એટીએફમાં પણ ભાવ વધતા હવાઈ મુસાફરી મોંઘી બનશે
આજે 1લી એપ્રિલ 2022 છે અને નવા નાણાકીય વર્ષના પ્રથમ દિવસે જ મોંઘવારીનો જોરદાર આંચકો લાગ્યો છે. પહેલી એપ્રિલે એલપીજી ગેસ સિલિન્ડરની નવી કિંમતો જાહેર કરવામાં આવી છે. સરકારી ઓઇલ માર્કેટિંગ કંપનીઓએ 1 એપ્રિલના રોજ એલપીજી ગેસ સિલિન્ડરના ભાવમાં 250 રૂપિયાનો વધારો કર્યો છે. આ વધારો ઘરેલું એલપીજી સિલિન્ડરમાં નહીં પરંતુ કોમર્શિયલ ગેસ સિલિન્ડરમાં થયો છે. ઘરેલુ એલપીજી સિલિન્ડરના ભાવમાં કોઈ ફેરફાર થયો નથી.ગયા મહિને 22 માર્ચે એલપીજી સિલિન્ડરની કિંમતમાં 50 રૂપિયાનો વધારો કરવામાં આવ્યો હતો જ્યારે કોમર્શિયલ ગેસ સિલિન્ડર સસ્તો થયો હતો.
નવા નાણાકીય વર્ષના પ્રથમ દિવસે ઘરેલુ એલપીજીના ભાવમાં વધારો ન થતાં સામાન્ય માણસને થોડી રાહત મળી છે. રાષ્ટ્રીય રાજધાની દિલ્હીમાં સબસિડી વગરના 14.2 કિલોના ગેસ સિલિન્ડરની કિંમત 949.5 રૂપિયા છે. સ્થાનિક એલપીજી સિલિન્ડરની કિંમત કોલકાતામાં 976 રૂપિયા, મુંબઈમાં 949.50 રૂપિયા અને ચેન્નાઈમાં સબસિડી વિનાના સિલિન્ડરની કિંમત 965.50 રૂપિયા છે.
- Advertisement -
દેશની સૌથી મોટી ઓઈલ માર્કેટિંગ કંપની ઈન્ડિયન ઓઈલ એ 19 કિલોના કોમર્શિયલ ગેસ સિલિન્ડરની કિંમતમાં 250 રૂપિયાનો વધારો કર્યો છે.દિલ્હીમાં 19 કિલો કોમર્શિયલ ગેસની કિંમત 249.50 રૂપિયા વધીને 2,253 રૂપિયા થઈ ગઈ છે. પહેલા તેની કિંમત 2,003.50 રૂપિયા હતી.કોલકાતામાં કોમર્શિયલ ગેસ સિલિન્ડરની કિંમત 264.50 રૂપિયા વધીને 2351.5 રૂપિયા થઈ ગઈ છે. પહેલા તેની કિંમત 2,087 રૂપિયા હતી. મુંબઈમાં કોમર્શિયલ ગેસ રૂ. 2,205 થયો હતો. પહેલા તેની કિંમત 1,995 રૂપિયા હતી.ચેન્નાઈમાં 19 કિલોના કોમર્શિયલ ગેસ સિલિન્ડરની કિંમતોમાં સૌથી વધુ 268.50 રૂપિયાનો વધારો થયો છે. અહીં કિંમત વધીને 2,406 રૂપિયા થઈ ગઈ. પહેલા તેની કિંમત 2137.5 રૂપિયા હતી.
એટીએફના ભાવમાં સતત સાતમો વધારો
એલપીજી સિલિન્ડરની કિંમતમાં વધારા ઉપરાંત એર ફ્યુઅલના ભાવમાં પણ વધારો થયો છે. 1 એપ્રિલે જેટ ફ્યુઅલ એટલે કે અઝઋની કિંમત 2 ટકા વધારીને 1,12,925/કિલોલીટર કરવામાં આવી છે. અગાઉ તે 1,10,666 રૂપિયા પ્રતિ કિલોલીટર હતો. નવા દરો 15 એપ્રિલ, 2022 સુધી લાગુ રહેશે. છેલ્લા પખવાડિયાના આંતરરાષ્ટ્રીય બેન્ચમાર્કની સરેરાશ કિંમતના આધારે દર મહિનાની 1લી અને 16મી તારીખે જેટ ફ્યુઅલના ભાવમાં સુધારો કરવામાં આવે છે.આ વધારાને કારણે ભવિષ્યમાં હવાઈ મુસાફરી મોંઘી બની શકે છે.
