રાજ્યભરમાં સાર્વત્રિક વરસાદ

 78 તાલુકામાં અડધો ઈંચથી માંડી 4.5 ઈંચ વરસાદ નોંધાયો, કુલ 153 તાલુકાને ભીંજવતા મેઘરાજા
અમદાવાદના ધંધુકા અને જામનગરના લાલપુરમાં અઢી ઇંચ વરસાદ
ખાસ-ખબર ન્યૂઝ મુંબઇ, તા.25

ગુજરાતમાં 15 દિવસના અંતરાય બાદ ગઈકાલથી સક્રિય થયેલા ચોમાસાના કારણે આજે સતત બીજા દિવસે રાજ્યમાં 153 તાલુકાઓમાં ભારે ઝાપટાથી માંડી સાડા ચાર ઈંચ જેવો સાર્વત્રિક વરસાદ નોંધાયો હતો અને હજુ પણ વાતાવરણમાં અસહ્ય ગરમી અને બફારો યથાવત રહેતા આગામી ત્રણ દિવસ સારા વરસાદની હવામાન વિભાગ તથા હવામાન નિષ્ણાંતો દ્વારા આગાહી કરવામાં આવી છે. સાથોસાથ અમુક સ્થળે દરિયામાં પણ કરંટ દેખાતો હોય માછીમારોને દરિયો નહીં ખેડવા ચેતવણી આપવામાં આવી છે.હવામાન વિભાગનાં કહેવા મુજબ દક્ષિણ ગુજરાતમાં સકર્યુલર સાઈકલોનિક સિસ્ટમ સક્રિય થયેલ હોવાથી સૌરાષ્ટ્ર અને દક્ષિણ ગુજરાતમાં આગામી ત્રણ દિવસ ભારેથી અતિભારે વરસાદ પડવાની સકયતા છે. સાથોસાથ આગામી છ દિવસ વરસાદી માહોલ જળવાઈ રહેતા ગુજરાતભરમાં છુટોછવાયો સારો વરસાદ પડવાની આગાહી છે. છેલ્લા 24 કલાક દરમિયાન રાજ્યના કુલ 153 તાલુકાઓમાં વરસાદ નોંધાયો છે.

જેમાંથી 78 તાલુકાઓમાં અડધો ઈંચ થી માંડી સાડા ચાર ઈંચ જેવો વરસાદ નોંધાયેલ છે. રાજ્યમાં સૌથી વધુ માતરમા 4.5 ઈંચ, કલોલમાં 3.75, ચુડામાં 3.75, મહેમદાબાદમાં 3.5, ધંધુકામાં 2.75, લાલપુરમાં 2.75, માણસામા 2 ઈંચ, ઓલપાડમાં 2 ઈંચ તેમજ વાલોદ, કલ્યાણપુર, વઘઈ, વ્યારા, દેવગામ, નખત્રાણા, વલસાડ, ભાણવડ, સંખેડા, ઘોઘંબા, કરણજણ, ખેડબ્રહ્મા, બાવડા, ઉમરેઠ, ચોટીલા, બોટાદ, આણંદ, અમદાવાદ, વિરમગામ, નેત્રમ, હાલોલ, નંદોદ, જંબુઘોડા, વિરપુર (મહિસાગર), બાયડ, ડભોઈ, નડિયાદ, ડાંગ-આહવા, ખંભાળીયા, અંકલેશ્ર્વર, દાહોદ, બરવાડા અને ઉમરપાડા મળી કુલ 42 તાલુકામાં 1 ઈંચથી અઢી ઈંચ સુધી વરસાદ નોંધાયેલ છે. ચાલુ વર્ષે ચોમાસાની સૌરાષ્ટ્ર બાદ કચ્છમાં પણ એન્ટ્રી થઈ હોય કચ્છના નખત્રાણામાં ગઈકાલે સાંજે દોઢ ઈંચ જેવો વરસાદ નોંધાયો હતો. જ્યારે કચ્છ જિલ્લાના અમુક વિસ્તારોમાં હળવા ભારે ઝાપટા પડયા હતાં. બીજી તરફ આજે સવારથી પણ અનેક વિસ્તારોમાં વરસાદ ચાલુ હોવાના વાવળ મળી રહ્યાં છે. સવારે છ થી આઠ વાગ્યા સુધીના બે કલાકમાં વડોદરાના ડેસરમાં બે ઈંચ, કલોલમાં દોઢ, સાવલીમાં સવા, જંબુઘોડામાં એક અને કુંકાવાવ-હાલોલ તથા ઘોઘંબામાં અડધો ઈંચ વરસાદ નોંધાયો છે. સવારે પ્રથમ બે કલાકમાં જ રાજ્યના બાવન તાલુકામાં ઝાપટાથી માંડી બે ઈંચ જેવો વરસાદ પડયાનું સ્ટેટ ડિઝાસ્ટર સેલની યાદીમાં જણાવવામાં આવ્યું છે.

ભારે વરસાદની આગાહીને લઈને રાજ્યમાં NDRFની ટીમ તૈનાત
ગીર સોમનાથ, ભાવનગર, દ્વારકા અને નર્મદામાં 1-1 ટીમ

ગુજરાતમાં ચોમાસાને લઈ NDRFની ટીમો તૈનાત કરાઈ છે. જેમાં NDRFની વધુ 4 ટીમોને તૈનાત કરાઈ છે. તેમાં ગીર સોમનાથ, ભાવનગરમાં 1-1 ટીમ તેમજ દ્વારકા અને નર્મદામાં 1-1 ટીમ તથા NDRFની કુલ 7 ટીમો જિલ્લાઓમાં તૈનાત કરાઇ છે. રાજયમાં સાર્વત્રિક વરસાદ મામલે અગમચેતીના ભાગરૂપે આ NDRFની વધુ 4 ટીમો તૈનાત કરાઇ છે. ગીરસોમનાથ, ભાવનગર, દ્વારકા અને નર્મદામાં એક એક ટીમો ડિપ્લોઈડ કરવામાં આવી છે. તેમજ ભુજ, વલસાડ, રાજકોટ પહેલાથી NDRFની ટીમ હાજર છે. જેમાં કુલ સાત ટીમ જિલ્લાઓમાં હાલ સ્ટેંડ ટુ રાખવામાં આવી છે. અગાઉ હવામાન વિભાગની આગાહીને લઈને વલસાડ જિલ્લામાં એક NDRFની ટીમ સ્ટેન્ડબાય કરવામાં આવી હતી. વલસાડ જિલ્લામાં 5 દિવસ ભારે વરસાદની આગાહીને લઈને વલસાડ જિલ્લામાં એક ગઉછઋની ટીમ સ્ટેન્ડબાય રાખવામાં આવી હતી. NDRFની ટીમ દ્વારા વલસાડના લોલેવલના વિસ્તારો તથા તિથલ બીચની મુલાકાત લેવામાં આવી હતી. વલસાડ જિલ્લામાં ઉપરવાસમાં ભારે વરસાદ અને જો લો લેવલના વિસ્તારમાં પાણી ભરાય તો વહેલી તકે NDRF દ્વારા કઈ રીતે ત્યાંના લોકોનું રેસ્ક્યુ કરવામાં આવે એ માટે તમામ લો લેવલના વિસ્તારોની મુલાકાત લેવાઈ હતી અને સાથે ત્યાંના લોકો સાથે વાતચીત કરી પુર સમયે કઈ રીતે જાનમાલ બચાવી શકાય એ માટે માહિતી અપાઈ હતી.

ઉત્તર – મધ્ય ગુજરાતમાં અતિભારે વરસાદની આગાહી
ગુજરાત રાજ્યમાં આજે ભારેથી અતિભારે વરસાદની આગાહી કરવામાં આવી છે. જેમાં ગાજવીજ અને ભારે પવન સાથે વરસાદની આગાહી છે. તેમાં ઉત્તર ગુજરાતમાં અતિભારે વરસાદની આગાહી સાથે મધ્ય ગુજરાતમાં ભારે વરસાદની આગાહી કરવામાં આવી છે. તેમજ સાબરકાંઠા, છોટાઉદેપુર તથા નર્મદા, ડાંગ, તાપી, વલસાડમાં ભારે વરસાદની આગાહી છે. દમણ, દાદરાનગર હવેલી તથા જૂનાગઢ, અમરેલી, ગીર સોમનાથ તેમજ અમદાવાદ, ગાંધીનગરમાં ભારે વરસાદની આગાહી છે. સાથે ખેડા, વડોદરા, પંચમહાલ, ભરૂચમાં ભારે વરસાદની આગાહી કરવામાં આવી છે. રાજ્યના વિવિધ વિસ્તારોમાં ગાજવીજ અને ભારે પાવન સાથે વરસાદ શક્યતા છે. સૌરાષ્ટ્ર અને દક્ષિણ ગુજરાત બાદ હવે મધ્ય ગુજરાતમાં વરસાદી માહોલ જામ્યો છે. અમદાવાદમાં આજે વહેલી સવારથી જ વરસાદી ઝાપટાં પડી રહ્યા છે. બીજી તરફ સૌરાષ્ટ્રના અનેક જિલ્લાઓમાં પણ વરસાદ નોંધાયો છે. હવામાન વિભાગના મતે હજુ છ દિવસ ગુજરાતમાં વરસાદી માહોલ રહેશે. આજથી ત્રણ દિવસ તો મૂશળધાર વરસાદ વરસશે. આજે બનાસકાંઠા, સાબરકાંઠા, અમરેલી, જૂનાગઢ, ગીર સોમનાથ, વલસાડ, ડાંગ, તાપી, નર્મદા અને છોટાઉદેપુરમાં ભારે વરસાદ વરસશે. 26 જૂને અમરેલી, ભાવનગર, ગીર સોમનાથ, પંચમહાલ છોટાઉદેપુરમાં વરસાદની આગાહી કરાઈ છે.