ખાસ-ખબર સંવાદદાતા
વાંકાનેર-મોરબી વચ્ચે મકનસર નજીક 11 દિવસ પહેલા રેલવે ટ્રેક પ2 ઈંટોનો જથ્થો મૂકી ડેમુ ટ્રેનને ઉથલાવવાનો પ્રયાસ કરવામાં આવ્યો હતો જોકે ટ્રેનના પાયલોટની સમય સૂચકતાથી મોટી ઘટના સહેજમાં અટકી હતી. આ ઘટનામાં રાજકોટ રેલવે પોલીસે ટેકનિકલ અને હ્યુમન સર્વેલન્સના આધારે બે શખ્સોની ધરપકડ કરી છે.
ગત તા. 12 ના રોજ વાંકાનેર – મોરબી વચ્ચે દોડતી ડેમુ ટ્રેન સર્વિસ માટે મોરબી આવી હતી અને બાદમાં રાત્રીના ત્રણ વાગ્યાના અરસામાં ડેમુ ટ્રેનની સર્વિસ થઈ જતા મુસાફર વગરની ખાલી ડેમુ ટ્રેનને વાંકાનેર રેલવે સ્ટેશન જવા માટે રવાના કરવામાં આવી હતી. આ દરમિયાન પોણા ચારેક વાગ્યાના અરસામાં ડેમુ ટ્રેન મકનસર નજીક આવતા ડેમુ ટ્રેનના ચાલક સલીમભાઇ મન્સુરીને રેલવે ટ્રેક પર નડતરરૂપ વસ્તુઓ પડી હોવાનું જોવા મળ્યું હતું જેથી ચાલક સલીમભાઇએ સતર્કતા દાખવી ડેમુ ટ્રેનની ઇમર્જન્સી બ્રેક મારી દીધી હતી જેના કારણે બ્રોડગેજ લાઈનની ટ્રેક પર પડેલા જથ્થા સાથે ડેમુ ટ્રેનનું એન્જિન અથડાઇને ઉભુ રહી ગયું હતું ત્યારબાદ આ ગંભીર ઘટના અંગે સલીમભાઇએ રાજકોટ રેલવે એન્જિનિયર કંટ્રોલ રૂમને જાણ કરી હતી જેથી ધટનાને પગલે અધિકારીઓ દોડી આવ્યા હતા અને ગુન્હો નોંધી આરોપીઓને શોધી કાઢવા તપાસનો ધમધમાટ શરૂ કરવામાં આવ્યો હતો જેમાં રેલવે પોલીસે ટેકનિકલ અને હ્યુમન સર્વેલન્સના આધારે બે આરોપી અકબર ઉર્ફે દાઉદ મોવર મિયાણા (રહે. મિલ પ્લોટ, વાંકાનેર) અને લક્ષમણ મગન ઇશોરા (રહે. ચંદ્રપુર) ની ધરપકડ કરી છે. આ સમગ્ર ઘટના અંગે પોલીસ તપાસમાં સામે આવ્યું છે કે, ઉત્તરપ્રદેશમાં મુખ્યમંત્રી યોગી આદિત્યનાથ દ્વારા પ્રયાગરાજ હિંસાના મુખ્ય આરોપીઓના ઘર પર બુલડોઝર ચલાવવામાં આવ્યા હતા જેથી પ્રયાગરાજ હિંસાની આ ઘટનાનો બદલો લેવા બંને શખ્સોએ ટ્રેન ઉથલાવી નાખવાનું કાવતરું ઘડ્યું હતું.
