રાજ્યભરમાં TRB જવાનો હડતાળ પર ઉતર્યા: પગાર વધારાની માગ સાથે વિરોધ

રાજ્યભરમાં ટ્રાફિક વિભાગનું કામ કરતા TRB જવાનો આજથી હડતાળ પર ઉતર્યા છે. પગાર વધારાની માગ સાથે જવાનોએ વિરોધ નોંધાવ્યો

રાજ્યમાં આજથી TRB જવાનો હડતાળ પર ઉતર્યા છે. TRB જવાનો પગાર વધારા સહિતની માગને લઇ આંદોલનના રસ્તે ઉતર્યા છે. TRB જવાનો ફિક્સ પગારને લઇ છેલ્લા અનેક સમયથી પગાર વધારાની માગ કરી રહ્યા હતા.. જો કે સરકાર દ્વારા કોઇ નિર્ણય લેવામાં ન આવતાં આખરે ટ્રાફિક પોલીસ સાથે ફરજ બજાવતા TRB જવાનોએ હડતાળ કરવાનો નિર્ણય લીધો છે.

TRB જવાનોની હડતાળ

મહત્વનું છે કે અગાઉ પણ TRB જવાનોએ પગાર વધારાની માગ કરતાં અનેક કર્મચારીઓને છૂટા કરવાની ચીમકી અપાઇ હતી. જો કે ચૂંટણી સમયે TRB જવાનોને પગાર વધારો આપવાનો પણ વાયદો કરાયો હતો. જો કે સમગ્ર વિવાદને એક વર્ષ થવા છતાં પણ પગાર વધારો ન કરાતાં આખરે TRB જવાનોએ ફરી ઉગ્ર આંદોલન અને હડતાળ યોજવાનું આયોજન કર્યું છે.

TRB જવાનોને રોજના રૂપિયા 300 લેખે મળતા પગારની સામે રૂપિયા 500 પગાર ચૂકવવાની માંગ કરવામાં આવી રહી છે. અત્રે ઉલ્લેખનીય છે કે, અમદાવાદના 1600 TRB જવાનો સહિત રાજ્યભરના 10 હજાર જેટલા TRB જવાનો ટ્રાફિક પોઇન્ટ પર ઊભા નહીં રહે તેમજ તેમ જ નિર્ધારિત કરેલી જગ્યા પર ભેગા થઈને હડતાલ પર ઉતરવાના છે. અમદાવાદમાં પણ ટ્રાફિક TRB જવાનો કલેકટર કચેરીએ આવેદનપત્ર પાઠવી પોતાની માંગણીઓની રજૂઆત કરશે.