રાજકોટના નેઈલ આર્ટિસ્ટે નેઈલ પર બનાવી શ્રીરામ-સીતાની પ્રતિકૃતિ !

ખાસ-ખબર સંવાદદાતા
શ્રીરામ જન્મભૂમિ ભગવાન રામના આગમન માટે તૈયાર છે ત્યારે માત્ર અયોધ્યા જ નહીં પરંતુ દેશ-વિદેશમાં અયોધ્યાના રામ મંદિરમાં રામલલ્લાના અભિષેકને લઈને ઉત્સાહ જોવા મળી રહ્યો છે. રામભક્તો તેમના પ્રભુ શ્રી રામ માટે કંઈ પણ કરી છૂટવા તત્પર છે. દરેક લોકોમાં અનેરો ઉત્સાહ જોવા મળી રહ્યો છે ત્યારે શહેરોને શણગારવામાં આવી રહ્યા છે તો બીજીબાજુ નેઈલ આર્ટમાં પણ શ્રીરામ-સીતા, હનુમાનજી અને જયશ્રી રામની પ્રતિકૃતિ દોરવામાં આવતા આકર્ષણનું કેન્દ્ર બન્યા છે.
રાજકોટના ભક્તિનગર સર્કલ પાસે આવેલા બ્લેક એન્ડ વ્હાઈટ નેઈલ આર્ટ સ્ટુડિયોના નેઈલ આર્ટિસ્ટ નેહા જોષી દ્વારા શ્રીરામલલ્લાના પ્રાણપ્રતિષ્ઠા મહોત્સવને વધાવવા નેઈલ પર જયશ્રી રામ અને શ્રીરામ-સીતા, હનુમાનજીની પ્રતિકૃતિ બનાવવામાં આવી છે. તા. 22ના આ મહોત્સવને લઈને યુવતીઓમાં પણ ભારે ઉત્સાહ જોવા મળી રહ્યો છે. પોતાના નેઈલ પર ભગવાન શ્રીરામ, હનુમાનજીની પ્રતિકૃતિ ચિતરાવી શ્રીરામ પ્રત્યેની અપાર શ્રદ્ધા વ્યક્ત કરી રહી છે.