ટ્રમ્પે G7 સમિટ વહેલા છોડી, ઈરાનને ક્યારેય પરમાણુ શસ્ત્રો બનાવવા દેવામાં નહીં આવે

G-7 સમિટનું આયોજન કેનેડામાં થઈ રહ્યું છે. સમિટમાં ભાગ લેનારા નેતાઓએ એક સંયુક્ત નિવેદન જારી કરીને તેહરાનને ચેતવણી આપી છે. તેમનું કહેવું છે કે ઈરાનને ક્યારેય પરમાણુ શસ્ત્રો બનાવવા દેવામાં આવશે નહીં. યુએસ રાષ્ટ્રપતિ ડોનાલ્ડ ટ્રમ્પે પણ તેમાં ભાગ લીધો હતો, પરંતુ તેઓ હવે ત્યાંથી નીકળી ગયા છે.

ઇઝરાયલને સમર્થન
G-7 સમિટના ટોચના નેતાઓએ એક નિવેદનમાં કહ્યું, “ઇઝરાયલને પોતાનો બચાવ કરવાનો અધિકાર છે. અમે તેની સુરક્ષા માટે ઇઝરાયલને સમર્થન આપીએ છીએ. તેના નાગરિકોની સલામતી પણ મહત્વપૂર્ણ છે. ઇરાન પ્રાદેશિક અસ્થિરતા અને આતંકનું મુખ્ય કારણ છે. અમે સતત સ્પષ્ટ રહ્યા છીએ કે ઇરાન ક્યારેય પરમાણુ શસ્ત્રો ધરાવી શકે નહીં.”

“ઈરાનનો મુદ્દો ઉકેલાઈ જશે તો શાંતિ આવશે”
અમેરિકાના રાષ્ટ્રપતિ ટ્રમ્પ સહિત તમામ G-7 નેતાઓએ મધ્ય પૂર્વમાં ચાલી રહેલા તણાવ પર પ્રતિક્રિયા આપી હતી. તેમણે કહ્યું હતું કે જો ઈરાનનો મુદ્દો ઉકેલાઈ જાય તો આ ક્ષેત્રમાં તણાવ ઓછો થઈ શકે છે. આમાં ગાઝામાં યુદ્ધવિરામનો પણ સમાવેશ થાય છે. G-7 દેશોએ ઇઝરાયલને ટેકો આપ્યો છે અને કહ્યું છે કે તેને સ્વ-બચાવનો સંપૂર્ણ અધિકાર છે.

G-7 સમિટ માટે PM મોદી કેનેડા પહોંચ્યા
પ્રધાનમંત્રી નરેન્દ્ર મોદી G-7 સમિટમાં ભાગ લેવા માટે કનાઇસ્કીસ પહોંચ્યા છે. એક દાયકામાં મોદીની આ પહેલી કેનેડા મુલાકાત છે. આ સમય દરમિયાન, પીએમ વિશ્વના નેતાઓ સાથે મુલાકાત કરશે અને ઊર્જા સુરક્ષા, ટેકનોલોજી સહિતના મહત્વપૂર્ણ વૈશ્વિક મુદ્દાઓ પર ચર્ચા કરશે.

પ્રધાનમંત્રીની છઠ્ઠી ભાગીદારી
કેનેડાના પ્રધાનમંત્રી માર્ક કાર્નીના આમંત્રણ પર પ્રધાનમંત્રી મોદી સોમવારે સાંજે સાયપ્રસથી કેનેડા પહોંચ્યા હતા. કનાઇસ્કીસમાં આ પરિષદ 16 જૂનથી 17 જૂન સુધી ચાલશે. G-7 સમિટમાં પ્રધાનમંત્રીની આ સતત છઠ્ઠી ભાગીદારી છે.