ભારત છોડતા નાગરિકો માટે ‘ટેક્સ કલીયરન્સ સર્ટીફીકેટ’ ફરજીયાત

બજેટમાં જોગવાઈ: 1લી ઓકટોબરથી લાગુ થશે: વિદેશી સંપતિની માહિતી ન આપવા બદલ પેનલ્ટીમાં રાહત

ભારતની નાગરિકતા છોડીને વિદેશમાં સ્થાયી થવાનો ટ્રેન્ડ વધી રહ્યો છે અને અનેક કિસ્સામાં કરવેરાની બાકિ રકમ ચુકવ્યા વિના જ લોકો નિકળી જતા હોવાનું બહાર આવ્યાને પગલે કેન્દ્ર સરકારે હવે વિદેશ સ્થાયી થવા જતા લોકો માટે ‘ટેકસ કલીયરન્સ સર્ટીફીકેટ’ ફરજીયાત કર્યું છે.

કેન્દ્ર સરકારના બજેટમાં વિદેશ સ્થાયી થવા જતા લોકો માટે આ આકરી જોગવાઈ દાખલ કરવામાં આવી છે. 1લી ઓકટોબરથી તે લાગુ થશે જે અંતર્ગત ભારત છોડતા લોકો એ ટેકસ કલીયરન્સ સર્ટીફીકેટ મેળવવુ પડશે. કાળાનાણાં કાયદા હેઠળ તેઓની કોઈ જવાબદારી બાકી ન હોવાનું આ પ્રમાણપત્ર લેવુ પડશે.

આ નિયમ હેઠળ આવકવેરા કાયદા ઉપરાંત મિલ્કતવેરા, ગીફટ ટેકસ તથા એકસપેન્ડીચર (ખર્ચ) ટેકસ કાયદાની જોગવાઈઓ પણ લાગુ થશે. નિષ્ણાંતોના કહેવા પ્રમાણે સરકાર વિગતવાર નિયમો જારી કરે ત્યારબાદ ચિત્ર સ્પષ્ટ થશે.

આ સિવાય પણ મહત્વનો એક ફેરફાર એવો પણ છે કે કાળા નાણાં કાયદાની કલમ 42 અને 43 હેઠળ વિદેશી સંપતિની માહિતી જાહેર ન કરવાના સંજોગોમાં 10 લાખની પેનલ્ટી નાબુદ કરવાની દરખાસ્ત છે. જો કે, આ સંપતિની કિંમત 10 લાખથી ઓછી હોવી જોઈએ. આ જોગવાઈ પણ 1લી ઓકટોબરથી લાગુ થશે.

આ જોગવાઈનો એવો અર્થ થાય છે કે, ભારતીય રહેવાસીઓ રિટર્ન ફાઈલ કરતી વખતે વિદેશી સંપતિ અથવા તેના પરથી મેળવેલી આવક દર્શાવવાનું ફરજીયાત છે.

વિદેશી આવક ન દર્શાવે તો 10 લાખની પેનલ્ટીની જોગવાઈ હતી અને તેમાં ગમે તેટલી કિંમતને આવરી લેવામાં આવતી હતી. હવે 20 લાખથી ઓછી કિંમતની વિદેશી સંપતિ હોય તો પેનલ્ટી નાબૂદ થશે.