ખાસ-ખબર ન્યૂઝ રશિયા, તા.10
વડાપ્રધાન નરેન્દ્ર મોદીને રશિયાના સર્વોચ્ચ સન્માન ’ઓર્ડર ઓફ સેન્ટ એન્ડ્ર્યુ એપોસ્ટલ’થી નવાજવામાં આવ્યા હતા. રશિયાના રાષ્ટ્રપતિ વ્લાદિમીર પુતિને પીએમ મોદીને આ સન્માન આપ્યું હતું. વડાપ્રધાન મોદીને રશિયા અને ભારત વચ્ચેના દ્વિપક્ષીય સંબંધોની પ્રગતિ માટે તેમના અસાધારણ કાર્ય માટે ’ઓર્ડર ઓફ સેન્ટ એન્ડ્ર્યુ એપોસ્ટલ’ સન્માન આપવામાં આવ્યું હતું. ઓર્ડર ઓફ સેન્ટ એન્ડ્ર્યુ ધ એપોસ્ટલ એવોર્ડ પ્રાપ્ત કર્યા બાદ પીએમ મોદીએ કહ્યું, ’હું રશિયાના સર્વોચ્ચ સન્માનથી મને સન્માનિત કરવા બદલ રાષ્ટ્રપતિ પુતિનનો હૃદયપૂર્વક આભાર વ્યક્ત કરું છું. આ સન્માન માત્ર મારું સન્માન નથી પરંતુ 140 કરોડ ભારતીયોનું સન્માન છે. આ ભારત અને રશિયા વચ્ચે સદીઓ જૂની ગાઢ મિત્રતા અને પરસ્પર વિશ્ર્વાસનું સન્માન છે. આ અમારી રાજદ્વારી ભાગીદારી માટે સન્માનની વાત છે. છેલ્લા અઢી દાયકાથી તમારા નેતૃત્વમાં ભારત અને રશિયા વચ્ચેના સંબંધો દરેક દિશામાં મજબૂત થયા છે અને દરેક વખતે નવી ઊંચાઈએ પહોંચી રહ્યા છે. બંને દેશો વચ્ચે તમે જે સંબંધો બાંધ્યા છે તે સમયની સાથે વધુ મજબૂત બન્યા છે.
ઓર્ડર ઓફ સેન્ટ એન્ડ્રયૂ એપોસ્ટલ શું છે?
’ઓર્ડર ઓફ સેન્ટ એન્ડ્ર્યુ ધ એપોસ્ટલ’ એવોર્ડ રશિયાનું સર્વશ્રેષ્ઠ સન્માન છે. તેની શરૂઆત ઝાર પીટર ધ ગ્રેટ દ્વારા વર્ષ 1698માં કરવામાં આવી હતી. તેણે સેન્ટ એન્ડ્રુના માનમાં તેની શરૂઆત કરી હતી. સેન્ટ એન્ડ્રુ ઈસુના પ્રથમ પ્રચારક હતા.
