ટ્રમ્પ અને પાકિસ્તાની સેના પ્રમુખ મુનીરની ગુપ્ત બેઠક મુનીરે ટ્રમ્પને નોબેલ શાંતિ પુરસ્કાર માટે ભલામણ કરી

ખાસ-ખબર ન્યૂઝ વોશિંગ્ટન, તા.20
અમેરિકાના રાષ્ટ્રપતિ ડોનાલ્ડ ટ્રમ્પે બુધવારે વ્હાઇટ હાઉસ ખાતે પાકિસ્તાનના આર્મી ચીફ જનરલ અસીમ મુનીર સાથે બંધ બારણે મુલાકાત કરી હતી. બંનેએ વ્હાઇટ હાઉસના કેબિનેટ રૂમમાં સાથે લંચ કર્યું હતું. આ પહેલી વાર છે જ્યારે કોઈ અમેરિકન રાષ્ટ્રપતિએ પાકિસ્તાનના આર્મી ચીફનું સ્વાગત કર્યું હોય. આ મુલાકાત મુનીરના ટ્રમ્પ માટે નોબેલ શાંતિ પુરસ્કારની માંગણીના નિવેદન બાદ થઈ હતી. વ્હાઇટ હાઉસના પ્રવક્તા અન્ના કેલીએ જણાવ્યું હતું કે મુનીરે મે મહિનામાં ભારત અને પાકિસ્તાન વચ્ચેના સંઘર્ષને રોકવા માટે ટ્રમ્પને શ્રેય આપ્યો છે. તેમના નિવેદનના સન્માનમાં ટ્રમ્પે તેમને લંચ માટે આમંત્રણ આપ્યું હતું.

અસીમ મુનીર હાલમાં અમેરિકાના પ્રવાસે છે. ટ્રમ્પ સાથેની મુલાકાતના થોડા કલાકો પહેલા વડાપ્રધાન નરેન્દ્ર મોદીએ અમેરિકન રાષ્ટ્રપતિ સાથે 35 મિનિટની ફોન વાતચીત કરી હતી. આ દરમિયાન, મોદીએ સ્પષ્ટપણે કહ્યું હતું કે 7 થી 10 મે સુધી ચાલેલા ઓપરેશન સિંદૂર પછી ભારતીય અને પાકિસ્તાની સેનાઓ વચ્ચેની વાતચીત પછી યુદ્ધવિરામ થયો હતો. કોઈ બાહ્ય મધ્યસ્થી દ્વારા નહીં. મુનીરને મળ્યા પછી ટ્રમ્પે વ્હાઇટ હાઉસના લોનમાં મીડિયા સાથે વાત કરી. તેમણે કહ્યું, ’આ માણસે પાકિસ્તાન તરફથી (ભારત-પાકિસ્તાન યુદ્ધ) રોકવામાં મહત્વપૂર્ણ ભૂમિકા ભજવી હતી.’ ટ્રમ્પે કહ્યું કે તેમણે મુનીર સાથે ઈરાન-ઇઝરાયલ સંઘર્ષ પર પણ ચર્ચા કરી. મુનીરને મળતા પહેલા જ ટ્રમ્પે મીડિયા સાથે વાત કરી હતી. પછી તેમણે કહ્યું, ’મેં તેમને (મુનીરને) અહીં બોલાવ્યા છે કારણ કે હું ભારત સાથે યુદ્ધ ન કરવા બદલ તેમનો આભાર માનવા માગુ છું. હું ભારતના વડાપ્રધાન નરેન્દ્ર મોદીનો પણ આભાર માનવા માગુ છું, જેઓ થોડા દિવસ પહેલા અહીંથી રવાના થયા હતા.’
ટ્રમ્પે કહ્યું, ’અમે ભારત અને પાકિસ્તાન સાથે વેપાર કરાર પર કામ કરી રહ્યા છીએ. આ બે ખૂબ જ સ્માર્ટ લોકો (પીએમ મોદી અને અસીમ મુનીર) એ પરમાણુ યુદ્ધમાં ફેરવાઈ શકે તેવા મુકાબલાને રોકવાનો નિર્ણય કર્યો. પાકિસ્તાન અને ભારત બે મોટી પરમાણુ શક્તિઓ છે.’

આ પહેલા મુનીરે મંગળવારે વોશિંગ્ટનમાં પાકિસ્તાની સમુદાયને સંબોધિત કર્યો હતો. આ દરમિયાન તેમણે કહ્યું હતું કે- ભારત પહેલગામ હુમલા માટે પાકિસ્તાનને દોષી ઠેરવીને સરહદનું ઉલ્લંઘન કરી રહ્યું છે. અમે શહીદી સ્વીકારીશું, પણ અપમાન નહીં.

મુનીરે ઈરાન-ઇઝરાયલ યુદ્ધનો અંત લાવવાની હિમાયત કરી અને અમેરિકા સાથે આતંકવાદ વિરોધી ભાગીદારીની પ્રશંસા કરી. જોકે, પાકિસ્તાનીઓને સંબોધતી વખતે તેમને વિરોધનો સામનો કરવો પડ્યો. અમેરિકન-પાકિસ્તાની નાગરિકોએ મુનીર વિરુદ્ધ સૂત્રોચ્ચાર કર્યા, તેમને સરમુખત્યાર અને ખૂની ગણાવ્યા.
વિદેશ બાબતોના નિષ્ણાત અને કિંગ્સ કોલેજ લંડનના પ્રોફેસર હર્ષ વી. પંત કહે છે કે પાકિસ્તાનના લશ્ર્કરી શાસક મુનીરને મળીને રાષ્ટ્રપતિ ટ્રમ્પે સ્વીકાર્યું છે કે મુનીર જ વાસ્તવિક શાસક છે. લંચ કરીને મુનીર સાથે વાત કરવી, જેના પર ભારતે પહેલગામ હુમલાનો આરોપ લગાવ્યો છે, તે ટ્રમ્પ તરફથી એક ચાલાક કૃત્યથી ઓછું નથી.
હર્ષે કહ્યું કે ટ્રમ્પ-મુનીર બેઠકને ફક્ત ઇઝરાયલ-ઈરાન યુદ્ધના દૃષ્ટિકોણથી જોવી જોઈએ નહીં. ટ્રમ્પ-મુનીર ખાસ કરીને મહત્વપૂર્ણ ખનિજો, ક્રિપ્ટો પર જોડાયેલા છે. ટ્રમ્પ આ બધા મુદ્દાઓમાં વ્યક્તિગત રીતે રસ ધરાવે છે. બેઠકનું એક કારણ પાકિસ્તાનમાં અમેરિકન લશ્ર્કરી થાણું સ્થાપિત કરવાનું પણ હોઈ શકે છે.