રજનીકાંતની ફિલ્મ ‘જેલર’નું ટ્રેલર રિલીઝ, ‘થલાઇવા’ દમદાર એકશન અવતારમાં જોવા મળ્યા

સુપરસ્ટાર રજનીકાંત અને તમન્ના ભાટિયા અભિનીત ફિલ્મ ‘જેલર’ટૂંક સમયમાં થિયેટરોમાં આવી રહી છે. આ પહેલા ફિલ્મ જેલરનું ટ્રેલર રિલીઝ કરવામાં આવ્યું છે.

સુપરસ્ટાર રજનીકાંતના ફેન્સ માત્ર સાઉથમાં જ નથી પણ આખા ભારતમાં ઘર ઘરમાં તેમના ચાહકો મળી આવે છે અને લોકો એમની નવી ફિલ્મની આતુરતાથી રાહ પણ જોતાં રહેતા હોય છે. એવામાં હવે થલાઈવાનો સ્વેગ ફરી ચાહકોના દિલ પર છવાઈ જવાનો છે. સુપરસ્ટાર રજનીકાંતની આગામી ફિલ્મ ‘જેલર’ટૂંક સમયમાં થિયેટરોમાં આવી રહી છે. આ પહેલા સુપરસ્ટાર રજનીકાંત અને તમન્ના ભાટિયા અભિનીત આગામી ફિલ્મ જેલરનું ટ્રેલર રિલીઝ કરવામાં આવ્યું છે.

ફિલ્મ ‘જેલર’નું ટ્રેલર જોઈને ચાહકો દિવાના થઈ ગયા
સાઉથના સુપરસ્ટાર રજનીકાંતની ફિલ્મ ‘જેલર’નું ટ્રેલર જોઈને ચાહકો તેના દિવાના થઈ ગયા છે. રજનીકાંતના લૂકથી લઈને સ્ટાઈલ સુધી ફેન્સ તેમના ખૂબ વખાણ કરી રહ્યા છે. ટ્રેલર એક્શન અને જબરદસ્ત ડાયલોગ્સથી ભરપૂર છે. ફિલ્મના ટ્રેલરમાં થલાઈવાનો જાદુ ચાહકોના દિલ પર ચઢતો જોવા મળ્યો હતો. આગામી ફિલ્મ જેલરમાં રજનીકાંત ટાઈગર મુથુવેલ પાંડિયન નામના જેલરની ભૂમિકા ભજવતા જોવા મળે છે. જે પરિવાર માટે નમ્ર અને સરળ છે પણ દુશ્મનો માટે તે ખૂંખાર સિંહથી ઓછો નથી. આ ટ્રેલરમાં રજનીકાંતનો સ્વેગ જોવા મળ્યો છે અને તેની સામે એટલો જ બોલિવૂડ સ્ટાર જેકી શ્રોફ પણ છે. જે ફિલ્મમાં મુખ્ય વિલનની ભૂમિકામાં જોવા મળશે.

ટ્રેલરમાંથી ગાયબ હતી તમન્ના ભાટિયા
જે ટ્રેલર સામે આવ્યું છે તેમાં અભિનેત્રી તમન્ના ભાટિયાની ઝલક જોવા મળી નથી. રિલીઝ થયેલા ટ્રેલરમાં અભિનેત્રી રામ્યા કૃષ્ણન રજનીકાંતની પત્નીના રોલમાં જોવા મળી છે. જ્યારે જેકી શ્રોફ એક વિલનની ભૂમિકામાં જોવા મળે છે. આ સિવાય ફિલ્મમાં મલયાલમ સુપરસ્ટાર મોહનલાલ જોવા મળ્યા હતા. તેમજ પીઢ અભિનેતા સુનીલ, શિવ રાજકુમાર અને યોગી બાબુ જેવા સ્ટાર્સ પણ જોવા મળ્યા હતા. અભિનેત્રી તમન્ના ભાટિયાનું ગીત કાવલ્લા પણ હિટ રહ્યું છે.

આ દિવસે ફિલ્મ જેલર થશે રિલીઝ
જણાવી દઈએ કે મેકર્સ આ ફિલ્મ 10 ઓગસ્ટે રિલીઝ કરવા જઈ રહ્યા છે. ટ્રેલર ફિલ્મ રિલીઝના માત્ર 1 અઠવાડિયા પહેલા જ રિલીઝ કરવામાં આવ્યું છે. આવી સ્થિતિમાં આ ફિલ્મ પણ મોડા પ્રમોશનને કારણે ચર્ચામાં રહી છે. એવો દાવો કરવામાં આવી રહ્યો છે કે આ ફિલ્મ સિનેમાઘરોમાં બ્લોકબસ્ટર સાબિત થશે. આ ફિલ્મ નેલ્સન દિલીપકુમારે ડિરેક્ટ કરી છે. જેમની અગાઉની રીલિઝ થયેલી મૂવી બીસ્ટ થિયેટર્સમાં કોઈ કમાલ બતાવી શકી નહતી.