મોરબીમાં રવાપર વિસ્તારમા પાણી પ્રશ્ર્ને ધારાસભ્ય દુર્લભજીભાઈને ઘેરી લેતા રહેવાસીઓ

મત માંગવા સમયે દેખાતા ધારાસભ્ય પાણી મામલે જવાબ ન આપતા હોવાનો આરોપ

23થી વધુ એપાર્ટમેન્ટના ફ્લેટ ધારકોએ કલેકટરને રજુઆત પહેલા ધારાસભ્ય કાર્યાલયે હલ્લાબોલ કર્યું

ખાસ-ખબર ન્યૂઝ મોરબી, તા.6
મોરબીના રવાપર વિસ્તારમાં આવેલ 22થી 23 એપાર્ટમેન્ટમાં છેલ્લા દોઢ મહિનાથી પાણીની સમસ્યા સર્જાતા રવાપર ગ્રામ પંચાયતે હાથ ઊંચા કરી દેતા રોષે ભરાયેલા લોકો આજે ગુરુવારે જિલ્લા કલેકટરને રજુઆત કરવા દોડી ગયા હતા તે પૂર્વે જ લોકોએ રવાપર ચોકડીએ ટંકારા વિસ્તારના ધારાસભ્ય દુર્લભજી દેથરીયાના કાર્યાલયે હલ્લાબોલ કરી રોષ ઠાલવ્યો હતો. જો કે અહીં કાર્યાલયે ઉડાઉ જવાબ મળતા સ્થાનિકોમાં રોષ ફાટી નીકળ્યો હતો.

મોરબીના રવાપર ગામ વિસ્તારમાં આવેલ પ્રમુખ એપાર્ટમેન્ટ સહિત 22 થી 23 જેટલા એપાર્ટમેન્ટમાં છેલ્લા દોઢ માસથી પીવા વાપરવાનું પાણી ન મળતું હોય લોકોએ અગાઉ સરપંચના ઘેર હલ્લાબોલ કરી રજુઆત કરી હતી. જોકે કેટ કેટલી રજૂઆતો બાદ પણ લોકોને પાણીનો મળતા આજે ગુરુવારે રોષે ભરાયેલા લોકો જિલ્લા કલેકટરને રજૂઆત માટે દોડી ગયા હતા.

બીજી તરફ જિલ્લા કલેક્ટર કચેરીએ રજૂઆત કરવા જતા પહેલા ફ્લેટ ધારકોએ ધારાસભ્ય દુર્લભજી દેથરીયાના કાર્યાલય ખાતે હલ્લાબોલ કરી પાણી માટે ઉગ્ર રજૂઆત કરી હતી. પરંતુ ધારાસભ્યના કાર્યાલય ખાતેથી ઉડાઉ જવાબ મળતા સ્થાનિકો રોષે ભરાયા હતા અને ચૂંટણી સમયે મત માગવા આવતા નેતાઓ પાણી પ્રશ્ને જવાબ આપતા ન હોવાનો આરોપ લગાવ્યો હતો. સ્થાનિક નાગરિકોએ રોષ ભેર રજૂઆત સાથે જણાવ્યું હતું કે રવાપરના સરપંચ અને ઉપસરપંચ બે દિવસે એક કલાક પાણી મળશે તેઓ ઉડાવ જવાબ આપી રહ્યા છે અને જ્યાં જવું હોય ત્યાં રજૂઆત માટે જાવ પણ પાણી નહીં મળે તેવું પણ ધમકી ભર્યા સ્વરમાં જણાવતા હોવાનું કલેકટર સમક્ષ જણાવ્યું હતું. દોઢ મહિનાથી પાણી ન મળતા હાલમાં બાળકો એન્ડ વૃદ્ધોની તકલીફ વધી હોવાનું અને ફ્લેટ ધારકોને પૈસા ખર્ચી પાણી મેળવવું પડતું હોવાનું રજૂઆતમાં જણાવ્યું હતું.

બીજી તરફ જિલ્લા કલેક્ટર કિરણ ઝવેરીએ જણાવ્યું હતું કે હાલમાં મચ્છુ -2 ડેમમાં રીપેરીંગ કામ ચાલુ હોય આ સમસ્યા સર્જાઇ છે અને એકાદ બે દિવસમાં જ પાણી સમસ્યાનો અંત આવશે તેવી ખાતરી આપી હતી.