ઘર આંગણેથી જ કડક અમલ! હાઈકોર્ટમાં હેલ્મેટ વિના સ્ટાફને પ્રવેશબંધીનો આદેશ

 હેલ્મેટ નિયમનો ભંગ કરનાર સામે ખાતાકીય પગલાની પણ ચેતવણી
ખાસ-ખબર ન્યૂઝ ગાંધીનગર

રાજયમાં માર્ગ અકસ્માતોમાં મોતના વધતા કિસ્સા છતા હેલ્મેટ નિયમનો અસરકારક અમલ કરાવાતો ન હોવાના મામલે ગુજરાત હાઈકોર્ટે સરકારી તંત્રની ઝાટકણી કાઢીને આકરૂ વલણ અપનાવ્યુ જ છે. હવે હાઈકોર્ટ દ્વારા સ્ટાફ માટે હેલ્મેટ પહેરવાનું ફરજીયાત કરતો આદેશ જારી કર્યો છે અને તેમાં ભંગ કરનાર સામે ખાતાકીય પગલા લેવા તથા હાઈકોર્ટ સંકુલમાં પ્રવેશ પ્રતિબંધ જાહેર કરાયો છે.

હેલ્મેટ મામલે ટ્રાફીક પોલીસથી માંડીને સંબંધીત વિભાગોને આકરી કાર્યવાહી કરવાના આદેશ વચ્ચે ગુજરાત હાઈકોર્ટે પોતાના સ્ટાફ સાથે પરિપત્ર ઈસ્યુ કર્યો છે. હાઈકોર્ટમાં ટુ-વ્હીલર લઈને આવતા કર્મચારી-ઓફીસરો માટે હેલ્મેટ પહેરવાનું ફરજીયાત કર્યું છે. આ નિયમનો ભંગ કરનાર સામે ખાતાકીય પગલા લેવાની ચેતવણી આપી છે. હેલ્મેટ વિના ટુ-વ્હીલર હંકારીને આવતા કર્મચારીને હાઈકોર્ટ સંકુલમાં જ પ્રવેશવા ન દેવા પરિપત્રમાં કહેવાયું છે.

ગુજરાત હાઈકોર્ટ દ્વારા આજથી જ આ નિયમ લાગુ કરી દેવામાં આવ્યો છે.અમદાવાદ સહિતનાં શહેરોમાં ટુ-વ્હીલર ચાલકો હેલ્મેટ પહેરતા નથી અને ટ્રાફીક પોલીસ કે સંબંધીત વિભાગ દ્વારા કોઈ કાર્યવાહી પણ થતી ન હોવા વિશે વડી અદાલત કેટલાંક વખતથી સરકાર સામે નારાજગી વ્યકત કરી રહી છે.નિયમ ભંગ બદલ લાયસન્સ સસ્પેન્ડ કરવા સહીતના પગલા સુચવ્યા છે. હેલ્મેટ નિયમનો હાઈકોર્ટમાં જ અસરકારક અમલ થાય તે માટે સ્ટાફ માટે પરિપત્ર ઈસ્યુ કરાયો છે.