રાજકોટ સ્વનિર્ભર શાળા સંચાલક મંડળ દ્વારા નવી એજ્યુકેશન પોલિસી પ્રમાણે ટીચર્સને ટ્રેનિંગ આપવાનું આયોજન કરાયું
ખાસ-ખબર સંવાદદાતા
બદલાતા સમયમાં શિક્ષણ ક્ષેત્રે આવી રહેલા નિરંતર પરિવર્તનો અને રાષ્ટ્રીય શિક્ષણ નીતિ 2020 અંતર્ગત કરવામાં આવેલા સુચનોને ધ્યાનમાં લઇ સ્વનિર્ભર શાળા સંચાલક મંડળ રાજકોટ જિલ્લા દ્વારા તેમની શાળાઓના 1000 થી વધુ શિક્ષકોને તાલીમબદ્ધ કરવા માટે સમગ્ર ગુજરાતભરમાં પ્રથમ વખત નિરંતર ટીચર્સ ટ્રેનીંગ કાર્યક્રમનું આયોજન કરવામાં આવેલ છે. તાજેતરમાં ટીચર્સ ટ્રેનીંગ પ્રોગ્રામ અંતર્ગત બીજા અને ત્રીજા તબક્કામાં હેમુ ગઢવી હોલ તથા એન્જિનિયરિંગ એસોસિએશન હોલ ખાતે વિવિધ ઝોનના પ્રિ-પ્રાયમરી અને પ્રાયમરી વિભાગના 570 શિક્ષકોને તાલીમા આપવામાં આવી હતી.
- Advertisement -
કાર્યક્રમનું ઉદઘાટન જાણીતા શિક્ષણવિદ્ અને કેળવણીકાર ગિજુભાઈ ભરાડ દ્વારા દીપ પ્રાગટ્ય કરીને કરવામાં આવ્યું હતું. આ પ્રસંગે ગિજુભાઈ ભરાડ સાહેબ દ્વારા શિક્ષકોને ખૂબ જ પ્રેરણાદાયી ઉદબોધન કરવામાં આવ્યુ હતું. તેમણે દરેક શિક્ષકોને આજના ઝડપી યુગમાં નિરંતર કંઈક ને કંઈક નવું શીખી અને સજ્જ રહેવા કહ્યું હતું. તેમજ નેશનલ એજ્યુકેશન પોલીસી 2020 મુજબ પ્રવૃતિમય શિક્ષણ કાર્ય કરવા માટે પ્રેરણા આપી હતી. ટ્રેનિંગ કાર્યક્રમના બીજા અને ત્રીજા તબક્કામાં કુલ 570 શિક્ષકોને રાષ્ટ્રીય અને આંતરરાષ્ટ્રીય સ્તરે ખ્યાતિ પ્રાપ્ત અને 20 વર્ષથી પણ વધુ સમયનો શિક્ષણ ક્ષેત્રે શિક્ષકોને તાલીમ આપવાનો અનુભવ ધરાવતા નિષ્ણાત ટ્રેનર શ્રી પરેશભાઈ ભટ્ટ દ્વારા ટ્રેનિંગ આપવામાં આવી હતી.
ટીચર્સ ટ્રેનિંગના સમગ્ર કાર્યક્રમને સફળ બનાવવા મંડળના પ્રમુખ ડી. વી. મહેતા સાહેબની આગેવાનીમાં મહામંત્રી પરિમલભાઈ પરડવા, મહામંત્રી પુષ્કરભાઇ રાવલ, ઉપપ્રમુખ અવધેશભાઈ કાનગડ, ઉપપ્રમુખ સુધીપ ભાઈ મહેતા, કોઠારીયા ઝોન ઉપપ્રમુખ પ્રવીણભાઈ ગોંડલીયા, મવડી ઝોન ઉપપ્રમુખ રાજકુમાર ઉપાધ્યાય, રાણાભાઇ ગોજીયા, રામભાઇ ગરૈયા, શ્રી વિનુભાઈ લોકિલ, શ્રીકાંત તન્ના તેમજ કારોબારી સમિતીનાં સભ્યો દ્વારા જહેમત ઉઠાવવામાં આવી રહી છે.
