મોટા મવા સવન સ્ટેટસ એપાર્ટમેન્ટમાં ‘ત્રણ વાત તમારી, ત્રણ વાત અમારી’ કાર્યક્રમ યોજાયો

મોટા મવા વિસ્તારના રહેવાસીઓના પ્રશ્ર્નોનો ઉકેલ લાવવા બાંહેધરી આપતાં નાયબ પોલીસ કમિશનર
ખાસ-ખબર ન્યૂઝ રાજકોટ, તા.3

ગુજરાત સરકારના કોમ્યુનિટી આઉટરીચ પ્રોગ્રામ અંતર્ગત પોલીસ મહાનિર્દેશક અને મુખ્ય પોલીસ અધિકારી ગુજરાત રાજ્ય ગાંધીનગરના ‘ત્રણ વાત તમારી ત્રણ વાત અમારી’ ઝુંબેશ અંતર્ગત પોલીસ કમિશનર બ્રજેશકુમાર ઝા તથા અધિક પોલીસ કમિશનર મહેન્દ્ર બગરીયાના માર્ગદર્શન હેઠળ ગઈકાલે મોટા મવા સવન સ્ટેટસ એપાર્ટમેન્ટના કોમ્યુનિટી હોલ ખાતે ત્રણ વાત તમારી ત્રણ વાત અમારી કાર્યક્રમનું નાયબ પોલીસ કમિશનર ઝોન-2 જગદીશ બાંગરવા તથા મદદનીશ પોલીસ કમિશનર દક્ષિણ વિભાગ બી. જે. ચૌધરીની હાજરીમાં આયોજન કરવામાં આવ્યું હતું, જેમાં સવન સ્ટેટસ એપાર્ટમેન્ટ તથા મોટા મવા વિસ્તારના આશરે 150 જેટલા રહેવાસીઓ હાજર રહ્યા હતા. જેમાં પોલીસ અને પ્રજા વચ્ચે સમન્વય જળવાય તેમજ વિસ્તારમાં રહેતાં નાગરિકોના પ્રશ્ર્નોનું ત્વરિત અને શાંતિપૂર્ણ નિરાકરણ આવે તેવા હેતુથી સવન સ્ટેટસ એપાર્ટમેન્ટ ખાતે મોટા મવા વિસ્તારમાં રહેતાં નાગરિકોની સમસ્યાઓ અને અપેક્ષાને ધ્યાનમાં રાખીને આ ત્રણ વાત તમારી ત્રણ વાત અમારી કાર્યક્રમમાં મોટા મવા વિસ્તારના રહેવાસી નાગરિકોની ત્રણ વાત સાંભળવામાં આવી હતી. મોટા મવા વિસ્તારમાં આવેલ પાર્ટી પ્લોટમાં લગ્ન પ્રસંગ સમયે તેમજ વિસ્તારમાં આવેલા ઈંટોના ભઠ્ઠાઓમાં કામ કરતાં ઈસમો દ્વારા અવારનવાર મોડી રાત સુધી મોટા અવાજમાં લાઉડ સ્પીકર વગાડવામાં આવતા હોય છે,

જે અંગે પોલીસ તરફથી કાયદેસરની કાર્યવાહી કરી તેના ઉપર કડકાઈથી નિયમોનું પાલન કરાવવા રજૂઆત કરી હતી. મોટા મવા વિસ્તારની આજુબાજુમાં રહેતાં અસામાજિક તત્ત્વો તેમજ ગેરકાયદેસર પ્રવૃત્તિઓ સાથે સંકળાયેલા ઈસમો વિરુદ્ધ કાયદેસરની કાર્યવાહી કરવા, નાના મવા રોડ, ભીમનગર સર્કલ પાસે આવેલા મટન માર્કેટમાં મચ્છી, મટનનું વેચાણ થતું હોય જ્યાં બહુ જ દુર્ગંધ આવતી હોય તેમજ ત્યાં આસપાસના વિસ્તારમાં શાળાઓ પણ આવેલી હોય જેથી બાળકોને શાળાએ લેવા મુકવા જતી વખતે મહિલાઓને મુશ્કેલી પડતી હોય જે બાબતે પોલીસ તરફથી કાયદેસરની કાર્યવાહી કરવા રજૂઆત કરવામાં આવી હતી. પોલીસની ત્રણ વાતોમાં- હાલમાં સાયબર ફ્રોડનું પ્રમાણ વધ્યું હોય જેમાં વધુ પડતો સોશ્યલ મીડિયાનો ઉપયોગ તથા અણસમજ તેમજ લાલચના લીધે નાગરિકોને બહુ મોટી આર્થિક નુકસાની ભોગવવાનો વારો આવતો હોય જેથી આવા બનાવો ન બને તે માટે ફોન ઉપર આવતા કોઈપણ પ્રકારના ઓ.ટી.પી. કોઈને પણ શેર કરવા નહીં’ કે કોઈ અજાણી લીંક તમારા ફોનમાં સીધી જ ખોલી લેવી નહીં તેમજ કોઈ અજાણ્યા નંબર ઉપરથી કોઈપણ સોશ્યલ મીડિયા પ્લેટફોર્મ ઉપર આવતા વિડીયો કોલ ઉપાડી વાતો કરવી નહીં કે જેથી કરીને આવા ફ્રોડના બનાવ ન બને તેમજ આવુ કોઈ સાઈબર ફ્રોડ થાય તો સાયબર ફ્રોડ ટોલ ફ્રી નંબર 1930 ઉપર તુરત જ સંપર્ક કરવા સમજ આપી હતી. સગાવહાલા કે મિત્રોમાં કોઈએ રૂપિયાની જરૂર હોય અને કોઈ પાસેથી રૂપિયા લીધેલા હોય કે જેની પાસે પૈસા વ્યાજે નાણા આપવાનું લાયસન્સ ન હોય અને તે મની લેન્ડીંગ એક્ટના ધારા ધોરણ મુજબ નક્કી થયેલ વ્યાજના દર કરતાં વધુ વ્યાજ લેતા હોય અને રૂપિયા ચૂકવી દેવા છતાં રૂપિયા માટે પઠાણી ઉઘરાણી કરતાં હોય અને પ્લોટ, મકાન કે જમીન લખાવી લેતા હોય કે કોરા ચોક લખાવી લેતા હોય તો તે બાબતે નજીકના પોલીસ સ્ટેશનમાં સંપર્ક કરી પોલીસને આ બાબતે જાણ કરવી અને ફરિયાદ કરવી આમ કાયદાઓ અંગેની સમજ આપવામાં આવી હતી.