-ગુજરાત સરકારે સુપ્રીમ કોર્ટમાં અપીલ કરી હતી
સુપ્રીમ કોર્ટે બુધવારે એલોપેથી અને આયુર્વેદ ડોક્ટરના પગારના મુદ્દા પર મોટી ટિપ્પણી કરી હતી. સુપ્રીમ કોર્ટે કહ્યું કે આયુર્વેદિક ડોક્ટરોને એલોપેથિક ડોક્ટરો જેટલો જ પગાર અને સુવિધાઓનો હકદાર ગણી શકાય નહીં. આ ટિપ્પણી સાથે સુપ્રીમ કોર્ટે 2012માં ગુજરાત હાઈકોર્ટના આ નિર્ણય સામે રાજ્ય સરકારની અપીલ સ્વીકારી લીધી છે. હાઈકોર્ટે રાજ્ય સરકાર દ્વારા નિયુક્ત કરાયેલા આયુર્વેદિક ડોક્ટરોને પણ સરકારી એલોપેથી ડોકટરો જેટલો જ પગાર અને અન્ય સુવિધાઓનો હકદાર ગણાવ્યો હતો. સુપ્રીમ કોર્ટની ખંડપીઠે કહ્યું છે કે અમે એવું બિલકુલ નથી કહી રહ્યા કે આયુર્વેદિક ડોક્ટરોનું કામ ઓછું મહત્વનું છે.
- Advertisement -
શું ક્હ્યું સુપ્રીમ કોર્ટે ?
સુપ્રીમ કોર્ટે કહ્યું કે ડોક્ટરોની બંને શ્રેણી ચોક્કસપણે સમાન વેતનના હકદાર બનવા માટે સમાન કામ કરી રહી નથી. અદાલતે કહ્યું કે જે રીતે એલોપેથીના ડોકટરો ઈમરજન્સી ડ્યુટી અને ટ્રોમા કેરમાં કુશળ છે તે કામ આયુર્વેદના ડોક્ટરો કરી શકતા નથી. ખંડપીઠે કહ્યું કે આયુર્વેદ ડોક્ટરો માટે જટિલ સર્જરીમાં મદદ કરવી શક્ય નથી પરંતુ ખઇઇજ ડોક્ટરો આ કાર્ય કરી શકે છે. અદાલતે વધુમાં કહ્યું કે પોસ્ટમોર્ટમમાં આયુર્વેદ ડોક્ટરોની જરૂર રહેતી નથી. શહેરો અને નગરોની જનરલ હોસ્પિટલોની ઓપીડીમાં એમબીબીએસ ડોક્ટરો સેંકડો દર્દીઓ જુએ છે આ બાબતમાં આયુર્વેદ ડોક્ટરોમાં એવું હોતું નથી.
હાઈકોર્ટના નિર્ણયને સરકારે પડકાર્યો હતો
ગુજરાતના સરકારી આયુર્વેદિક ડોક્ટરોએ માંગ કરી હતી કે 1990માં કેન્દ્ર સરકાર દ્વારા રચવામાં આવેલ ટીકુ કમિશનની ભલામણો તેમના પર પણ લાગુ કરવામાં આવે. ગુજરાત હાઈકોર્ટે 2012માં તેમનો મુદ્દો માન્ય રાખ્યો હતો. તેની સામે ગુજરાત સરકારે સુપ્રીમ કોર્ટમાં અપીલ કરી હતી. હવે સુપ્રીમ કોર્ટે ગુજરાત હાઈકોર્ટના આ નિર્ણયને રદ કર્યો છે. સુપ્રીમ કોર્ટે તેના ચુકાદામાં વારંવાર પુનરોચ્ચાર કર્યો છે કે આયુર્વેદ ડોક્ટરની પ્રેક્ટિસ પણ ખૂબ જ મહત્વપૂર્ણ છે અને તેનો ભવ્ય ઈતિહાસ છે પરંતુ તેમના કામની સરખામણી એમબીબીએસ ડોક્ટરોના કાર્ય સાથે કરી શકાય નહીં.