ત્રીજી એશિઝ ટેસ્ટ: ઓસ્ટ્રેલિયાના 263 રન સામે ઈંગ્લેન્ડ પ્રથમ ઈનિંગમાં 68/3

ખાસ-ખબર સંવાદદાતા
મિચેલ માર્શના 118 બોલમાં 118 રન છતાં ઓસ્ટ્રેલિયાની પ્રથમ ઈનિંગ ઈંગ્લેન્ડ સામેની ત્રીજી હેડિંગ્લે ટેસ્ટમાં પહેલા જ દિવસે 60.4 ઓવરમાં 263 રનમાં જ સમેટાઈ ગઈ હતી. માર્ક વૂડે પાંચ વિકેટ ઝડપી હતી. જોકે ઈંગ્લેન્ડની શરુઆત પણ સારી રહી નહતી અને તેઓએ પ્રથમ દિવસના અંતે 3 વિકેટે 68 રન નોંધાવ્યા હતા. રુટ 43 બોલમાં 19 અને બેરસ્ટો 19 બોલમાં 1 રને ક્રિઝ પર હતા. પ્રથમ દિવસે કુલ મળીને 13 વિકેટ પડી હતી. નોંધપાત્ર છે કે, ઓસ્ટ્રેલિયા શ્રેણીમાં 2-0થી આગળ છે.

લીડ્સના હેડિંગ્લેમાં ઈંગ્લેન્ડે ટોસ જીતીને પહેલા ઓસ્ટ્રેલિયાને બેટિંગમાં ઉતાર્યું હતુ. ઓસ્ટ્રેલિયાની શરુઆત સારી રહી નહતી. વોર્નર (4), ખ્વાજા (13), લાબુશેન (21) અને 100 મી ટેસ્ટ રમી રહેલો સ્ટીવ સ્મિથ (22) આઉટ થયાં ત્યારે ઓસ્ટ્રેલિયાનો સ્કોર માત્ર 85 રન જ હતો. જોકે હેડ અને ગ્રીનના સ્થાને ટીમમાં પ્રવેશેલા મિશેલ માર્શે બાજી સંભાળી હતી. તેમણે 155 રન જોડતા ટીમની સ્થિતિ સુધારી હતી. જોકે વોક્સે 39 રને રમતાં હેડને આઉટ કરતાં ઓસ્ટ્રેલિયાનો ધબડકો થયો હતો. તેઓ 245/5 થી માત્ર 263માં ઓલઆઉટ થયા હતા. વૂડે 34 રનમાં પાંચ વિકેટ ઝડપી હતી. વોક્સને ત્રણ વિકેટ મળી હતી.

ઈંગ્લેન્ડની શરુઆત પણ સારી રહી નહતી. કમિન્સે ડકેટ (2) અને બ્રૂક (3)ની વિકેટ માત્ર 22ના સ્કોર પર મેળવી હતી. ક્રાવલી અને રુટને સ્કોરને 65 સુધી પહોંચાડ્યો, ત્યારે મિચેલ માર્શે ક્રાવલી (33)ને વોર્નરના હાથે કેચઆઉટ કરાવ્યો હતો. જોકે રુટ અને બેરસ્ટોએ વિકેટ બચાવી રાખી હતી.