કચ્છની ગળપાદર જેલમાં છ કેદીઓ દારૂ પીધેલી હાલતમાં ઝડપાયા !

ગળપાદર જેલના ઈન્ચાર્જ અધિક્ષક સહિત પાંચને ફરજ મોકૂફ કરાયા

 બેરેકમાં ઝડતી કરતાં 4 મોબાઇલ અને દારૂની બોટલ મળી
ખાસ-ખબર ન્યૂઝ રાજકોટ

પૂર્વ કચ્છ પોલીસ દ્વારા કચ્છની ગળપાદર જિલ્લા જેલમાં સરપ્રાઈઝ ચેકીંગ હાથ ધર્યું હતું. જેમાં છ કેદીઓ દારૂ પીધેલી હાલતમાં મળી આવ્યા હતા. જ્યારે સ્થળ ઉપરથી દારૂની બોટલ, મોબાઈલ ફોન અને રોકડ રકમ પણ મળી આવી હતી. આ પોલીસ રેડના live દૃશ્યો સામે આવતા સમગ્ર પંથકમાં ચકચાર મચી જવા પામી છે.
ઉલ્લેખનીય છે કે થોડા સમય પહેલાં લેડી કેન્સ્ટેબલ સાથે ઝડપાયેલો બુટલેગર યુવરાજસિંહ રાજેન્દ્રસિંહ જાડેજા પણ આજ જેલમાં હતો, જે પીધેલી હાલતમાં મળી આવ્યો હતો.

પૂર્વ કચ્છ જિલ્લા પોલીસ દ્વારા ગળપાદર જિલ્લા જેલ ખાતે ગત રાત્રિ દરમ્યાન સરપ્રાઇઝ ઝડતી-તપાસ ચેકીંગ હાથ ધરાઈ હતી. જેમાં દારૂ પીધેલી હાલત 6 કેદીઓ મળી આવ્યા હતા. સાથે ગેરકાયદે મોબાઇલ ફોન, રોકડ રકમ મળી આવતાં પોલીસે પ્રોહીબીશન એક્ટ તળે ગુનો રજીસ્ટર કરી કેદીઓ વિરૂદ્ધ કાયદેસરની કાર્યવાહી હાથ ધરી હતી. ઉલ્લેખનીય છે કે, પોલીસ મહાનિરીક્ષક ચિરાગ કોરડીયા, સરહદી રેન્જ, કચ્છ-ભૂજની સૂચના અને માર્ગદર્શન હેઠળ પોલીસ અધિક્ષક, સાગર બાગમાર, પૂર્વ-કચ્છ, ગાંધીધામની આગેવાનીમાં કઈઇ, જઘૠ, ગાંધીધામ એ ડિવિઝન, ગાંધીધામ બી ડિવિઝન, આદીપુર પોલીસ સ્ટેશનના અધિકારી તથા કર્મચારીઓની અલગ-અલગ ટીમો બનાવી ગળપાદર જિલ્લા જેલ ખાતે રાત્રિ દરમ્યાન અલગ-અલગ બેરેકોવાઇઝ સરપ્રાઇઝ તપાસ ચેકીંગ હાથ ધરાયું હતું.

આ સરપ્રાઈઝ ચેકિંગમાં બેરેકોમાંથી આરોપીઓ કેફીપીણું પીધેલી હાલતમાં તેમજ મોબાઇલ ફોનનો ઉપયોગ કરતાં મળી આવ્યા હતા તેમજ તેમની પાસેથી રોકડ રકમ 50 હજાર પણ મળી આવી હતી. આ ઉપરાંત જેલની હાઇ સિક્યુરીટી બેરેકની છત ઉપરથી 500ના દરની નોટ નંગ-100, કુલ રૂ.50,000 તથા ચાર્જર નંગ-1 કિંમત રૂપિયા 100 મળી આવ્યા હતા. જે તમામ મુદ્દામાલ કબજે લઇ હાલ આરોપીઓ વિરૂદ્ધ ધોરણસર કાર્યવાહી કરવામાં આવી છે.

આ અંગે પોલીસે આપેલી માહિતી મુજબ, મનોજ ઉર્ફે પકાડો કાનજીભાઈ માતંગ (ઉં.વ.28, રહે.જૂની સુંદરપુરી, ગાંધીધામ), રોહિત ગોવિંદભાઈ ગરવા (મારાજ) (ઉં.વ.30 રહે.કાર્ગો ઝુપડા, બાપા સીતારામનગર, ગાંધીધામ), શિવભદ્રસિંહ સુખદેવસિંહ જાડેજા (ઉં.વ.32 રહે.નવી મોટી ચીરઈ તા.ભચાઉ), ગોવિંદભાઈ હરજીભાઈ મહેશ્વરી (ઉં.વ.27 રહે.મ.નં.106 મહેશ્વરીનગર, ગાંધીધામ), યુવરાજસિંહ રાજેન્દ્રસિંહ જાડેજા (ઉં.વ.30 રહે.જૂની મોટી ચીરઈ, તા.ગાંધીધામ), રોહિતસંગ ઉર્ફે સોનુ રામપ્રસાદસંગ ઠાકુર (ઉં.વ.27 રહે.દર્શનગર સોસાયટી, અયોધ્યા, જિ.અયોધ્યા ઉ.પ્ર) આ તમામ (હાલ રહે. પુરૂષ યાર્ડ, બેરેક નં.1, ગળપાદર જેલ, ગાંધીધામ)ને દારૂ પીધેલી હાલતમાં પકડ્યા હતા. આ છ કેદીઓ વિરૂદ્ધ કેફી પીણું પીવા સબબ પ્રોહી કલમ-66(1)(ઇ) મુજબ અલગ-અલગ ગુનાઓ દાખલ કરાવવામાં આવ્યા છે.પૂર્વ કચ્છ પોલીસ વિભાગ દ્વારા ગળપાદર જેલ ખાતે કરેલ સરપ્રાઈઝ ચેકિંગમાં છ કેદીઓ કેફી પદાર્થ પીધેલી હાલતમાં મળી આવ્યા હતા. મોબાઇલ ફોન, દારૂની બોટલ સહિતનો મુદ્દામાલ કબ્જે કરી કાયદેસરની ફરિયાદ નોંધાઈ હતી.

આ દરમિયાન જેલના ઈન્ચાર્જ સુપ્રિટેન્ડન્ટ સહિત પાંચ કર્મચારીઓને ફરજ મોકૂફ કરવામાં આવ્યા છે. આ અંગે મળતી વિગતો મુજબ ગળપાદર જેલના ઈન્ચાર્જ સુપ્રિટેન્ડન્ટ એલ.વી.પરમાર, સુબેદાર આર.એસ.દેવડા તેમજ હવાલદાર પીન્કેશ સી.પટેલ સિપાઈ રવિન્દ્રભાઇ ડી.મુળીયા અને શૈલેષભાઇ બી.ખેતરીયાને ફરજ મોકૂફ કરાયા હતા.