સવારથી 30 સ્થળોએ 150 અધિકારીઓનો કાફલો ત્રાટક્યો
ખાસ-ખબર સંવાદદાતા
નાણાકીય વર્ષની સમાપ્તિ તથા લોકસભાની ચુંટણી પુર્વે ઈન્કમટેકસ દ્વારા રાજકોટમાં મેગા ઓપરેશન હાથ ધરવામાં આવ્યું છે. લાડાણી-ઓરબીટ-ટવિનટાવર જેવા મોટા ગજાના- ટોચના બિલ્ડરગ્રુપોને નિશાન બનાવીને સવારથી મોટાપાયે દરોડા કાર્યવાહી હાથ ધરવામાં આવી છે. 30 જેટલા સ્થળોએ અધિકારીઓનો કાફલો ત્રાટકયો હતો. કરોડો રૂપિયાની કરચોરી પકડાવાની આશંકા વ્યક્ત કરવામાં આવી રહી છે.
રાજકોટ આવકવેરા ઈન્કમટેકસ વિંગ દ્વારા આજે સવારથી ટોચના બિલ્ડરગ્રુપોને નિશાન બનાવીને દરોડા ઓપરેશન હાથ ધરવામાં આવ્યું હતું. બિલ્ડરો તેના ભાગીદારો તથા નાણાકીય કનેકશન ધરાવનારા પર પણ અધિકારીઓનો કાફલો ત્રાટકયો હતો. રાજકોટ-સૌરાષ્ટ્રનો સૌપ્રથમ 40 માળનો બિલ્ડીંગ પ્રોજેકટ જાહેર કરનારા અને ટુંકાગાળામાં ત્રણ મોટા પ્રોજેકટ બનાવનારા લાડાણી એસોસીએટસના દિલીપ લાડાણી ઝપટે ચડી ગયા હતા.
કાલાવડ રોડ પર વોકહાર્ટ હોસ્પીટલ પાસેની શેરીમાં આવેલા તેમના નિવાસસ્થાન તથા મવડીમાં સ્પીડવેલ પાર્ટી પ્લોટ પાસેની ઓફિસ પર દરોડા કાર્યવાહી હાથ ધરવામાં આવી હતી. આ સિવાય તેમના કનેકશનમાં પણ અર્ધોડઝન સ્થળોએ કાફલો ત્રાટકયો હતો. મવડીમાં નિવાસ ધરાવતા તેમના એકાઉન્ટન્ટના નિવાસસ્થાનને પણ દરોડા કાર્યવાહીને કવર કરી લેવામાં આવ્યું હતું. એકાઉન્ટન્ટ વિરાજના નિવાસે પણ સવારથી દરોડા પાડવામાં આવ્યા હતા.
આ સિવાય દિલીપ લાડાણી સાથે ભાગીદારી-કનેકશન ધરાવતા ઓરબેટ ગ્રુપને પણ નિશાન બનાવવામાં આવ્યું હતું. મોટામવામાં આલીશાન-વૈભવી ઈમારતોમાં રહેતા વિનસ પટેલ તથા તેમના ભાઈઓના નિવાસસ્થાન તથા ઓફિસો પર દરોડા કાર્યવાહી હાથ ધરવામાં આવી હતી.
આ ઉપરાંત કોટેચા ચોક પાસે સૌરાષ્ટ્ર હાઈસ્કુલની બાજુમાં આકાર પામી રહેલા ટવીન ટાવર ગ્રુપને પણ નિશાને લેવામાં આવ્યું હતું. આ પ્રોજેકટમાં લાડાણી ગ્રુપ ઉપરાંત દાનુભા, તેમના પુત્ર અર્જુન, મયુર રાદડીયા, મહીપતસિંહ ચુડાસમાના સ્થળોએ પણ સવારથી દરોડા કાર્યવાહી હાથ ધરવામાં આવી હતી.
આવકવેરા વિભાગની પ્રારંભીક-પ્રાથમીક તપાસમાં જ કરોડો રૂપિયાના રીયલ એસ્ટેટ વ્યવહારો દર્શાવતા દસ્તાવેજો જપ્ત કરવામાં આવ્યા હતા. ઉપરાંત પેનડ્રાઈવ-હાર્ડડિસ્ક સહિતના ઈલેકટ્રોનિકસ ગેઝેટ પણ જપ્ત કરવામાં આવ્યા હતા.
- Advertisement -
સૌરાષ્ટ્રનો 40 માળનો પ્રથમ રેસિડેન્શિયલ ટાવર તથા ટૂંકાગાળામાં ત્રણ મોટા પ્રોજેક્ટથી બિલ્ડરો ‘નજર’માં આવ્યા
આવકવેરા વિભાગની ઝપટે ચડેલા લાડાણી-ઓરબીટ બિલ્ડર ગ્રુપ દ્વારા છેલ્લા ટુંકાગાળામાં ત્રણથી વધુ વૈભવી પ્રોજેકટ મુકવામાં આવ્યા હતા અને તે જ કારણે ઇન્કમટેકસની નજરમાં આવ્યા હતા. રાજકોટ જ નહીં સમગ્ર સૌરાષ્ટ્રનો 40 માળનો સૌપ્રથમ રેસીડેન્સીયલ ટાવર પ્રોેજેકટ પણ આ ગ્રુપે જ લોન્ચ કર્યો હતો. આ સિવાય મોટામવાનો ઓરબીટ ગાર્ડન પ્રોેજેકટ પણ ઇન્કમટેકસની નજરમાં આવ્યા હતા. કોટેચા ચોકના ટવીન ટાવર પ્રોેજેકટ પણ નજરમાં વસ્યો હતો. કાલાવડ રોડ, કોેટેચા ચોક, મોટામવા, મવડી જેવા વિસ્તારોમાં પોલીસ સુરક્ષા સાથે ઇન્કમટેકસ વાહનો ત્રાટકયા હતા.
