એસ.ટી. તંત્રની મનમાનીથી 10 ગામના લોકો હેરાન

આંકોલવાડી-ભાવનગર રૂટની બસ અચાનક વહેલી કરી નખાતાં રોષ
ખાસ-ખબર ન્યૂઝ તાલાલા, તા.31

તાલાલા તાલુકાના ગીરના જંગલમાં આવેલ વાડલા ગીર ગામે નાઈટ હોલ્ટ કરતી આંકોલવાડી ગીર-ભાવનગર એસ.ટી બસના સમયપત્રકમાં કોઈપણ જાતની જાહેરાત વગર એસ.ટી વિભાગે અચાનક ફેરફાર કરી નાખતા આંકોલવાડી ગીર વિસ્તારના 10 ગામની મુસાફરી કરતી જનતા હેરાન પરેશાન થઈ ગઈ છે.

આંકોલવાડી ગીર-ભાવનગર એસ.ટી બસ વાડલા ગીર ગામે નાઈટ હોલ્ટ કરી વહેલી સવારે 5.15 વાગે ઉપડી આંકોલવાડી ગીર આવતી હતી.આ એસ.ટી બસ આંકોલવાડી ગીર ગામે થી ઉપડી 5:30 વાગ્યે ભાવનગર જતીહતી. છેલ્લા ત્રણ ચાર દિવસ થી આ એસ.ટી બસ વાડલા ગીર ગામેથી વહેલી સવારે 4.30 વાગે ઉપડી આંકોલવાડી ગીરથી 4.45 કલાકે ભાવનગર જવા જતી રહે છે. આંકોલવાડી ગીર-ભાવનગર એસ.ટી બસના સમયપત્રકમાં એસટી સત્તાવાળાએ મનસ્વી રીતે ફેરફાર કરી નાખતા ભાવનગર તરફ જતા અનેક ગામના મુસાફરો રઝળી પડ્યા છે. એસ.ટી સત્તાવાળાની મનમાની સામે આંકોલવાડી ગીર વિસ્તારમાં ભારે રોષ જોવા મળે છે.