દક્ષિણ આફ્રિકામાં કોરોના સંક્રમણની ગતિ ડબલ થઈ
એક સપ્તાહમાં જ 24 દેશોમાં પહોંચી ગયો ઓમિક્રોન
ખાસ-ખબર સંવાદદાતા
દક્ષિણ આફ્રિકામાં કોરોનાના નવા કેસ એક જ દિવસમાં બમણા થઈ ગયા છે. બુધવારે સાંજે અહીં નેશનલ ઇન્સ્ટીટ્યુટ ફોર કમ્યુનિકેબલ ડિસિસેઝે જણાવ્યુ હતું કે છેલ્લા 24 કલાકમાં અહીં 8,561 કેસ નોંધાયા હતા, જ્યારે તેના 24 કલાક પહેલા માત્ર 4,373 કેસ સામે આવ્યા હતા. ત્યારબાદ સરકાર પર દબાણ વધી ગયું છે કે તે વેક્સિન લીધા વિનાના લોકો પર પ્રતિબંધ લગાવવામાં આવે. જેથી વેક્સિન ન લીધેલા લોકો મોટી સંખ્યામાં એક જગ્યા પર એકઠા ન થાય.
આ તરફ આફ્રિકન વિજ્ઞાનિકે ચેતવણી આપી છે કે હાલ તે માની લેવું ઉતાવળભર્યું હશે કે ઓમિક્રોન હળવી બીમારી જ આપશે. વૈજ્ઞાનિકે કહ્યું કે હાલમાં ઓમિક્રોનની સાચી અસરકારકતાની સચોટ માહિતી આપવી
મુશ્કેલ છે.
હાલમાં મોટાભાગની યુવા જનસંખ્યા તેનાથી સંક્રમિત થઈ રહી છે, જે વાયરસ સામે લડવા સક્ષમ છે. એવામાં વાયરસ વડીલોને, બાળકો અને બીમાર લોકો પર કેવી અસર પહોંચાડશે તે બાબતે કોઈ જાણકારી નથી.
- Advertisement -
UN પ્રમુખે કહ્યું- પ્રવાસ પર પ્રતિબંધથી કોરોના અટકશે નહીં
સંયુક્ત રાષ્ટ્રના પ્રમુખ એંટોનિયો ગુટરેસે દુનિયાભરમાં લગાવવામાં આવી રહેલા પ્રવાસ પરના પ્રતિબંધો ખોટા અને બિનઅસરકારક જણાવ્યા છે. તેમણે કહ્યું કે નવો કોરોના વેરિયન્ટ સામે આવ્યા બાદ કેટલાક દેશો અને ક્ષેત્રને ટાર્ગેટ કરવામાં આવી રહ્યા છે. મુસાફરો માટે ટેસ્ટિંગની સુવિધાઓમાં વધારો કરવા બાબતે ભાર આપતા તેમણે કહ્યું કે આ વાયરસની કોઈ મર્યાદા નથી, તેને તમે પ્રવાસ પર પ્રતિબંધો લગાવવાથી નહીં અટકાવી શકો. આફ્રિકામાં થોડા દિવસ પહેલા ઓમિક્રોન વેરિયન્ટ સામે આવ્યો હતો, ત્યારબાદ એક ડઝન કરતાં પણ વધુ દેશોએ દક્ષિણ આફ્રિકાના દેશો પર ટ્રાવેલ પ્રતિબંધ લગાવી દીધા છે.
