સફેદ વાઘની સંખ્યા 10 થઇ: રાજકોટ ઝૂમાં અત્યાર સુધી કુલ 15 સફેદ વાઘ બાળનો જન્મ થયો છે
ખાસ-ખબર ન્યૂઝ રાજકોટ, તા.29
- Advertisement -
રાજકોટ મહાનગરપાલિકા સંચાલિત રાજકોટ પ્રાણી ઉદ્યાનનો સેન્ટ્રલ ઝૂ ઓથોરેટી ઓફ ઇન્ડીયાના માર્ગદર્શન મુજબ આધુનીક ઢબે વિકાસ કરાતા રાજકોટ ઝૂ હાલ સૌરાષ્ટ્રનાં પ્રવાસીઓ માટે ફરવા માટેનું ખુબ જ ઉત્તમ સ્થળ બની ગયું છે. જાહેર રજા તથા તહેવારોના દિવસો દરમિયાન ઝૂ ખાતે મોટી સંખ્યામાં મુલાકાતીઓ પાર્કની મુલાકાતે પધારતા હોય છે. દર વર્ષે અંદાજિત 7.50 લાખ મુલાકાતીઓ ઝૂની મુલાકાતે પધારતા હોય છે. વન્યપ્રાણી વિનીમય યોજના હેઠળ રાજકોટ ઝૂ દ્વારા ભારતના અન્ય ઝૂ પાસેથી જુદી જુદી પ્રજાતીઓના પ્રાણી-પક્ષીઓ મેળવી ઝૂનો વિકાસ કરવામાં આવે છે ત્યારે આ ઝૂ ખાતે સફેદ વાઘ બાળનો જન્મ થયો છે.
સફેદ વાઘ નર દિવાકર તથા માદા વાઘણ ગાયત્રીના સંવનનથી 105 દિવસના ગર્ભાવસ્થાના અંતે તા. 25-3-2024ના રોજ સાંજના સમયે વાઘ બાળ જીવ-2 (બે)નો જન્મ થયો છે. માતા ગાયત્રી દ્વારા બચ્ચાંઓની પૂરતી કાળજી રાખવામાં આવે છે. હાલ માતા તથા બચ્ચા બંને તંદુરસ્ત છે. ઝૂ વેટરનરી ઓફિસર તથા ટીમ દ્વારા માતા તથા બચ્ચાંઓનું સીસીટીવી દ્વારા રાઉન્ડ ધ કલોક મોનીટરીંગ કરવામાં આવે છે. સફેદ વાઘણ ગાયત્રી દ્વારા અત્યાર સુધીમાં કુલ 12 બચ્ચાંઓનો જન્મ આપી સફળતાપુર્વક ઉછેર કરવામાં આવેલો છે. રાજકોટ ઝૂ ખાતે અત્યાર સુધીમાં કુલ 15 (પંદર) સફેદ વાઘ બાળનો જન્મ થયો છે.
વર્ષ 2014-15 દરમિયાન વન્યપ્રાણી વિનિમય યોજના હેઠળ રાજકોટ ઝૂ દ્વારા મૈત્રી બાગ ઝૂ, ભીલાઈ (છતીસગઢ)ને સિંહ જોડી 1 આપવામાં આવેલ. જેનાં બદલામાં મૈત્રી બાગ ઝૂ, ભીલાઈ દ્વારા રાજકોટ ઝૂને સફેદ વાધ નર દિવાકર, સફેદ વાઘણ યશોધરા તથા સફેદ વાઘણ ગાયત્રી આ5વામાં આવી હતી.
રાજકોટ પ્રાણી ઉદ્યાન ખાતેનું કુદરતી જંગલ સ્વરૂપેનું નૈસર્ગીક વાતાવરણ સફેદ વાઘ તથા એશીયાઇ સિંહોને અનુકુળ આવી જતા સમયાંતરે ખુબ જ સફળતાપૂર્વક સંવર્ધન થઇ રહેલ છે. હાલ ઝૂ ખાતે સફેદ વાઘબાળ 2નો જન્મ થતાં સફેદ વાઘની સંખ્યા 10 થઇ ગઈ છે. જેમાં નર-03, માદા-05 તથા બચ્ચા-02નો સમાવેશ થાય છે. હાલ ઝૂમાં જુદી જુદી 67 પ્રજાતિઓનાં કુલ 564 વન્યપ્રાણી-પક્ષીઓ મુલાકાતીઓ માટે પ્રદર્શિત કરવામાં આવે છે. રાજકોટ પ્રાણી ઉદ્યાનનો આધુનીક ઢબે વિકાસ કરાતા મુલાકાતીઓની સંખ્યામાં પણ નોંધપાત્ર વધારો થયો છે.
રાજકોટ ઝૂ દ્વારા અન્ય ઝૂને આપેલાં સફેદ વાઘની વિગત:
ક્રમ- ઝૂની વિગત વર્ષ સફેદ વાઘની -સંખ્યા
01 -કાંકરીયા ઝૂ, અમદાવાદ -2017-18 વાઘ માદા-01
02 -છતબીર ઝૂ, પંજાબ- 2019-20 સફેદ વાઘ માદા-01
03- રાજીવ ગાંધી ઝૂલોજીકલ પાર્ક, -પૂના 2020-21 વાઘ માદા-01
04- ઇન્દ્રોડા નેચર પાર્ક, ગાંધીનગર -2020-21 વાઘ નર-01, માદા-01
05- ડો.શ્યામાપ્રસાદ મુખર્જી ઝૂલોજીકલ ગાર્ડન,- સુરત 2021-22 વાઘ નર-01, માદા-01
