મહુવા અને હાંસોટમાં અઢી ઈંચ વરસાદથી રસ્તાઓ પાણી..પાણી…

વલસાડમાં ભારે પવનના કારણે 17 કાચા-પાકા મકાનોને નુકસાન

સૌરાષ્ટ્ર- દક્ષિણ ગુજરાતમાં ભારે પવન સાથે વરસાદ

છૂટાછવાયાં સ્થળે ગાજવીજ સાથે વરસાદની આગાહી

ખાસ-ખબર ન્યૂઝ રાજકોટ
હવામાન વિભાગે 1 જૂન સુધી રાજ્યમાં છૂટાછવાયાં સ્થળે વરસાદની આગાહી કરી છે. આજે (27 મે) મોટા ભાગના જિલ્લાઓમાં ગાજવીજ અને પવન સાથે છૂટાછવાયાં સ્થળે વરસાદની આગાહી કરવામાં આવી છે. વરસાદની આગાહી સાથે 40થી 50ની ઝડપે પવન ફૂંકાવાની શક્યતા છે. 28 અને 29 મેએ બે દિવસ ભારે વરસાદની આગાહી કરવામાં આવી છે.

રાજ્યમાં મોડીરાતથી જ વરસાદી માહોલ જોવા મળી રહ્યો છે. વલસાડ, તાપી, છોટાઉદેપુર સહિતના વિસ્તારોમાં મિની વાવાઝોડાની અસર સાથે વરસાદ ખાબક્યો હતો. છોટાઉદેપુરથી અલીરાજપુર નેશનલ હાઇવે 56 ઉપર અંબાલા ખાતે રસ્તા વચ્ચે ઝાડ પડતાં એક કિલોમીટર જેટલો ટ્રાફિકજામ સર્જાયો હતો. તો ગીર પંથકમાં ફરી મેઘમંડાણ થયા છે અને ધોધમાર વરસાદ વરસી રહ્યો છે. જૂનાગઢમાં વરસાદને લઈને ગિરનારની રોપવે સેવા બંધ કરી દેવામાં આવી છે. ગિરનારનાં ભદ્ભુત દૃશ્યો સામે આવ્યાં છે. આજે સવારે 6 થી બપોરે 12 વાગ્યા સુધીમાં 35 તાલુકામાં વરસાદ નોંધાયો છે. જેમાં સૌથી વધુ ભાવનગરના મહુવામાં 60 મિમિ વરસાદ વરસ્યો છે. આજે ગુજરાતના બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ અને મહીસાગરનાં અલગ-અલગ સ્થળે હળવાથી મધ્યમ વરસાદની સંભાવના રહેલી છે. જ્યારે દક્ષિણ ગુજરાતના તમામ જિલ્લાઓમાં, જેમ કે વડોદરા, છોટાઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી અને દમણ, દાદરા અને નગરહવેલીમાં અને સૌરાષ્ટ્ર-કચ્છના તમામ જિલ્લાઓમાં એટલે કે સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છ અને દીવમાં વરસાદને લઈને યલો એલર્ટ આપવામાં આવ્યું છે.
વલસાડ જિલ્લામાં સોમવારે રાત્રે થયેલી મિનિ વાવાઝોડાની અસરને લઈને વલસાડ જિલ્લામાં રાત્રે ભારે પવન ફૂંકાયો હતો. વલસાડ જિલ્લાના પારડી તાલુકાના સુખેશ ગામમાં વીજળી પડવાથી 4 ભેસ ઇજાગ્રસ્ત બની હતી. વલસાડ તાલુકાના 9, ધરમપુર તાલુકાના 2, પારડી તાલુકાના 4 અને ઉમરગામમાં 2 મળી વલસાડ જિલ્લામાં કુલ 17 પાકા મકાનોમાં અંશત: નુકશાની, જ્યારે 1 કાચા મકાનમાં અંતશ: નુકશાની જોવા મળી છે. વલસાડ ડિઝાસ્ટર મામલતદારના જણાવ્યા અનુસાર નુકશાની પામેલા તમામ વિસ્તારોમાં સર્વેની કામગીરી હાથ ધરવામાં આવી છે.

મહુવા શહેરના ગાંધી બાગ, વાસી તળાવ, એસટી બસ્ટેન્ડ, કુબેર બાગ સ્ટેશન રોડ તેમજ સોસાયટી વિસ્તારમાં વરસાદ વરસી રહ્યો છે. તાલુકાના ગ્રામ્ય પંથકમાં નીચા કોટડા, બગદાણા, સેદરડા, મોટા ખુટવડા, જેસર સહિતના વિસ્તારોમાં ભારે પવન સાથે વરસાદ પડી રહ્યો છે.
અમરેલીમાં ધોધમાર વરસાદ અમરેલી જિલ્લામાં વરસાદી માહોલ વચ્ચે દરિયાકાંઠાના વિસ્તારમાં ધોધમાર વરસાદ પડી રહ્યો છે. રાજુલા, જાફરાબાદ, પીપાવાવ પોર્ટ કોસ્ટલ બેલ્ટ વિસ્તારમાં વરસાદ પડી રહ્યો છે. રાજુલા તાલુકાના ચૌત્રા ડુંગર, માંડલ, ડોળિયા, બાલાપર સહિતના વિસ્તારોમાં ભારે પવન સાથે વરસાદ પડી રહ્યો છે. જાફરાબાદ તાલુકાના વઢેરા, મીતીયાળા, નાગેશ્રી, સરોવડા, ભટવદર, કંથારીયા સહિત ગ્રામ્ય વિસ્તારમાં ધોધમાર વરસાદ વરસી રહ્યો છે. હાલમાં ચોમાસા જેવો માહોલ સર્જાયો છે.

વલસાડ જિલ્લાના ઉમરગામ તાલુકાના નારગોલ જલારામ સ્કૂલ પાસે જાહેર માર્ગ પર વરસાદી માહોલમાં સવારે ગુલમહોરનું વૃક્ષ ધરાશાયી થતાં મોપેડ ચાલકનો આબાદ બચાવ થયો હતો. પંચાયતની ટીમ દ્વારા તાત્કાલક માર્ગ વચ્ચે પડેલ વૃક્ષને હટાવવાની કામગીરી યુદ્ધના ધોરણે શરૂ કરી માર્ગ ખુલ્લો કરાયો હતો.
સુરત જિલ્લાના અનેક ગામડાંઓમાં ડાંગર પકવી ચૂકેલા ખેડૂતો સામે ફરી એકવાર કુદરતનો કહેર ઊભો થયો છે. રાજ્યના હવામાન વિભાગે આગામી દિવસોમાં સુરત સહિત સમગ્ર દક્ષિણ ગુજરાતમાં વરસાદ પડવાની આગાહી આપી છે, જેના પગલે ડાંગરનો પાક લઈ બેઠેલા ખેડૂતોમાં ફરી એકવાર ચિંતા પ્રસરી છે.
ખેડૂતોના જણાવ્યા અનુસાર, અગાઉની કમોસમી વરસાદી સિઝનમાં તેમના પાકને પહેલેથી મોટાપાયે નુકસાન થઈ ચૂક્યું છે. હાલમાં હવામાન વિભાગની આગાહીથી ગભરાયેલા અનેક ખેડૂતો પોતાના પાક બચાવવા માટે તાત્કાલિક ડાંગર મંડળીઓમાં જમા કરાવવા પહોંચી ગયા છે. પરંતુ ત્યાં પણ તેમને આરામ નહીં, પણ અસ્થિરતાથી ભરેલી સ્થિતિનો સામનો કરવો પડી રહ્યો છે.

વડોદરાના આકાશમાં વાદળો ઘેરાયા
વડોદરા શહેરમાં આજે વહેલી સવારથી વાદળછાયુ વાતાવરણ છે. છેલ્લા કેટલાક દિવસોથી શહેરીજનો ભારે ઉકળાટનો સામનો કરી રહ્યા છે, ત્યારે આજે આકાશમાં વાદળો ગોરંભાતા વરસાદ પડે તે શક્યતા છે. લોકો પણ ગરમીથી રાહત મેળવવા માટે વરસાદ પડે તેવી આશા રાખી રહ્યા છે.
મંડળીઓ બહાર કલાકો સુધી લાંબી કતાર
સુરત તાલુકાની એક મુખ્ય ડાંગર ખરીદી મંડળી બહાર દૃશ્ય એવું હતું કે, લગભગ 1 કિલોમીટર લાંબી ટ્રેક્ટરોની કતાર લાગી ગઈ હતી. દરેક ટ્રેક્ટર ખેતરમાંથી કાપીને લાવેલા ડાંગરથી લદાયેલા હતાં. ખેડૂતોના જણાવ્યા અનુસાર, તેઓ સવારે 6 વાગ્યાથી મંડળી બહાર ઉભા છે, પરંતુ હજુ સુધી તેઓએ અંદર જવા માટેની પરવાનગી મળી નથી. ખેડૂતોનું કહેવું છે કે, ગોડાઉનમાં જગ્યા જ નથી. અમે તાલપત્રી ઢાંકીને ડાંગર બચાવવાનો પ્રયાસ કરીએ છીએ, પણ આ કેટલો સમય ચાલે? ડાંગર લાંબા સમય સુધી ખુલ્લામાં રાખવા યોગ્ય પાક નથી.

આજે સવારે 6થી બપોરે 12 વાગ્યા સુધી વરસેલો વરસાદ
તાલુકો વરસાદ
મહુવા 60 મિમિ
હાંસોટ 59 મિમિ
નેત્રંગ 44 મિમિ
ભરૂચ 43 મિમિ
માંગરોળ 42 મિમિ
ઓલપાડ 31 મિમિ
વાલિયા 28 મિમિ
કામરેજ 24 મિમિ
ધોલેરા 22 મિમિ
ઝઘડિયા 20 મિમિ
તળાજા 19 મિમિ
નાંદોદ 19 મિમિ
જાફરાબાદ 18 મિમિ
રાજુલા 18 મિમિ
ઉના 18 મિમિ
વાગરા 15 મિમિ