમાં 100 ટકા પરિવર્તિત કરવા માટે રાજ્ય સરકાર દ્વારા રાજ્યપાલ આચાર્ય દેવવ્રતજીના માર્ગદર્શન અને મુખ્યમંત્રી ભૂપેન્દ્રભાઈ પટેલના નેતૃત્વમાં મિશન મોડમાં પ્રયાસો થઈ રહ્યા છે. પ્રાકૃતિક કૃષિ સમયની માંગ હોવાની સાથે ખેડૂતો અને જમીન માટે પણ યોગ્ય છે. આ પદ્ધતિ દ્વારા કૃષિ કરી રહેલા ખેડૂતોને ખૂબ સારા પરિણામો મળી રહ્યા છે.

પ્રાકૃતિક કૃષિ દ્વારા ઉત્પન્ન થતી પેદાશોને આકર્ષક અને ચમકદાર બનાવવા માટે ખાસ કરીને ફળ અને શાકભાજી અને દાણામાં ચમક લાવવા માટે પણ પ્રાકૃતિક અને બિનખર્ચાળ ઉપાય કરવામાં આવતા હોય, રાજ્યપાલ આચાર્ય દેવવ્રતજીના પ્રાકૃતિક કૃષિ પદ્ધતિના પુસ્તકમાં આ દર્શાવવામાં આવ્યા છે. આ ઉપાયનું નામ ’સપ્તધાન્ય’ છે.સપ્તધાન્ય દ્વારા અલગ અલગ પ્રકારના સહેલાઈથી ઉપલબ્ધ એવા કઠોળ, અનાજ અને દાળના 800 ગ્રામ દાણા દ્વારા એક ચોક્કસ પેસ્ટ બનાવી અને તેનો પ્રયોગ કરી શકાય છે.

સપ્તધાન્ય તૈયાર કરવા માટે તલ, મગ, અડદ, વટાણા, કોફી, મઠ, ચણા અને ઘઉંના દાણાં એમ દરેક 100 ગ્રામની માત્રામાં લેવા જેમાં એક નાની વાટકીમાં તલના 100 ગ્રામ દાણાં લઈ તેમાં એટલા પ્રમાણમાં પાણી નાખો કે જેથી બધા દાણાં પાણીમાં પલળી જાય બે દિવસ બાદ એક મોટી વાટકીમાં 100 ગ્રામ મગના દાણાં, 100 ગ્રામ અડદના દાણાં, 100 ગ્રામ વટાણાના દાણાં, 100 ગ્રામ કોફીના દાણાં, 100 ગ્રામ મઠના દાણાં, 100 ગ્રામ ચણાના દાણાં, 100 ગ્રામ ઘઉંના દાણાં ભેળવો. આ બધાને સારી રીતે ભેળવી તેમાં એટલું પાણી ઉમેરવું કે તેથી તે સારી રીતે પલળી જાય. ત્યારબાદ તેને ઘરમાં રાખો. ત્રણ દિવસ બાદ બધા દાણાંને બહાર કાઢી લો, ત્યારબાદ કપડાની પોટલીમાં આ બધા દાણાંઓને બાંધવા અને તેને અંકુરિત થવા માટે ઘરની અંદર જ રાખવા. જે પાણીમાં દાણા પ્લાળવામાં આવ્યા હતાં તે પાણીને પણ ઢાંકીને રાખો. પોટલીમાં રહેલ દાણામાં જ્યારે 1 સે.મી. લંબાઈના અંકુર બહાર નીકળે ત્યારે પોટલી ખોલવી અને તેની ચટણી બનાવવી હવે 200 લીટર પાણીમાં આ ચટણીને હાથ વડે સારી રીતે ભેળવી અને પહેલાં પલાળેલા પાણીને પણ આમાં ભેળવવું. આ તૈયાર થયેલા મિશ્રણને 2 કલાક સુધી રાખો. બે કલાક બાદ આ મિશ્રણને હલાવી કપડાથી ગાળી લેવું. હવે 48 કલાકની અંદર આનો છંટકાવ કરી દેવો. જ્યાં તેનો છંટકાવ કરેલો હશે ત્યાં ચમક આવી જશે.

પ્રાકૃતિક કૃષિના વિશેષ પાસાઓમાં પ્રાકૃતિક કૃષિ પદ્ધતિમાં 10 ટકા પાણી અને 10 ટકા વીજળીની જરૂરિયાત રહે છે.એનો અર્થ કે ખેડૂતો પોતાની 90 ટકા વીજળી-પાણીની બચત કરી શકે છે. આ પદ્ધતિમાં પાક ઉત્પાદન રાસાયણિક અને સજીવ ખેતી પદ્ધતિથી વધારે થઈ શકે છે. આ ઉત્પાદન ઝેરમુક્ત, ઊંચી ગુણવતાયુક્ત, પૌષ્ટિક અને સ્વાદિષ્ટ હોય છે. આ ગુણવત્તાના કારણે વધુ માંગ હોવાના કારણે સારો ભાવ પણ મેળવી શકાય છે. પ્રાકૃતિક કૃષિનું સૂત્ર છે. ’ગામના પૈસા ગામમાં, શહેરના પૈસા ગામમાં’ આ પાસાઓનો વિચાર કરી ખેડૂતોએ પ્રાકૃતિક કૃષિ અને આધ્યાત્મિક કૃષિ અપનાવવી જોઈએ.