સ્વાસ્થ્ય સાથે ચેડાં: સુરેન્દ્રનગરમાં બોગસ તબીબોની પ્રેક્ટિસને તંત્રનો પરવાનો ?

ધ્રાંગધ્રા, મૂળી, દસાડા, લખતર ખાતે ધમધમતા બોગસ તબીબોના ક્લિનિક

ખાસ-ખબર ન્યૂઝ  સુરેન્દ્રનગર, તા.23
રાજ્યમાં મોટાભાગના ગ્રામ્ય વિસ્તારોમાં બોગસ ડોક્ટરો પોતાના ક્લિનિક ચલાવતા હોયનું નજરે પડે છે. ત્યારે હાલમાં જ મોરબી જિલ્લા ખાતે એક બાદ એક આશરે પાંચથી વધુ બોગસ તબીબોને ઝડપી પાડ્યા હતા ત્યારે સુરેન્દ્રનગર જિલ્લાના અનેક ગ્રામ્ય વિસ્તારોમાં પણ આ પ્રકારના બોગસ ડોકટરો પોતાના ક્લિનિક ચલાવી ગામડાની અશિક્ષિત પ્રજાને લૂંટી રહ્યા છે. આ બોગસ તબીબો દર્દીઓને મનફાવે તેવી દવાઓ આપે છે અને જ્યારે દર્દીઓને દવાની કોઈ સાઇડ ઇફેક્ટ થાય ત્યારે આ બોગસ તબીબો દર્દીને મોતના મોઢામાં ધકેલી પોતાના હાથ અધ્ધર કરી નાખે છે. સુરેન્દ્રનગર જિલ્લાના મુળી, ધ્રાંગધ્રા, પાટડી, દસાડા, વઢવાણ, લખતર સહિતના ગામોમાં આ પ્રકારના બોગસ ડિકેટરોનો રાફડો ફાટયો છે ત્યારે કોઈના ડર વગર જ દર્દીઓના સ્વાસ્થ્ય સાથે ચેડાં કરતા બોગસ તબીબોને જાણે તંત્રે જ પોતાનું ક્લિનિક ચલાવવાની પરમિશન આપી હોય તેવું હાલ નજરે પડી રહ્યું છે.

ક્યાં તાલુકામાં બોગસ ડૉકટર?

ધ્રાંગધ્રા તાલુકાના જેસડા, એજાર, કંકાવટી, રાજ સીતાપુર, ભેચડા, કલ્યાણપુર જ્યારે મુળીના સરલા અને પાટડીના બજાણા, માલવણ, પીપળી સહિતના ગામોમાં તબીબોના બોગસ ક્લિનિક છે.