મેયર, ડે.મેયર સહિતના પદ માટે સેન્સ પ્રક્રિયા શરૂ: બાયોડેટા પ્રદેશમાં મોકલાશે

પ્રદેશ ઉપાધ્યક્ષ જયંતીભાઈ કવાડીયા, જૂનાગઢના પૂર્વ મેયર આદ્યશક્તિ મજમુદાર અને બોટાદ જિલ્લા પ્રભારી બ્રિજરાજસિંહ ઝાલા સેન્સ લેવા પહોંચ્યા

ખાસ-ખબર સંવાદદાતા
રાજકોટ મહાનગરપાલિકાના મેયર, ડેપ્યુટી મેયર અને સ્ટેન્ડિંગ કમિટીના ચેરમેન માટેની પસંદગી માટે સેન્સ પ્રક્રિયા શરૂ કરવામાં આવી છે. જેમાં આજે પ્રદેશ ઉપાધ્યક્ષ જયંતીભાઈ કવાડીયા, જૂનાગઢના પૂર્વ મેયર આદ્યશક્તિ મજમુદાર અને બોટાદ જિલ્લા પ્રભારી બ્રિજરાજસિંહ ઝાલા સેન્સ લેવા પહોંચ્યા હતા. આજે રાજકોટના પદાધિકારીઓ અને નગરસેવકો સેન્સ આપવા પહોંચ્યા હતા. જેમાં વોર્ડ વાઇઝ તેમજ પર્સનલ મિટિંગ કરી નિરીક્ષકો સમક્ષ બાયોડેટા સાથે સેન્સ આપી હતી.

રાજકોટમાં કમલમ ખાતે પ્રદેશ નેતાગીરી દ્વારા અપેક્ષીતો પાસેથી તેમજ દાવેદારો પાસેથી મેયર, ડે. મેયર અને સ્ટેન્ડિંગ ચેરમેન અંગે સેન્સ લેવામાં આવી છે. રાજકોટના નગરસેવકો તેમજ અન્ય અપેક્ષિત પદાધિકારીઓ અને જન પ્રતિનિધિઓ પોતાની સેન્સ આપીને નવા પદાધિકારી ચૂંટવા અંગે સંગઠનના હોદ્દેદારોને સાંભળીને નિરીક્ષકોને વિગતો આપશે.

રિપોર્ટ પ્રદેશ મવડી મંડળને મોકલાશે
પ્રદેશના ઉપાધ્યક્ષ અને રાજકોટ મહાનગરના નિરીક્ષક જયંતીભાઇ કવાડીયાએ જણાવ્યું હતું કે, આજે રાજકોટ મનપાના મેયર, ડેપ્યુટી મેયર અને સ્ટેન્ડિંગ ચેરમેન માટે સેન્સ લેવા અમે આવ્યા છીએ. પદાધિકારીઓ, નગરસેવકો તેમજ અપેક્ષિતોને સાંભળી બાદમાં રિપોર્ટ પ્રદેશ મવડી મંડળને મોકલવામાં આવશે. જે બાદ પ્રદેશ દ્વારા ફાઇનલ નામોની યાદી તૈયાર કરી મોકલવામાં આવશે.