મોરબીનાં ઘુંટુ નજીકના રોલ્ટાસ પેપરમિલ દ્વારા પ્લાસ્ટિક વેસ્ટ સળગાવીને બેફામ વાયુ પ્રદૂષણ

વિવેકાનંદ યુવા સમિતિના સભ્યોએ બોઈલરમાં ગેરકાયદે પ્લાસ્ટીક વેસ્ટ સળગાવવામાં આવતું હોવાનો ઘટસ્ફોટ કર્યો

ખાસ-ખબર સંવાદદાતા
મોરબી તાલુકાના ઘૂંટુ ગામમાં છેલ્લા એકાદ વર્ષ જેટલા સમયથી રાત્રીના સમયે પ્લાસ્ટીક બળવાની એકદમ તીવ્ર વાસ આવતી હોય ગ્રામજનોના આરોગ્ય પર ખતરો ઉભો થયો છે. આ બાબતે ગામના જાગૃત લોકો દ્વારા ગુજરાત પોલ્યુશન ક્ધટ્રોલ બોર્ડની સ્થાનિક મોરબી કચેરીના અધિકારીઓને અનેક વાર રજૂઆત કરવા છતાં કોઈ યોગ્ય પગલાં ભરવામાં આવતા નથી જેથી અંતે ઘુંટુ ગામની વિવેકાનંદ યુવા સમિતિના સભ્યોએ કેનાલ કાંઠે આવેલ રોલ્ટાસ પેપરમિલમાં તપાસ કરતા અહીં જીપીસીબીના નિયમોનો ઉલાળીયો કરીને પ્લાસ્ટીક વેસ્ટ સળગાવવામાં આવતું હોવાની ચોંકાવનારી માહિતી મળી હતી.

મોરબી તાલુકાના ઘુંટુ ગામ નજીક કેનાલ કાંઠે આવેલ રોલ્ટાસ પેપરમિલમાંથી પ્લાસ્ટીક બળવાની તીવ્ર વાસ આવતી હોય ગ્રામજનો પરેશાન થઈ ગયા છે. અનેક રજૂઆતો બાદ પણ કોઈ યોગ્ય કાર્યવાહી ન થતાં અંતે ગત તા. 16 ઓગસ્ટના રોજ રાત્રીના સમયે વિવેકાનંદ યુવા સમિતિના સભ્યો આ પેપરમીલ ખાતે દોડી ગયા હતા અને ત્યાં જઈને તપાસ કરવામાં આવતા આ રોલ્ટાસ પેપરમિલ દ્વારા ગેરકાયદેસર રીતે પ્લાસ્ટીક વેસ્ટ બોઈલરમાં સળગાવવામાં આવતો હતો જેના કારણે ચીમનીમાંથી એકદમ ઘટ્ટ ધુમાડો પણ નીકળતો હતો. આ સમગ્ર ઘટનાક્રમના વિડીયો અને ફોટો યુવાનોએ પોતાના મોબાઈલમાં કેદ કરી લીધા હતા.

મોરબી GPCBએ માત્ર નોટિસ આપીને સંતોષ માની લીધો !
તા.16ના રોજ રાત્રીના સમયે વિવેકાનંદ યુવા સમિતિના સભ્યોએ રોલ્ટાસ પેપરમિલ દ્વારા પ્લાસ્ટીક સળગાવવામાં આવતું હોવાના વિડિયો સહિતની માહિતી મોરબી જીપીસીબીના અધિકારી એમ. એસ. સોનીને આપતા તેમની ટીમ સાથે તેઓ ત્યાં પહોંચ્યા હતા અને નોટીસ આપીને ત્યાંથી રવાના થઈ ગયા હતા. આશ્ચર્યની વાત તો એ છે કે, ફોટો અને વીડિયો સહિતના સજ્જડ પુરાવાઓ યુવાનોએ આપ્યા હોવા છતાં મોરબી જીપીસીબી દ્વારા કોઈ પણ પ્રકારની કાર્યવાહી કરવામાં આવી ન હતી અને માત્ર નોટીસ આપીને સંતોષ માની લીધો હતો.

બીજા જ દિવસે વિવેકાનંદ યુવા સમિતિના સભ્યોના ગાંધીનગરમાં ધામા !
આ અંગે સંતોષકારક કાર્યવાહી ન થઈ હોવાથી વિવેકાનંદ યુવા સમિતિના સભ્યોએ બીજા જ દિવસે એટલે કે ગઈકાલે ગાંધીનગરમાં ધામા નાખ્યા હતા અને ગુજરાત પોલ્યુશન ક્ધટ્રોલ બોર્ડના ચેરમેન આર. બી. બારડ અને સભ્ય સચિવ ડી. એમ. ઠાકરને રૂબરૂ મળીને ફોટો વિડિયો અને તમામ લીટરેચર આ બંને અધિકારીઓને સોંપ્યું હતું ત્યારબાદ ચેરમેન બારડે આ પેપરમીલ વિરૂદ્ધ કડકમાં કડક કાર્યવાહી કરવાનો અધિકારીઓને આદેશ આપ્યો હતો જેથી આ અંગે સંતોષકારક કાર્યવાહી થશે તેવી ગામના યુવાનોમાં આશા સેવાઈ રહી છે.

રોલ્ટાસ પેપરમિલ દ્વારા પ્લાસ્ટિક વેસ્ટ સળગાવાઈ રહ્યું છે, વિડીયો જોવા અહીં ક્લિક કરો