ઝાપોરિઝિયાના અણુ પ્લાન્ટ નજીક રશિયન સેનાનો ભારે બોમ્બમારો
ખાસ-ખબર સંવાદદાતા
રશિયા અને યૂક્રેનનું યુદ્ધ ફરી એકવાર તેની ચરમસીમાએ પહોંચ્યું છે. બંને દેશોએ યુદ્ધના ઉન્માદમાં તમામ લક્ષ્મણરેખાઓ ઓળંગી છે. રશિયાની સેનાએ યૂક્રેનનાં તમામ વિસ્તારોમાં ફરી ભારે બોમ્બમારો અને ભીષણ મિસાઈલ્સમારો કર્યો છે. આને પરિણામે યુરોપના સૌથી મોટા પાવર પ્લાન્ટ નજીક વિનાશક અણુ હોનારત સર્જાવાની રશિયાએ ચેતવણી આપી છે. રશિયાની સેનાએ ઝાપોરિઝિયાના અણુ પ્લાન્ટ નજીકના વિસ્તારોને ટાર્ગેટ બનાવીને ભારે બોમ્બમારો કર્યો છે. અણુ પ્લાન્ટ અને તેની આસપાસના વિસ્તારોમાં ગમે ત્યારે ખતરો સર્જાઈ શકે છે. રશિયાની અણુ ઊર્જા એજન્સી રોસાટોમે ચેતવણી આપી છે કે ઝાપોરિઝિયા અણુ પ્લાન્ટ કે જે યુરોપનો મોટામાં મોટો અણુ પ્લાન્ટ છે તેની આસપાસ તત્કાળ બોમ્બમારો બંધ કરાવવામાં આવે અન્યથા આ પ્લાન્ટનો ગમે ત્યારે નાશ થઈ શકે છે અને અણુ હોનારત સર્જાઈ શકે છે જેની આગ આખા વિશ્વને દઝાડી શકે છે. હજી એ વાતનું આશ્વાસન લેવાનું છે કે રેડિએશન લીક થયું નથી.
- Advertisement -
યુએનની અણુ વોચડોગ એજન્સી ઈન્ટરનેશનલ એટમિક એનર્જી એજન્સીએ સોમવારે આ અણુ પ્લાન્ટની મુલાકાત લઈને તેની ચકાસણી કરી હતી અને પ્લાન્ટને થયેલા નુકસાનની સમીક્ષા કરી હતી. ભારે બોમ્બમારાને લીધે અણુ પાવર પ્લાન્ટના બિલ્ડિંગને તેમજ સિસ્ટમ અને ઈક્વિપમેન્ટને ભારે નુકસાન થયું છે. કેટલાક બોમ્બ વિસ્ફોટ અણુ રિએકટર્સની નજીક થયા છે જે ગમે ત્યારે વિસ્ફોટક પુરવાર થઈ શકે છે તેમ ઈંઅઊઅના ડીજી રાફેલ મારિઆનો ગ્રોસ્સીએ જણાવ્યું હતું. દરમિયાન રશિયાએ એક તબક્કે જેના પર કબજો જમાવ્યો હતો તે ખેરસોનમાં 4 ટોર્ચર સાઈટ મળી આવતા હડકંપ મચ્યો છે.
