મોરબી જિલ્લામાં સાર્વત્રિક વરસાદ, મેઘરાજાએ અડધાથી બે ઈંચ હેત વરસાવ્યું

વાવણીલાયક વરસાદ થતા ખેડૂતોમાં ખુશીની લહેર, ખેતઓજારો સજાવ્યા

ખાસ-ખબર સંવાદદાતા
સૌરાષ્ટ્રના અનેક જિલ્લાઓમાં છેલ્લા 24 કલાકથી ભારે વરસાદ કહેર મચાવી રહ્યો છે તો બીજી તરફ મેઘરાજા મોરબી જીલ્લા પર હળવું હેત વરસાવી રહ્યા છે જેમાં ગુરુવારે દિવસ દરમિયાન જીલ્લામાં 3 મીમીથી લઈ 29 મીમી સુધી વરસાદ થયો હતો તો રાત્રીના સમયે પણ મેઘસવારી યથાવત રહી હતી.

ગુરુવારે સાંજના 6 વાગ્યાથી સવારે 6 વાગ્યા દરમિયાન ટંકારામાં 4 મીમી, મોરબીમાં મીમી, હળવદમાં 5 મીમી,વાંકાનેરમાં 2 મીમી વરસાદ નોંધાયો હતો જયારે મોરબી શહેરમાં દિવસ દરમિયાન માત્ર 3 મીમી વરસાદ જ થયો હતો ત્યારબાદ મેઘરાજાએ બાકી રહેલી કસર રાત્રે પુરી કરી હોય તેમ 28 મીમી જેટલો વરસાદ વરસી ગયો હતો તો માળીયા મીંયાણામાં દિવસે 29 મીમી અને રાત્રે 21 મીમી મળી 24 કલાકમાં કુલ 50 મીમી જેટલો વરસાદ વરસી ગયો હતો.મોરબી જીલ્લામાં જૂન મહિનો કોરો કટ્ટ રહ્યા બાદ જુલાઈની શરૂઆતથી જ શ્રીકાર વરસાદ વરસતા ખેડૂતોમાં ખુશીની લહેર પ્રસરી ગઈ છે. વરસાદની રાહ જોઈ વાવણી ન કરનાર ખેડૂતોએ હવે તેમના ખેતઓજારો ખેતરો તરફ વાળ્યા છે અને આગામી સમયમાં ખેડૂતો પાકનું વાવેતર કરતા મોરબી જિલ્લામાં ચોમાસુ પાકનું ચિત્ર ઉજળું બને તેવા સંજોગો વર્તાય રહ્યા છે.

જીલ્લાના જળાશયોમાં નવા નીર આવ્યા !
મોરબી જીલ્લાના મોટા ભાગના જળાશયમાં પાણીની આવક થાય તેટલો વરસાદ થયો ન હતો જોકે છેલ્લા 48 કલાકમાં રાજકોટ અને ટંકારા પંથકમાં થયેલા વરસાદથી ડેમી 1 ડેમમાં 1868 ક્યુસેક પાણીની આવક થઈ છે જયારે મોરબી જિલ્લાના ડેમની હાલની સ્થિતિ જોઈએ તો મચ્છુ 1 ડેમમાં 2435 એમસીએફટીની ક્ષમતા સામે 432 એમસીએફટી પાણી છે તો મચ્છુ 2 ડેમમાં 3104 એમસીએફટી સામે 831 એમસીએફટી, મચ્છુ 3 ડેમમાં 283 એમસીએફટી સામે 29.11 એમસીએફટી, ડેમી 1 ડેમમાં 783 એમસીએફટી સામે 112 એમસીએફટી, ડેમી 2 ડેમમાં 753 એમસીએફટી સામે 113 એમસીએફટી, ડેમી 3 ડેમમાં 339 એમસીએફટી સામે 14.13 એમસીએફટી, બ્રાહ્મણી 1 ડેમમાં 2063 એમસીએફટીની ક્ષમતા સામે 82.80 એમસીએફટી, બ્રાહ્મણી 2 ડેમમાં 699 એમસીએફટીની ક્ષમતા સામે 180 એમસીએફટી, ઘોડાધ્રોઈ ડેમમાં 243 એમસીએફટી ક્ષમતા સામે 234 એમસીએફટી જ્યારે બંગાવડી ડેમમાં 130 એમસીએફટીની ક્ષમતા સામે 3.82 એમસીએફટી પાણી ભરાયેલુ છે.