‘તમે ગામડાંના ઢોર પકડી ના શકો’ તેમ કહી વિજિલન્સની હાજરીમાં ઢોર છોડાવ્યા

રાષ્ટ્રપતિના રૂટ પરથી પકડેલાં ઢોર છોડાવી જનાર સાત સામે ફરજમાં રુકાવટનો ગુનો
ખાસ-ખબર ન્યૂઝ રાજકોટ

રાજકોટ અમદાવાદ હાઈ-વે પર રાષ્ટ્રપતિનો રૂટ કિલ્યર કરાવવા મનપાની ટીમે પકડેલી ત્રણ ગાય, વાછરડું અને એક આખલાને સ્કોર્પિયોમાં આવેલા છ થી સાત અજાણ્યા શખ્સો વિજિલન્સની હાજરીમાં ઢોર ડબ્બામાંથી પરાણે છોડાવી નાસી જતા ચકચાર મચી જવા પામી છે આ અંગે ફરજમાં રૂકાવટ સહિતની ફરિયાદ નોંધાવવામાં આવી છે.

આજી ડેમ ચોકડી પાસે શ્રીરામ સોસાયટીમાં રહેતાં અને રાજકોટ મહાનગરપાલિકામાં એનિમલ ન્યુસન્સ કંટ્રોલ ડિપાર્ટમેન્ટ શાખામાં લાઈવ સ્ટોક ઈન્સ્પેકટર તરીકે છેલ્લા ચાર વર્ષથી ફરજ બજાવતાં શશીકાંત જગદિશભાઈ નીનામા ઉ.30એ કુવાડવા રોડ પોલીસ મથકમાં અજાણ્યા છ-સાત શખ્સો સામે નોંધાવેલી ફરિયાદમાં જણાવ્યું હતું કે તેની શાખાનું કામ શહેર વિસ્તારમાં રખડતા પશુઓ પકડવાની કામગીરી ઉપરાંત સુપરવિઝન કરવાનું છે રાષ્ટ્રપતિનું રાજકોટમાં આગમન થવાનું હોવાથી તે વીઆઈપી રૂટમાં રખડતાં પશુઓ નડતરરૂપ ન થાય તે માટે બપોરે ઢોર ડબ્બાની જગ્યાથી એક ટ્રેકટર, અર્ટીકા અને અન્ય ત્રણ કારમાં તે તેમજ અન્ય લાઈવસ્ટોક ઈન્સ્પેકટર અંકિતભાઈ ગોહિલ સહિતનો સ્ટાફ અને પાંચેક મજુરો સાથે ગ્રીનલેન્ડ ચોકડી પાસે ગયા હતા મેંગો માર્કેટ હતા ત્યાં ત્રણ ગાય, આખલો અને વાછરડું જોવામાં આવતાં તેને ટ્રેકટરના ડબ્બામાં ભરી રૂટ કિલ્યર કરાવવા ત્યાંથી નીકળી સાત હનુમાન મંદિર તરફ પહોંચ્યા હતા આ સમયે કાળા કલરની સ્કોર્પિયોમાં ધસી આવેલા છ થી સાત અજાણ્યા શખ્સોએ પોતાની તથા સ્ટાફ પાસે આવી તમે ગામડાના ઢોર પકડી ના શકો તેમ કહેતા પોતે મેંગો માર્કેટ પાસેથી આ ઢોર પકડયા છે તેમ જવાબ આપ્યો હતો.

આ સમયે અમુક અજાણ્યા શખ્સો ટ્રેકટરના ડબ્બામાં ચડી ગયા હતા બાદ ઢોરને બાંધેલા દોરડા દાંતરડાથી કાપી નાખી ઢોરને છોડાવી તમામ આરોપીઓ ત્યાંથી જતા રહ્યા હતા હાથમાં દાંતરડા લઈને ધસી આવેલા ટોળાએ રીતસરનો આતંક મચાવ્યો હતો અને વિજિલન્સ સ્ટાફ આ સમગ્ર તમાશો ચૂપ છાપ નિહાળતો રહ્યો હતો.