અસલી નકલીની ભરમાર: રાજકોટની અસલી પોલીસે બે નકલી પોલીસને ઝડપી લીધા

હું D સ્ટાફમાં છું, તું યુવતી સાથે ખરાબ કામ કરવા ગયો હતો કહી દોઢ લાખ માંગી 40 હજાર પડાવ્યા: દૂધની ડેરીએ રહેતા શખ્સને પકડી લીધો

નકલી પોલીસે ગોંડલના યુવકને આંતરી ગાડીના ડોક્યુમેન્ટ માંગી રોકડ-મોબાઈલ લૂંટી લીધા: કણકોટના શખ્સની ધરપકડ કરાઇ

ખાસ-ખબર ન્યૂઝ રાજકોટ

રાજ્યભરમાં અસલી નકલીની ભરમાર વચ્ચે રાજકોટમાં બે દિવસમાં બે નકલી પોલીસ અસલી પોલીસની ઝપટે ચડી ગયા છે બસ પોર્ટ પાછળ રંગરેલીયા મનાવવા ગયેલા યુવકને ડી સ્ટાફની ઓળખ આપી તમે હોટલમાં યુવતી સાથે ખરાબ કામ કરવા ગયા હતા કહી દોઢ લાખ માંગી ગુનો નોંધવાની ધમકી આપી 40 હજાર પડાવી લેનાર દૂધની ડેરી પાસે રહેતા શખ્સને એ ડિવિઝન પોલીસે દબોચી લીધો હતો જ્યારે નાના મવા રોડ પર ગોંડલના શખ્સને નકલી પોલીસે આંતરી ગાડીના કાગળ અને ડોક્યુમેન્ટ માંગી 8000 રોકડ અને મોબાઈલ લૂંટી લીધાની ઘટનામાં તાલુકા પોલીસે કણકોટના શખ્સને દબોચી લઈ કાયદાનું ભાન કરાવ્યું છે.

રાજકોટ શહેરના મવડી ગામ ફલેટમાં રહેતા 22 વર્ષીય યુવાને એ ડિવિઝન પોલીસ સ્ટેશેનમાં એકસેસમાં આવેલા અલ્તાફ દિલાવરભાઈ ખેરડીયા સામે નોંધાવેલી ફરિયાદમાં જણાવ્યું હતું કે, તે ગત તા.20/7/2024 ના રાત્રીના કાર લઈને બસ સ્ટેન્ડ પાછળ ગયો હતો. ત્યારે અહીં એક યુવતી ઉભી હોય તે ઇશારા કરતા યુવાનને શરીર સુખ માણવાની ઇચ્છા હોય જેથી યુવતીને પુછતા તેણે હોટલ સહિત રૂપિયા 1500 કહ્યા હતાં. જેથી યુવાન તેની સાથે બસસ્ટેન્ડ પાછળ આવેલી હોટલમાં ગયો હતો. જ્યાં યુવતી સાથે એકાંત માણ્યા બાદ હોટલથી બહાર નીકળી કાર લઈને જતો હતો યુવાન કાર લઈને ભૂતખાના ચોક થઈ નાગરિક બેંક ચોક અને ત્યાથી સોરઠીયાવાડી સર્કલ પાસે 80 ફૂટ રોડ પર જતો હતો ત્યારે એકસેસ ચાલક તેની પાસે આવ્યો હતો અને કારના કાચ ઉતારવાનું કહેતા યુવાને કાચ ઉતારતા આ શખસે કહ્યું હતું કે, હું પોલીસવાળો છું અને ડી સ્ટાફમાં છું. હું તારો બસ સ્ટેન્ડથી પીછો કરૂ છું તે હોટલમાં છોકરી સાથે ખરાબ કામ કર્યું છે. જેથી પોલીસ સ્ટેશન આવવું પડશે તેમ કહી યુવાનની કારમાં બેસી જઈ તેને ભકિનગર સર્કલની સામે લઇ જઈ કહ્યું હતું કે, બોલ પોલીસ ચોકીએ જવુ છે કે અહીં વહીવટ પતાવવો છે. તેમ કહી યુવાન પાસે 1.50 લાખની માંગણી કરી હતી યુવાન પાસે પૈસાની સગવડ ન થઈ શકે તેમ હોય અંતે 40 હજારની માંગણી કરી હતી. જેથી યુવાને 20 હજાર એટીએમ પરથી ઉપાડયા બાદ 20 હજાર ગુગલ પેથી આપ્યા હતાં. યુવાને આ અંગે જે તે સમયે સમાજના બદનામીના ડરથી પોલીસમાં માત્ર અરજી કરી હતી. આ અરજીના આધારે એ ડિવિઝન પોલીસ મથકના પીઆઇ આર જી બારોટ અને ટીમે તપાસ હાથ ધરી હતી. પોલીસે સીસીટીવી ફૂટેજ ચકાસતા તેમા આ શંકાસ્પદ શખસ નજરે પડયો હતો દરમિયાન આરોપી અલ્તાફ ફરી બસ સ્ટેન્ડ આસપાસ આંટાફેરા કરવા આવતા પોલીસે તેને ઝડપી લીધો હતો યુવાનની ફરિયાદ પરથી પોલીસે આરોપી સામે પોલીસની ખોટી ઓળખ આપવાનો ગુનો નોંધી ધરપકડ કરી આગવી ઢબે સરભરા કરી તેને કાયદાનું ભાન કરાવ્યું હતું.

જ્યારે ગોંડલમાં કુંભારવાડા અક્ષર રેસીડેન્સીમાં રહેતાં અને મિસ્ત્રી કામ કરતાં સંદીપકુમાર ધમાલુભાઇ બરૂન ઉ.24એ મૂળ જામકંડોરણાના અને હાલ કણકોટ ગામે વર્ધમાન સોસાયટીમાં રહેતા ઘનશ્યામ ખીમજી કટારીયા સામે તાલુકા પોલીસમાં નોંધાવેલી ફરિયાદમાં જણાવ્યું હતું કે, હાલ રાજકોટ નહેરૂનગર સામે મકાનમાં મિસ્ત્રી કામ ચાલુ છે. જેથી તે મકાનમાં છેલ્લા એક મહિનાથી રહે છે. ગઇ તા.05/12/2024ના સવારે તે જ્યાં કામ કરે છે ત્યાંથી તેની સાથે કામ કરતો મિત્ર સુનીલ સાથે બાઇકમાં ભીમનગર સર્કલ પાસે આવેલ કલાસીક-1 એપાર્ટમેન્ટમાં મિસ્ત્રી કામ માટે જવાનુ હોય જેથી ત્યાં જતા હતા દરમિયાન નાના મૌવા રોડ, મહાત્મા ગાંધી સ્કુલ પાસે પહોંચેલ ત્યારે એક બાઈક ચાલક પાછળથી ઓવરટેક કરી બાઈક ઉભી રખાવેલ અને બાઇકની આર.સી. બુક, ડ્રાઇવીંગ લાઇસન્સની માંગણી કરેલ હતી ફરિયાદીએ તેને પુછતા પોતે પોલીસ હોવાનું કહેલ અને ફરિયાદી પાસે આર.સી. બુક તથા લાઈસન્સ સાથે ના હોય જેથી તેને જણાવેલ કે, હાલ મારી પાસે ગાડીના કાગળો અને ડ્રાઇવીંગ લાઈસન્સ સાથે નથી. તે પોલીસ વાળાએ યુવાનનો મોબાઇલ લઇ લીઘેલ અને પોતાની સાથે પોલીસ સ્ટેશન આવવાનું કહેલ હતું. જેથી પોલીસને તેનુ નામ પુછતા તે ઉશ્કેરાઈ ગયેલ અને ગાલ ઉપર ફડાકા મારવા લાગેલ અને તેના બાઇકમાં આગળ કે પાછળ કોઇ નંબર પ્લેટ લગાવેલ ના હોય અને તેની પાછળ-પાછળ ગાડી લઈ આવવાનુ કહેલ જેથી યુવાનનો મિત્ર સુનીલ ત્યાં ઉતરી અને તે એકલો તેની પાછળ પાછળ જતો હતો.

યુવાનને રસ્તામાં રોકી પોલીસ વાળાએ તેની પાસેથી 15 હજાર માંગેલ પરંતુ તેને રૂપીયા આપવાની ના પાડતા ફરીથી આ પોલીસવાળાએ માર મારતા યુવાન ખુબ ડરી ગયેલ અને 8 હજાર રોકડા પડેલ હોય જે પુરેપુરા તેને આપી દીધા હતાં. ત્યારબાદ નવા 150 ફુટ રીંગ રોડ ઉપર પરસાણા ચોક પાસે યુવાનનું બાઈક રખાવી નકલી પોલીસે તેના બાઈક પાછળ બેસાડી કણકોટ ગામ પાસે લઈ ગયેલ અને ત્યા યુવાનને ઉભો રાખેલ અને કહેલ કે, તુ અહીં ઉભો રહે હું હમણા પોલીસની ગાડી લઇ આવુ છુ, તેમ કહી તે ત્યાંથી નાસી છૂટ્યો હતો બાદમાં યુવાને ત્યાં કણકોટ ગામ પાસે રાધે પાનની દુકાન વાળા ભાઈને તે પોલીસ વાળા ભાઈની પુછપરછ કરતા તેને જણાવેલ કે, આ ભાઈ પોલીસ હોય તેવુ લાગતુ નથી એટલી વારમાં તે શખ્સ પરત આવેલ અને યુવાનને પાન વાળા ભાઈ સાથે વાત-ચીત કરતા જોઈ જતા તે ભાઇ ત્યાંથી ભાગી ગયેલ હતો. જેથી ત્યાં પાનની દુકાનવાળા ભાઈ પાસે 200 ઉધાર માંગી ત્યાંથી રિક્ષા કરી પરસાણા ચોકમાં પડેલ તેમનું બાઈક લેવા ગયેલ અને ત્યાર બાદ અરજી કરેલ હતી ગઈકાલે પોલીસ મથકેથી ફોન આવતા તે શખ્સ પકડાય ગયેલ હોય જેથી તેને ઓળખવા માટે બોલાવતા યુવાને નકલી પોલીસને ઓળખી બતાવ્યો હતો. તેની પાસેથી નકલી પોલીસે રોકડ રૂ.8 હજાર અને એક મોબાઈલ ફોનની લૂંટ કરી હતી તાલુકા પોલીસ મથકના પીઆઈ ચીરાગ જાદવ અને ટીમે ગણતરીની કલાકોમાં નકલી પોલીસની ઓળખ આપી લૂંટ ચલાવનાર શખ્સને પકડી કાયદાનું ભાન કરાવ્યું હતું.

નકલી પોલીસ વિરૂદ્ધ અપહરણ, ચોરી દારૂ સહીતના અનેક ગુના નોંધાયેલા છે
રાજકોટમાં તાલુકા પોલીસની ટીમે પકડી પડેલ નકલી પોલીસ ઘનશ્યામ કટારીયા ગુનાહીત ઈતિહાસ ધરાવે છે તેના વિરૂદ્ધ અપહરણ, ચોરી, દારૂ સહીતના સાતેક ગુના અલગ અલગ પોલીસ મથકમાં નોંધાયેલા છે.