શટર કે તિજોરી તોડયા વિના હાથફેરો કરનાર કર્મચારી સકંજામાં
ગાંધીગ્રામ પોલીસે મેનેજરની ફરિયાદના આધારે ગુનો નોંધી ભેદ ઉકેલી નાખ્યો
ખાસ-ખબર ન્યૂઝ રાજકોટ, તા.13
રાજકોટ જામનગર રોડ પર વોરા સોસાયટી સામે આવેલ ટ્રાન્સપોર્ટની ઓફિસનું શટર અને તિજોરી તોડયા વિના ચાવીથી ખોલી તસ્કરો રૂ.8.39 લાખની રોકડની ચોરી કરી ગયાની મેનેજરે ફરિયાદ નોંધાવતા ગાંધીગ્રામ પોલીસે ગુનો નોંધી કર્મચારીઓની પૂછતાછ કરી એક શકમંદ કર્મચારીને સકંજામાં લઇને ચોરીનો ભેદ ઉકેલી નાખ્યો છે.
શહેરની માધાપર ચોકડી પાસે શેઠનગર પાસે વર્ધમાન કોમ્પ્લેક્સમાં રહેતા અને માધાપર ચોકડી પાસે વોરા સોસાયટી નજીક મુરલીધર ટ્રાન્સપોર્ટમાં મેનેજર તરીકે છેલ્લા છ વર્ષથી નોકરી કરતા પ્રકાશભાઇ ચંદુભાઇ જોગિયાએ 8.39 લાખની ચોરી અંગે ગાંધીગ્રામ પોલીસ સ્ટેશનમાં અજાણ્યા શખ્સ સામે નોંધાવેલી ફરિયાદમાં જણાવ્યું હતું કે, તા.11ના રોજ રાત્રીના તેનું કામ કરી ઘેર નીકળી ગયો હતો. બાદમાં રાત્રીના સુપરવાઇઝર દીપભાઇએ ઓફિસ લોક કરી હતી.
- Advertisement -
દરમિયાન સવારે ઓફિસે જતો હતો ત્યારે રસ્તામાં એમેઝોનના એમ્પ્લોઇઝ જીતુભાઇનો ફોન આવ્યો હતો અને મને કહ્યું કે, બેંકવાળા રૂપિયા લેવા આવ્યા છે અને તિજોરીમાં રૂપિયા નથી. તમે કોઇને રૂપિયા આપ્યા છે, જેથી તેને ના પાડી હતી અને ઓફિસે પહોંચી તપાસ કરતા તિજોરીમાં કોઇ નુકસાન ન હોય અને તિજોરીમાંથી રૂ.8.39 લાખની રોકડ પણ ગાયબ હોય તેમજ આ તિજોરીમાં ચાવી અને પાસવર્ડ નાખ્યા બાદ તિજોરી ખૂલતી હોવા છતાં કોણ આ ચોરી કરી ગયું. બનાવની માલિક હરેશભાઇ ડાંગરને જાણ કરતા તે પણ ઓફિસે આવી ગયા હોય અને પોલીસમાં જાણ કરી હોવાનું જણાવતા પીઆઇ ખોડુંભા કરપડા સહિતનો સ્ટાફ દોડી ગયો હતો જો કે બનાવ પ્રથમથી જ શંકાસ્પદ હોય અને ઘરના જ કોઈ ઘાતકી હોય તેવી શંકાએ કર્મચારીઓની પૂછતાછ કરતા એક કર્મચારી કમલેશ ઓમપ્રકાશભાઈ પ્રજાપતિએ ચોરી કર્યાની કબૂલાત આપતા પોલીસે તેની અટકાયત કરી તેની પાસેથી ચોરાઉ રોકડ કબજે કરવાની કાર્યવાહી કરી છે.
