દૂકાનની અગાસી પરનો દરવાજો તોડીને ચોર અંદર ઘૂસ્યા’તા
1.93 લાખની તસ્કરી કરી, સમગ્ર ઘટના CCTVમાં કેદ
રાજકોટ શહેરના ગોંડલ રોડ ચોકથી આગળ માલધારી હોટેલ નજીક આવેલા એ.સી.ના શો રૂમમાં અને બાજુની ઓટો મોબાઇલની દૂકાનમાં PPE કીટ પહેરીને ત્રાટકેલા તસ્કરોએ 1.93 લાખની રોકડ ચોરી કરી હતી. જે સમગ્ર ઘટનાના CCTV ફૂટેજ પણ સામે આવ્યા છે. જેના આધારે પોલીસે ગુનો નોંધી તપાસ હાથ ધરી છે.
આ બનાવમાં રાજકોટ આજીડેમ પોલીસે જલારામ-3 શ્રીજીનગર સોસાયટી મેઇન રોડ અંજની ટાવરવાળી શેરીમાં પિત્રૃ આશિષ ખાતે રહેતાં અને ગોંડલ રોડ ચોકડી નજીક માલધારી હોટેલ પાસે પાર્થ એન્ટરપ્રાઇઝ નામે એ.સી.નો શો રૂમ ધરાવતાં મિતુલભાઇ જીવરાજભાઇ વઘાસીયા (ઉ.44)ની ફરિયાદ પરથી ચોરીનો ગુનો નોંધ્યો છે. મિતુલભાઇ સાથે આ શો રૂમમાં નિરજભાઇ ગીરધરભાઇ ગોધાણી પાર્ટનર છે.
- Advertisement -
મિતુલભાઇએ કહ્યું હતું કે ગત 7 ફેબ્રુઆરીના રોજ સાંજે સાડા સાતેક વાગ્યે અમે અમારો શો રૂમ બંધ કર્યો હતો અને ઘરે ગયા હતાં. 8 ફેબ્રુઆરીએ સવારે સંજય ઓટો મોબાઇલવાળા પિયુષભાઇ મગનભાઇ પટેલે મેને ફોન કરી વાત કરી હતી કે આપણી બંનેની દૂકાનમાં ચોરી થઇ છે. આથી હું તરત શો રૂમ ખાતે પહોંચ્યો હતો. તપાસ કરતાં ખબર પડી હતી કે મારા શો રૂમના ધાબા પરના દરવાજો તોડી અંદરનો આગળીયો ખોલી દરવાજેથી ચોર અંદર આવ્યા હતાં. શો રૂમના પહેલા માળે આવેલા ઓફિસના ટેબલના ખાનાના લોક તોડી તસ્કરો અંદરથી રૂા.1,93,500ની રોકડ ચોરી ગયા હતાં.
