ગત રવિવારે હાથફેરો કરનાર ભાવનગરના શખસની ધરપકડ
1.76 લાખનો મુદ્દામાલ કબજે: એક સાગરીતની શોધખોળ
ખાસ-ખબર સંવાદદાતા
શહેરના રેલનગરમાં આવેલ સાઈબાબા સોસાયટીમાં ગત રવિવારે રાત્રે બંધ મકાનના તાળા તોડી તસ્કરો બે ભાઇઓના મકાનમાંથી 3.53 લાખની મતા ઉસેડી જતા પ્રનગર પોલીસે ગુનો નોંધી તપાસ હાથ ધરી ગણતરીના દિવસોમ જ ચોરી કરનાર ભાવનગરના શખસને 1.76 લાખના મુદામાલ સાથે દબોચી લઈ અન્ય એક સાગરીતની શોધખોળ હાથ ધરી છે.
રેલનગર અન્ડરબ્રિજ પાસે આવેલ સાઈબાબા સોસાયટીમાં રહેતા દિપકભાઈ ચાવડા અને તેનો ભાઈ પરિવાર સાથે ગત રવિવારે ભગવતીપરામાં બહેનના ઘરે પ્રસંગમાં ગયા હતા અને રાત્રે 11 વાગ્યે આવ્યા ત્યારે બંને ભાઇઓના ઘરના તાળા તૂટેલા જોવા મળ્યા હતા અને બંનેના ઘરમાંથી રોકડ 80 હજાર સહિત 3.53 લાખની મતા ચોરી થઈ ગઈ હોય પ્રનગર પીઆઇ ભાર્ગવસિહ ઝણકાંત અને ટીમે તપાસ હાથ ધરી હતી દરમિયાન સ્ટાફે બાતમી આધારે આ ચોરીમાં સંડોવાયેલ ભાવનગરના આદિલ ઉર્ફે તપેલી ઉર્ફે સુલતાન મહેબૂબભાઈ મલેક ઉ.21ને ઝડપી લઈ 1.76 લાખના દાગીના કબજે કર્યા હતા જ્યારે નાસી છૂટેલા સાગરીત ભાવનગરના સાહિલ ઉર્ફે નનો હાનિફભાઈ કળદોરીયાની શોધખોળ હાથ ધરી છે. પકડાયેલ શખસ ભાવનગરથી રાજકોટ આવી ચોરી કરી ફરી ભાવનગર જતો રહેવાની મોડસ ઓપરેન્ડી ધરાવતો હોવાનું જાણવા મળ્યું છે આદિલ રાજકોટ, ભાવનગર અને સુરેન્દ્રનગરમાં ચોરીન 17 ગુનાઓમાં પકડાઈ ચૂક્યો છે.
