આટકોટમાં PMના આગમનની તડામાર તૈયારી

આટકોટમાં કે.ડી.પી. હોસ્પિટલની મુલાકાતે મંત્રી હર્ષભાઈ સંઘવી પ્રધાનમંત્રીના કાર્યક્રમના સ્થળનું નિરીક્ષણ કર્યું
વડાપ્રધાન નરેન્દ્રભાઈ મોદી રાજકોટ જિલ્લાના જસદણ તાલુકાના આટકોટ ખાતે પટેલ સેવા સમાજ સંચાલિત નવનિર્મિત કે.ડી.પી. મલ્ટી સ્પેશ્યાલિસ્ટ હોસ્પિટલના લોકાર્પણ પ્રસંગે તા. 28ના રોજ આવનાર છે.

આ કાર્યક્રમના સુચારુ આયોજન માટે રાજ્યના ગૃહ મંત્રી હર્ષભાઈ સંઘવીના અધ્યક્ષસ્થાને તેમજ વાહન વ્યવહાર મંત્રી અરવિંદભાઈ રૈયાણીની વિશેષ ઉપસ્થિતિમાં જસદણ ખાતે સંબંધિત મહાનુભાવો, અધિકારીઓ અને પદાધિકારીઓની ઉપસ્થિતિમાં બેઠક યોજાઈ હતી, તેમજ મંત્રીઓએ આટકોટમાં પ્રધાનમંત્રીના કાર્યક્રમના સ્થળનું નિરીક્ષણ કર્યા બાદ લોકાર્પણ થનાર છે તે કે.ડી.પી. હોસ્પિટલની મુલાકાત લીધી હતી.

જસદણમાં કલેકટર અરૂણ મહેશ બાબુએ બેઠકનું સંચાલન કર્યું હતું. કલેકટરે હેલિપેડ, ડોમ, કોન્વોય, પાર્કિંગ વગેરેની થઈ રહેલી વ્યવસ્થાના આયોજનની માહિતી આપી હતી. આ પ્રસંગે સાંસદ મોહનભાઈ કુંડારિયા, ધારાસભ્ય કુંવરજીભાઈ બાવળીયા, મેયર ડો. પ્રદિપ ડવ, જિલ્લા વિકાસ અધિકારી દેવ ચૌધરી, પ્રાંત અધિકારી કે. ટી. બાટી, રેન્જ આઈ. જી. સંદીપ સિંઘ, પોલીસ કમિશનર જયપાલસિંહ રાઠોડ કે.ડી.પી. હોસ્પિટલના સ્થાપક અને મેનેજિંગ ટ્રસ્ટી ભરતભાઈ બોઘરા સહિતનાઓ ઉપસ્થિત રહ્યા હતા.