પેપરો ચોરાઈ જતાં રાજ્યમાં ધોરણ – 7માની પરીક્ષા રદ

ભરતી પરીક્ષા, કોલેજ અને બોર્ડ પછી હવે પ્રાથમિક સ્કૂલોના પેપર પણ ફૂટ્યા અને તે પણ શિક્ષણ મંત્રીના જિલ્લામાં: ભાવનગર એલસીબી અને ડોગ સ્ક્વોડ સહિતનો પોલીસ કાફલો નેસવડ સ્કૂલમાં તપાસ માટે પહોંચ્યો

ખાસ-ખબર સંવાદદાતા

ગુજરાતમાં અત્યાર સુધી ભરતી પરીક્ષાના પેપરો ફૂટવાની ઘટના સામે આવી હતી જે બાદ થોડા દિવસો પહેલા બોર્ડની પરીક્ષા દરમિયાન બોર્ડના પણ પેપરો ફૂટવાની ઘટના સામે આવી હતી. જે પછી છેલ્લે વીર નર્મદ દક્ષિણ ગુજરાત યુનિવર્સિટીમાં બીકોમના સેમ-6નું ઈકોનોમિક્સનું પેપર પરીક્ષાના એક કલાક પહેલાં ફૂટ્યું હોવાનું પણ સામે આવ્યું હતું. પરંતુ હવે હદ તો ત્યારે થઈ જ્યારે પ્રાથમિક સ્કૂલની પરીક્ષાના પેપર પણ ચોરી થઈ ગયાનું સામે આવી રહ્યું છે. તે પણ ભાવનગર જિલ્લામાં આ ઘટના બની છે જે જિલ્લાની એક બેઠક પરથી ખુદ શિક્ષણ મંત્રી પણ ધારાસભ્ય પદે ચૂંટાઈ આવ્યા છે. ઘટના તળાજા તાલુકાની નેસવડ પ્રાથમિક શાળાની છે જ્યાં ધોરણ 6, 7 અને 8 ની વાર્ષિક પરીક્ષાના પ્રશ્નપત્રો ચોરી થવાની ઘટના સામે આવી છે. પ્રશ્નપત્રોની ચોરી થતાં 22 અને 23 એપ્રિલે યોજાનાર ધોરણ 7ની પરીક્ષા રાજ્યભરમાં રદ કરવામાં આવી છે.

આ બાબતે સ્કૂલના પ્રિન્સિપાલે મોડી રાત્રે પોલીસ ફરિયાદ કરી છે. આ અંગે મળતી માહિતી પ્રમાણે, ભાવનગરના તળાજા તાલુકાની નેસવડ પ્રાથમિક શાળામાંથી તાળા તોડીને રાત્રિના સમયે ધોરણ 6, 7 અને 8ના વાર્ષિક પેપર ચોરી કરવામં આવ્યા છે. સ્કૂલનાં આચાર્યએ તળાજા પોલીસ મથકમાં આ અંગેની ફરિયાદ નોંધાવી છે. જે બાદ ભાવનગર એલ.સી.બી અને એસ.ઓ.જી પોલીસ ડોગ સ્કોડ તેમજ શિક્ષણ વિભાગે તપાસનો ધમધમાટ શરૂ કર્યો છે. શિક્ષણ વિભાગની સૂચના પ્રમાણે, વિદ્યાર્થીઓના વિશાળ હિતમાં આજે તા. 22/4/22 અને આવતીકાલે તા. 23/4/22ના રોજ યોજાનારી પરીક્ષા રદ કરવામાં આવી છે. સોમવારથી રાબેતા મુજબ ધોરણ 7ની પરીક્ષા યોજાશે. અન્ય ધોરણોની પરીક્ષા અગાઉથી આપેલા સમયપત્રક મુજબ ચાલુ રહેશે.

મહત્વનું છે કે આ પહેલા ધોરણ 10ની બોર્ડની પરીક્ષામાં હિન્દીનું પેપર અડધા કલાકમાં ફરતું ગઈ હતું, ત્યારે શિક્ષણ બોર્ડ દ્વારા સ્પષ્ટતા કરવામાં આવી છે કે આને પેપર ફૂટ્યું ન કહેવાય. જો કે તેની સાથે સાથે શિક્ષણ બોર્ડે પેપર ફરતાં થયા મુદ્દે તપાસ હાથ ધરી હતી. ધોરણ 10ના હિન્દીના પેપરમાં પૂછાયેલા સવાલના હાથથી લખાયેલા જવાબ સોશિયલ મીડિયામાં વાયરલ થયા હતાં. પેપરમાં સવાલના સેક્શન પ્રમાણે જવાબો વાયરલ થયાં હતાં. ફેસબુકના જે પેજ પર આ પેપર વાયરલ થયું છે. તેમાં એવું લખ્યું છે કે, ધોરણ 10 નું પેપર પૂરું થવાને હજી અડધા કલાકની વાર છે પણ કોઈ અજાણ્યા નંબર પરથી આ પેપર વોટ્સએપ પર મળ્યું છે. ઘનશ્યામ ચારેલ નામના વ્યક્તિએ પેપર સોલ્વ થયેલા ફોટા સોશિયલ મીડિયા પર મૂકીને ગેરીરીતિ અંગે જણાવ્યું હતું.

પ્રશ્નપત્રો ચોરાતા 22 અને 23 એપ્રિલે યોજાનારી ધોરણ સાતની પરીક્ષા સમગ્ર રાજ્યમાં રદ કરવામાં આવી છે. રાષ્ટ્રીય શૈક્ષિક મહાસંઘના અધ્યક્ષ ભીખાભાઇ જોષીએ કહ્યું કે છેલ્લા ઘણા સમયથી આ સિલસિલો શરૂ થયો છે. આ પ્રકારની ઘટના રાજ્ય માટે કલંક સમાન છે. ગુજરાત જેવા રાજ્યમાં આ પ્રકારની ઘટના દુ:ખદ છે.ભાવનગરના જિલ્લા પ્રાથમિક શિક્ષણાધિકારી કિશોર મિયાણીએ કહ્યું કે નેસવડ સ્કૂલમાંથી અસામાજિક તત્વોએ પ્રશ્નપત્રોની ચોરી કરી છે. અસામાજિક તત્વોનો બદઇરાદો હોય તેવું જાણવા મળી રહ્યુ છે.

ભાવનગર એસપીએ કહ્યું કે સમગ્ર મામલે પોલીસ તપાસ કરવામાં આવી રહી છે. પ્રાથમિક શિક્ષક સંઘના અધ્યક્ષ દિગ્વિજયસિંહ જાડેજાએ કહ્યું કે વિભાગે તાત્કાલિક નિર્ણય લઇને તમામ જિલ્લાને વાકેફ કયા છે. પ્રાથમિક શાળામાં ચોરીની ઘટના દુ:ખદ છે.