રાજકોટના રેલનગરમાં ફરી તસ્કરોનો તરખાટ, બંધ મકાનનાં તાળાં તોડી 9 લાખની ચોરી

પરિવાર લગ્નમાં ગયા બાદ તસ્કરોએ નિશાન બનાવ્યું
ખાસ-ખબર સંવાદદાતા
રાજકોટના રેલનગરમાં પખવાડિયા પૂર્વે બે મકાનમાંથી ચોરી થયાની ઘટના પોલીસ ચોપડે નોંધાઈ હતી જે હજુ પણ અનડિટેકત છે ત્યાં વધુ એક મકાનમાંથી 9 લાખની મતાની ચોરી થઈ જતા ચકચાર મચી જવા પામી છે.
પોલીસ સૂત્રોમાંથી પ્રાપ્ત વિગત મુજબ શહેરના રેલનગરમાં અંડરબ્રિજ પાસે આવેલ સાઈબાબા સોસાયટીમાં શેરી નંબર 4માં રહેતા અને દવાની એજન્સીમાં કામ કરતાં પરેશભાઈ સહિતના પરિવારજનો પરિવારમાં લગ્ન પ્રસંગ હોય તાળું મારી પ્રસંગમાં ગયા હતા સવારે આવીને જોતાં ઘરના તાળા તૂટેલા જોવા મળ્યા હતા અને ઘરનો સામાન પણ વેરવિખેર જોવા મળ્યો હતો ઘરમાં ચોરી થઈ હોવાની શંકાએ તુરંત કંટ્રોલમાં જાણ કરતાં પ્રનગર, ક્રાઇમ બ્રાન્ચ, એસઓજી સહિતનો પોલીસ કાફલો દોડી ગયો હતો અને તપાસ કરતાં ઘરમાંથી રોકડ, દાગીના સહિત 9 લાખ રૂપિયાની મતા ચોરી થઈ ગઈ હોવાનું જાણવા મળતા ફરિયાદ નોંધવા તજવીજ હાથ ધરી હતી પોલીસે સીસીટીવી ફૂટેજ મેળવવા તજવીજ હાથ ધરી છે જો કે અંડરબ્રિજ પાસે રેલવે ટ્રેક ક્રોસ કરતાં જ અવાવરુ બાવળ જેવો વિસ્તાર આવી જતો હોવાથી અને તે તરફ કોઈ સીસીટીવી પણ ન હોવાથી તસ્કરો તે દિશા તરફથી આવ્યા હોવાનું અને તે તરફ જ ભાગી ગયા હોવાની શંકાએ પોલીસે તપાસ હાથ ધરી છે.